Rơndăp broă lơh BLOOM geh dong kờl priă jền bơh Chính phủ lơgar Canada dê bơh Ƀộ Ală broă gùt plai ù Canada, lam lơh tàm bàr càr Dăk Lăk mờ Tuyên Quang bơh nhai 6 nam 2026 tus nhai 4 nam 2030. Rơndăp broă lơh ờ ngui priă tă pơgồp bal; cau dong kờl priă jền să tờm tơn ătbồ, jăt sền broă ngui priă jền do. Rơndăp broă lơh wèt tus lơh geh wơl mờ tơngguh uă bơta niam ală phan kis geh bơta kwơ bè li la bơta kis, mơkung tơngguh tai jơnau tơl pràn gơdờp mờ tam gơl nhơm trồ tiah ai cau ùr jơi bơtiàn dồ êt nă cau mờ mpồl bơtiàn ƀòn lơgar in.

Tàm Dăk Lăk, ù tiah lam lơh tơrgùm tàm Brê dà lơgar Chư Yang Sin mờ ală tiah gùt dar brê do geh: Hoà Sơn, Cư Pui mờ Yang Mao. Kờp jơh priă dong kờl ờ tơm wơl rlau 21 tơmàn đong (ndrờm mờ 1 tơlak 100 rbô dolar Canada).

Rơndăp broă lơh wèt tus bơtàu tơngguh broă lơh broă sa bơh pơgăp 1 rbô 500 nă cau dờp kwơ tơn in mờ 6 rbô nă cau ờ dờp kwơ tơn in. Bơh ală broă lơh dong kờl bơta chài, rơndăp broă lơh rơ̆p dong kờl lơh jăt ală gùng dà broă rơndăp lơh kơnờm tàm brê bơnơm geh is gơ jăt bal mờ ring bal ùr klau, tơngguh uă pràn jak ătbồ, ngui kơnhăp jŏ phan kwơ geh is brê bơnơm geh is mờ tơngguh tai gơnoar broă, jơnau đơs bơh cau ùr jơi bơtiàn dồ êt nă cau dê tàm broă lơh ătbồ, sền gàr brê.

Đơs tàm dơ̆ sơnđờm lam lơh, ồng Nguyễn Thiên Văn, Phó Chủ tịch Anih duh broă Làng bol càr Dăk Lăk đơs là, Rơndăp broă lơh BLOOM geh kwơ ngan ngồn tàm bơta ƀòn lơgar gam lơh ngan prăp gàr li la bơta kis gơ jăt bal mờ bơtàu tơngguh broă lơh broă sa kơnhăp jŏ ai làng bol tiah làng bol jơi bơtiàn dồ êt nă cau in. Ồng sồr ală sờh, gah, gơnoar ătbồ ƀòn lơgar mờ ală mpồl lơh broă geh gơrềng pơgồp bal niam mờ ală cau dong kờl priă jền nàng lam lơh rơndăp broă lơh di jơnau kờñ, di tơngai, lơh geh cồng nha.

“Anih duh broă Làng bol càr Dăk Lăk hơ rơ̆p sùm sền gròi, sồr lơh jơh nùs jơh tồr ngan mờ ai tơl bơta niam ngan rlau jơh nàng ală đah lam lơh rơndăp broă lơh ƀươn ƀoài, nàng rơndăp broă lơh tus mờ mpồl bơtiàn; jơh nùs mblàng yal nàng làng bol in wờng, dồ nùs bal mờ rơcăng lài tus bal tàm ală gùng dà broă rơndăp lơh kơnờm tàm brê bơnơm geh is, kung bè bơtàu tơngguh ală broă lơh tơrlòng lài broă lơh broă sa kơnhăp jŏ; bơtàu tơngguh ală broă lơh tơrlòng lài pa; tơngguh uă gơnoar broă cau ùr dê tàm ală broă lơh lơh sa, prăp gàr li la bơta kis”.