Tàm nhơm trồ tiah duh tơr ồl ngan tiah nhàr lơgar dê, nùs nhơm lơh broă tàm Hìu bơsram ơm sa bĭc tơn ală kấp Ia R'vê, sàh Ia R'vê geh bơyai lơh gơ jal ngan. 45 nă kwang bàng, cau ling geh Gah đơng lam Mpồl ling klàng càr Dăk Lăk sơlơ tơnguh tai tam pà gơs uă mpồl, pơgồp bal mờ cau lơh phan dờp ală bơnah broă bơh broă bơt bơtàu, tri sơmang, lă găc tus broă lơh pơng gàr. Ală mpồl lơh broă geh rơndăp lơh jat dơ̆ lơh nàng kờñ tơn lơyah tŭ tơngai lơh sir broă lơh bơt bơtàu dê. Thượng úy ồng Nguyễn Bá Công, tus bal lơh Hìu bơsram ơm sa bĭc tơn ală kấp Ia R’vê, pà git:

 “Oh mi tàm gó lơh 2 mpồl, dùl mpồl bơ̆t kơlik hìu, tri kơlik hìu, lă găc; mpồl gam wơl tuh bê tông lơh bơnàng, lơh jrong kơlik hìu mờ lơh pơng gàr. Oh mi ai lơh broă jat 2 dơ̆: dơ̆ 1 bơh 6 jiơ drim tus 10 jiơ nggùl ơm rlô sa klo ngai; dơ̆ 2 sơnđờm lơh bơh 1 jiơ nggùl mho tus 4 jiơ nggùl mho.”

Hìu bơsram ơm să bĭc tơn ală kấp Ia R'vê kờp jơh khà priă bơcri lơh 185 tơmàn đong, geh mpồl cơldŭ bơsram, tiah ơm sa bĭc tơn, hìu sền sră, hìu tàp pràn să jan, tiah sră nggal mờ ală bơta phan bơna bơt bơtàu măi mok ring bal; mơkung lơh niam wơl bàr pe broă lơh bơt bơtàu gam geh bơh Hìu bơsram kấp 2 Nguyễn Thị Định. Ồng Nguyễn Quang Khánh, đơng lam dùl mpồl lơh broă, pà gĭt, ală cau dờp lơh broă gam tơrgùm lơh sir nàng di tŭ sền sơ wì, jàu di mờ broă rơndăp lơh.

“Pe kông ty bơt bơtàu tàm tiah lơh broă den geh 5 nơm sơndeh cŏ, di pal lơh bơta lơi den hòi tơn. Rơndeh jun pơndiang den geh rlau 20 nơm, geh rơndeh ben, rơndeh kẩu, rơndeh pơn ring; kờñ nàng bơt bơtàu là geh lài tơn. Bè cau lơh broă, gah kông ky añ geh pơgăp 30 nă cau lơh phan mờ kỹ sư; 2 nơm kông ty gam wơl mờ mpồl ling klàng den kờp jơh pal gơguh tus bơh 80 tus 90 nă cau. Jơh ală ndrờm ai jơh bơta pràn nàng mut lơh”.

Kal ke ngan rlau jơh tàm 3 rơndăp broă lơh Hìu bơsram ơm sa bĭc tơn ală kấp Ia Lốp dê là tài bơh tiah ơm ngài mờ anih tờm, ală bơta jun pơndiang phan bơna mờ lam lơh kal ke. Nàng dong kờl cau bơcri priă mờ ală cau dờp lơh broă in, càr Dăk Lăk neh ai rlau 60 nă kwang bàng, cau ling mpồl ling phàu crong tus bal mut lơh, pơgồp bơnah tơnguh mhar tŭ tơngai mut lơh tàm tiah lơh broă dê.

Jat mpồl lơh broă bơto pơlam jat sền, tŭ do tiah lơh broă hòi tơrgùm mờr 40 nơm phan ngui, măi mok bal mờ rlau 140 nă kỹ sư, cau lơh phan lơh broă sùm. Ồng Nguyễn Thế Quang, mpồl lơh broă jat sền broă lơh bơt bơtàu, pà gĭt, uă mpồl hìu neh lơh sir bơnah bơh sơn rờp mờ gam tam gơl tus tŭ tơngai lơh sir, crăp ală gùng che ồs đèng, dà mờ mpồng.

