Càr Dăk Lăk tŭ do geh rơlao 41 rơbô lồ ù tam tờm sầu riêng, tàm hơ̆ geh di pơgăp 30 rơbô lồ gam ai tơnhào, khà geh tàm kàl lơh sa nam 2026 kờp dŭ mờr 500 rơbô tấn. Mơya, gùt càr Dăk Lăk mìng rơ̆p geh 280 màh sồ tiah tam mờ di pơgăp 7 rơbô 500 lồ mờ 42 màh hìu dăp geh đah lơgar Lo kĭ dờp. Tŭ do gam 165 màh sồ tiah tam mờ 66 màh sồ anih ơn klơm neh lơh gơs sră nggal, mơya gam kơ̆p đah lơgar Lo sền wơl.

Tàm dơ̆ lơh broă mờ đơng lam bồ Bộ Broă lơh sa suơn sre mờ Tiah ơm kis, ồng Nguyễn Thiên Văn, Phó Chủ tịch Anih duh broă Làng bol càr Dăk Lăk dan: “Dan Ƀộ Broă lơh sa suơn sre mờ Tiah ơm kis bal mờ ală anih lơh broă gơrềng bal, tàm hơ̆ uă ngan là Bộ Cri bơyai broă mờ lơgar ndai, pơgồp bal lơh broă mờ đah lơgar Lo nàng gờñ kĭ ală pang sră màh sồ tiah tam neh lơh gơs, bơh tŭ hơ̆, rề ơnàng bă ù tam tơl bơta niam nàng tăc mờ lơgar bơdìh. Mờ ai tơl bơta niam nàng geh tai mpồl lơh sa kă bro tus bal bơcri priă lơh hìu dăp tàm càr”.

Bal mờ càr Dăk Lăk, ală càr Gia Lai, Lâm Đồng, Quảng Ngãi kung yal uă kal ke tŭ lơh jăt Jơnau lơh nền sồ 38 bơh Chính phủ dê bè màh tiah tam mờ anih ơn klơm. Ală càr do dan gờñ geh pơlam ring bal bè kơrnoăt jàu gơnoar ai tăc mờ lơgar bơdìh, mờkung lơh gơs ală anih atbồ jơnau yal tơngit tơnơ̆ tŭ jơnau lơh nền bơh Chính phủ dê geh ngui. Ồng Hà Ngọc Chiến, Lam bồ Chi cục Tam phan mờ Sền gàr phan tam càr Lâm Đồng geh jơnau đơs: “Tơnơ̆ mờ tŭ Jơnau lơh nền sồ 38 bơh Chính phủ dê geh ngui, dan gờñ geh pơlam ring bal bè ală anih atbồ nàng ală ƀòn lơgar in geh tơngu me lơh jăt. Di lah ờ hềt geh pơlam mùl màl den kal ke ngan nàng lơh jăt”.

Ồng Nguyễn Hoàng Hiệp, Thứ trưởng Ƀộ Broă lơh sa suơn sre mờ Tiah ơm kis pà git, Ƀộ do gam kơlôi sơnơng tam gơl Jơnau lơh nền sồ 38 bơh Chính phủ dê di jăt jơnau sồr bơh Thủ tướng Chính phủ dê jăt gùng dà rơcăng lài rơlao; mờ lơh mờ măi mok lơm jơh ală broă lơh ai màh sồ tiah tam mờ anih ơn klơm, tam gơl pràn bơh broă sền lài tus mờ broă sền tơnơ̆ nàng tơrmù sră nggal ai làng bol mờ mpồl lơh sa kă bro in.

Gơwèt mờ kàl tơnhào plai sầu riêng nam do, ală ƀộ, gah lơh broă tàm lơgar Việt Nam gam lơh broă mờ đah lơgar Lo nàng lơh pràn broă ai màh sồ tiah tam, anih ơn klơm in; mờ pơlam bơtàu tơnguh broă tăc plai sầu riêng mờ lơgar bơdìh neh lơh mrềt, rề ơnàng drà tăc mờ dong kờl càr Dăk Lăk lơh jăt broă lơh dờng 30 ngai lơh gơs jơnau yal tơngit tiah tam.

Mơya, gùng dà broă rơndăp lơh geh cồng nha nàng gah sầu riêng bơtàu tơnguh kơl jăp kung gam là bơ̆t bơtàu nùs nhơm pin dờn bơh drà kă bro dê mờ lơh sa geh kơnòl. Tơl phan geh lơh pal jòi gĭt geh tiah tờm lơh gơs, đal loh kơnòl bơh tơl nă cau tờm dê tàm ală broă lơh gơlik phan. Tŭ bơta niam geh gàr niam mờ song dơ pă loh làng, sầu riêng lơgar Việt Nam hơ̆ sồng rơhời bơ̆t bơtàu geh măt kă bro dà lơgar dê, rề ơnàng “gùng tơlir” mŭt tàm ală drà kă bro lơgar bơdìh mờ tơrmù broă kơnờm tàm mìng dùl drà kă bro. Ồng Nguyễn Hoàng Hiệp đơs loh: “Kờñ bơ̆t bơtàu nùs nhơm pin dờn bơh drà kă bro dê den ală phan ndrờm pal jòi gĭt geh anih tờm lơh gơlik, git phan geh bơh ñcau lơi lơh, ală broă lơh bè lơi mờ tŭ gơtìp tìs den pal git geh kơnòl. Tŭ ală anih jòi gĭt tiah tờm lơh gơlik geh lơh broă wil tơl, bol añ rơ̆p bal mờ ală ƀòn lơgar lơh jăt ndrờm bal broă do”.