Mpồl lơh broă lòt tus tơn nàng sền broă ai mẫu sinh phẩm, phan lơh broă, broă prăp gàr mẫu mờ prăp gàr sră nggal. Mờ iăt Mpồl Sồr lơh sồ 515 càr Gia Lai bal mờ ală mpồl lơh broă mìng geh do yal cồng nha lơh jăt kơnòl broă, ală bơta ƀuơn mờ bơta kal ke tàm broă lơh.

Ƀlàng tơ̆p ƀồc cau ling chơ̆t màng tàm Đức Cơ tŭ do là anih ơm rơlô bơh git nđờ rơbô nă cau ling chơ̆t màng, tàm hơ̆ gam uă bơto ƀồc ờ hềt git đal măt ha là ờ tơl jơnau yal tơngit. Broă tơrgùm mẫu sinh phẩm nàng mblàng ADN geh sền là gùng dà broă lơh kwơ màng nàng drơng tàm broă đal git măt ală cau ling chơ̆t màng. Bơh broă sền, Thiếu tướng ồng Lương Đình Chung dờp nùs nhơm lơh broă geh kơnòl bơh ală mpồl tus bal lơh jăt kơnòl broă, rơcang lài bơsong kal ke bè trồ tiah, ù tiah nàng gàr di tơngai geh ai bal mờ jơnau kờñ lơh broă. Ồng kung sồr kấp ủy, gơnoar atbồ tàm do, ală mpồl lơh broă ling klàng mờ mpồl lơh broă geh gơnoar tơnguh broă pơgồp bal sền wơl, tàm pơn drờm jơnau yal tơngit bơh uă gah yal tơngit, mờ lơh mhar broă mblàng yal, dờp jơnau yal tơngit bơh cau ling yau mờ làng bol nàng drơng tàm broă đal git măt cau ling chơ̆t màng.