“Geh cau ling lơh bal dong kờl den tàng broă lơh bơt bơtàu neh lơh mhar geh tŭ tơngai mut lơh. Ală mpồl dờp lơh apah gŏ cau ling lơh niam ngan bè hơ̆ den tàng khi kung pal lơh ngan lơh jat bal, dilah ờ den rơ̆p lơyài tŭ tơngai mut lơh, roh mpồl broă. Ală cau dờp lơh broă gam pơn đơl pràn lơh ngan lơh mhar tŭ tơngai mut lơh nàng tàm jàu dùl hìu bơsram kấp 1 lài mờ ngai 31/7 do, ai nùs nhơm hơ̆ nàng pơn jờng, pơndờm pơnđiang lơh ală sèng hìu ndai bơsram mờ lơh jat”.

Jat broă rơndăp lơh tơngai bơh nam 2025-2027, Dăk Lăk lơh 4 nơm hìu bơsram ơm sa bĭc tơn ală kấp tàm tiah nhàr lơgar. Mìng is 3 nơm hìu bơsram Ia R'vê, Ia Lốp mờ Buôn Đôn pal lơh sir ală bơta nàng ai mut ngui mơ bơh nam bơsram 2026-2027.

Tàm càr Dăk Lăk, bulah kong gơrềng bơh trồ tiah, giă phan bơna mờ bơta ờ tơl cau lơh broă, ală cau dờp lơh broă kung gam gàr niam uă mpồl lơh broă, hòi jà uă ngan rlau jơh mpồl lơh broă, phan bơna măi mok mờ pơgồp bal mờ mpồl ling klàng nàng gàr niam tŭ tơngai mut lơh. Ồng Võ Văn Lợi, Phó Kwang lam bồ Mpồl Atbồ rơndăp broă lơh bơt bơtàu broă lơh drơng broă làng bol mờ lơh sa mờ măi mok càr Dăk Lăk, pà gĭt, ală broă lơh bơt bơtàu neh lơh geh rlau 80% mpồl broă; uă bơta broă mut tàm tơngai lơh sir, crăp phan bơna măi mok:

“Mpồl neh lam lơh broă rơndăp lơh 70 ngai mang, ai ală kwang bàng, kỹ sư ờs lơh broă tus lơh bal, sa bal, ơm bal nàng tă bơsong kal ke, kòl yal mờ pơndờm pơnđiang ală mpồl lơh broă mut lơh broă nàng gàr niam tŭ tơngai mut lơh jat jơnau sồr bơh Bộ Chính trị, kung bè bơh Tỉñ ủy càr, Mpồl duh broă Làng bol càr, Anih duh broă Làng bol càr dê. Kơ̆p kờñ là trồ tiah ƀuơn ngan, mìu càl rơbŭt dờng ờ hoan gơ rềng tus jơh ală hìu bơsram mờ rơ̆p lơh sir di mờ tŭ tơngai mut lơh, wă kơnòm bơsram sơnđờm mut bơsram nam bơsram pa 2026–2027.”

Mờ bơta mut lơh bal kràñ cê jơh nùs bơh jơh bal ală anih lơh broă chính trị, bơta lơh ngan bơh ală cau dờp lơh broă bal mờ bơta dong kờl jơh nùs bơh mpồl ling klàng dê, ală hìu bơsram tiah nhàr lơgar càr Dăk Lăk gam pah ngai geh lơh sir, cèng bal bơta kơ̆p gơn bè dùl tiah bơsram sră niam tre, geh tơl ală bơta rlau ai kơnòm bơsram tiah kal ke in. Dơ̆ ntoăt pơrlòng mờ tŭ tơngai pơrgon kung gam gơlik geh, nàng kờñ gàr niam ală broă lơh bơt bơtàu hìu bơsram gờñ lơh sir, pờ geh tŭ tơngai niam bơsram sră niam rlau tai ai oh kòn làng bol kòn cau tiah nhàr lơgar bơh Dà lơgar dê in.