Tàm dar lùp mờ hơ jơnau lùp, cau ala mat mò Phan Thị Hà Phước - Cau lam bồ Mpồl lơh sa - Kes priă Mpồl duh broă Làng bol càr Dăk Lăk đơs là, uă broă jàu lơh sa bè lơh sa mờ măi mok, tac phan hờ lơgar ndai, lòt nhơl mờ khà mpồl lơh sa kă bro tơng gơs pa ndrờm gơguh pơndrờm dùl tŭ bal mờ nam lài, mơya khà mpồl lơh sa kă bro tơn lời lơh broă, ơm ing lơh broă kung gam tàm khà uă ngan sơl. Hơ jơnau lùp bơh cau ala mat dê bè ală gah broă kong uă kal ke mờ broă lơh nàng lơh niam wơl anih bơcri priă, kă bro, drơng jơnau kờñ gơguh tai 2 nơm khà, ồng Cao Đình Huy - Kwang lam bồ Sờh Priă jền càr Dăk Lăk pà git, 6 nhai bồ nam gùt càr geh rlau 420 mpồl lơh sa kă bro tơn lời lơh broă mờ rlau 1 rbô 200 mpồl lơh sa kă bro ơm ing lơh broă, uă ngan là mpồl lơh sa kă bro dềt mờ dimơ tàm ală gah kă bro phan, bơt bơtàu, ù tiah hìu đam, jun pơndiang phan, ơm wơl bic mang mờ ñô sa. Nàng tă bơsong bơta kal ke do. 

Ồng Cao Đình Huy pà git: “Sờh Priă jền hơ pơrgon tàm tơngai tus pơn jat tai jat sền nền nòn bơta geh ngan lơh broă mpồl lơh sa kă bro tàm càr dê nàng di tŭ tă pơgồp jơnau đơs ai Anih duh broă càr in ală broă lơh tă bơsong kal ke ai mpồl bơtiàn mpồl lơh sa kă bro in; tơrmù khà mpồl lơh sa kă bro lik bơh drà kă bro, tơnguh khà mpồl lơh sa kă bro lơh broă wơl mờ tơnguh bơta niam mpồl lơh sa kă bro tơng gơs pa. Ờ mìng pơgồp bơnah rề ơnàng broă lơh sa, lơh geh tai broă lơh mờ tơnguh rề dia, mờ gam lơh gơlik tai bơta gơn kơnờm gơguh tai ai rài lơh sa càr dê in”.

Dùl tàm ală bơta gơ kòl tàm càr Dăk Lăk là mpồl lơh sa kă bro geh dờp priă bơcri ờ hềt ƀuơn. Ồng Nguyễn Kim Cương - Kwang lam bồ Anih priă jền dà lơgar sơnĕ tiah 11 pà git, tus lồi nhai 6, priă dồs ai càn tàm càr Dăk Lăk geh mờr 281 rbô 700 tơmàn đong, gơguh rlau 21 rbô tơmàn đong pơndrờm mờ bồ nam. Bulah bè hơ̆, priă càn lời ai mpồl lơh sa kă bro dềt mờ dimơ in mìng rơp pa geh mờr 13% kờp jơh priă dồs ai càn. Jat ồng, broă mpồl lơh sa kă bro kal ke geh càn priă geh jơnau kuơmàng bơh bơta loh làng priă jền mờ pràn jak đơng lam broă.

Ồng Nguyễn Kim Cương sồr: “Sồr tam cah is loh làng priă jền mpồl lơh sa kă bro dê mờ priă jền hìu bơnhă dê, cau nă să is lơh tờm mpồl lơh sa kă bro dê nàng gơtùi ai tơnggŏ là broă lơh he dê geh cih jơh tàm sră pơ àr. Is ồn là tàm bơta broă cih loh làng sră pơ àr dơ̆ ngui priă jền kung bè jơnau yal tă dia ngai sơlơ sồr pal loh làng rlau. Do là bơta lài ngan mờ bol hi kờñ pơyua tus ală mpồl lơh sa kă bro dềt mờ dimơ in tŭ tus bal lơh sa kă bro kung bè bơta gơ rềng càn priă tàm ală anih priă jền.”

Dilah priă bơcri là bơta pal geh nàng gàr sùm broă lơh den drà kă bro là bơta pal geh nàng mpồl lơh sa kă bro bơtàu tơnguh. Bè hơ̆ den tàng, tàm dar lùp mờ hơ jơnau lùp, broă hòi jà kă bro phan, rề ơnàng drà kă bro kung geh đơs tus sơl. Bè broă lơh do, mò Nguyễn Thị Thu An - Kwang lam bồ Sờh Lơh sa mờ măi mok mờ kă bro phan càr Dăk Lăk pà git, 6 nhai bồ nam do, gah do neh dong kờl mờr 150 dơ̆ mpồl lơh sa kă bro, mpồl lơh broă bal tus bal hòi jà kă bro phan, tàm tơrbŏ bal tac phan lơh gơs tàm lơgar mờ bơdìh lơgar, mờ kung chồl tơnguh kă bro phan tàm điện tử mờ tam gơl sồ. Tơngai tus broă lơh hòi jà kă bro phan rơp pơn jat tai geh tam gơl pa jat jơnau kờñ mùl màl mpồl lơh sa kă bro dê, ngan là tàm ală drà ală lơgar.

Mò Nguyễn Thị Thu An pà git tai: “Bè drà ală lơgar, bol hi rơp tus bal bơh jơnau kờñ mpồl lơh sa kă bro dê. Hơ̆ là mpồl lơh sa kă bro kờñ bơta lơi tàm drà kă bro hơ̆, dong kờl phan lơi, tàm tơrbŏ bè lơi mờ bol hi rơp bơt bơtàu broă lơh lơh jat ală jơnau sồr hơ̆ bal mờ mpồl lơh sa kă bro”.

Dar lùp mờ hơ jơnau lùp ai gŏ bơta lơh ngan bơh càr Dăk Lăk dê tàm broă sền song tơn tàm ală bơta ờ niam tàm anih bơcri priă, kă bro. Ală broă lơh geh ai tơlik ndrờm wèt tus jơnau kờñ ai priă bơcri, lơh gơguh wơl mpồl bơtiàn ală mpồl lơh sa kă bro, lơh gơlik bơta tờm, lơh gơlik bơnàng jă nàng càr Dăk Lăk lam lơh jơnau kờñ gơguh tai 2 nơm khà tàm tơngai tus.