Bơh àng drim gờñ, nùs nhơm lơh broă tàm Ƀlàng tơ̆p ƀồc cau ling Chơ̆t màng Đức Cơ neh jal mhar ngan. Ală mpồl lơh broă ling klàng, cau lơh sơnơm bal mờ gơnoar atbồ sàh pơgồp bal niam bơh broă tờ rồ, ai mẫu, cih sră, lơh jăt măi mok jơh ală jơnau yal tơngit tus mờ lơh gơs gam bè ờs bơtô ƀồc. Tơl broă lơh ndrờm geh lơh nền nòn, rơlĕ nàng gàr niam mẫu drơng tàm broă đal git ADN. Mờ rơlao 1 rơbô 500 bơtô ƀồc ờ hềt git đal, Ƀlàng tơ̆p ƀồc Cau ling chơ̆t màng Đức Cơ là tiah geh khà broă lơh dờng ngan càr Gia Lai dê. Ƀăk sìh Nguyễn Thị Thu Hà, lơh broă tàm Anih tờm Lơh sơnơm sàh Đức Cơ pà git, gơwèt mờ uă kwang bàng lơh sơnơm, do là dơ̆ sơnrờp lơh jăt broă lơh kwơ màng do. “Dơ̆ sơnrờp lòt ai mẫu tŭ lài ngan kung gơrơm să sơl, mơya tơnơ̆ mờ hơ̆ kung jơh gơrờm sơl mờ hơ̆ sồng mờng tơn. Tàm do lơh broă den geh tŭ trồ tơngai, geh tŭ trồ mìu, oh mi lơh ngan bơsong. Mpồl Đơng lam ling klàng sàh kung ai tơl bơta niam, geh sàl nàng oh mi in lơh broă sơl”.

Ờ mìng mpồl lơh sơnơm, uă cau ling làng bol sàh kung dơ̆ sơnrờp tus bal lơh kơnòl broă kwơ màng do. Bơh Ƀlàng tơ̆p ƀồc Cau ling chơ̆t màng Đức Cơ tàm tiah đah măt tơngai mŭt tus mờ ală ƀlàng tơ̆p ƀồc cau ling chơ̆t màng đah măt tơngai Lik càr Gia Lai, ală cau ling gam kơnòm să ndrờm geh dùl nùs nhơm lơh ngan: lơh jơh pràn bơh să tờm dê nàng pơgồp bal tàm broă ai ală cau ling chơ̆t màng rê wơl mờ măt sơnđan bal mờ hìu nhă tơnơ̆ mờ uă jơ̆t nam. Bi Đặng Hoàng Bửu, Lam bồ Mpồl ling klàng Làng bol duh broă sùm sàh Bình Hiệp ngoh rơngăc pà git: “Broă do añ ờ hềt tŭ lơi, bŭ lah trồ tơngai duh mơya oh mi kung gam lơh ngan nàng ală wa gờñ rê mờ hìu nhă. Tŭ cèng ală wa guh, jăt tơngai ală ntìng neh ờ gam bè ờs tai, ală cau ngoh rơngăc ngan. Bŭ lah bè hơ̆, ală cau lơh ngan rơlao tai nàng jòi sơlơ uă phan lời wơl nàng drơng tàm broă đal git ADN in”.

Gơwèt mờ bi Ngô Đại Phát, cau ling klàng làng bol sàh Bình Hiệp yal, kơnòl broă do gam là dơ̆ nàng rơnàng cau deh tàm rài ring lơngai ai tơngŏ nùs nhơm git ưn ngài mờ broă lơh mùl màl. Ală ngai lơh broă tàm trồ tiah tơngai duh mờ jŏ, jơh ală cau tàm mpồl sùm pơlam bal sền gàr bơta pràn kơl dang să jan, gàr tơl pràn nàng lơh gơs kơnòl broă. “Bol añ là rơnàng kơnòm să, geh deh tàm bơta ring lơngai, gŏ gơlơh pơnyờ să ngan tŭ lơh kơnòl broă nàng dong kờl ală wa jòi gŏ cau pròc mhàm tơl jơh. Bol añ sùm rơcang lài lơh ngan jơh pràn nàng lơh gơs niam ngan”.

Tơnơ̆ mờ tơngai bơsram tàp ờ jŏ tơngai, uă điều dưỡng neh mờng lài mờ broă kham, sơm kòp pah ngai, tŭ do gơs cau tàm mpồl ai mẫu ADN tàm ƀlàng tơ̆p ƀồc cau ling chơ̆t màng. Bi Nguyễn Trái Đắng, lơh broă tàm Anih tờm Lơh sơnơm sơnah ƀòn Quy Nhơn, tus bal mờ mpồl ai mẫu tàm Ƀlàng tơ̆p ƀồc cau ling chơ̆t màng Mỹ Thắng, sàh Phù Mỹ Đông pà git, tơnơ̆ mờ uă jơ̆t nam, bơnah uă ƀồc ntìng neh ồm, geh ntìng neh mờr gơs ù. Den tàng, broă rơwah mẫu pal lơh jăt nền nòn jăt jơnau geh ai lơh nàng tơnguh uă bơta niam rơcah ADN geh cồng nha. “Di lah geh sŏ den bơta geh là 100%, di lah ờ den bơyai lơh wèt tus mờ ală ntìng bè ntìng jơng, ntìng pơnô; sề den geh tòm sề mờ jơng sề tơl. Di lah ală bơta ntìng hơ̆ ờ geh den bơyai lơh ai ală bơta ntìng ndai. Ai mẫu geh cồng nha den chờ hờp ngan nàng git ưn ngài ală cau khin cha jăk chài chơ̆t phi să nàng dà lơgar he geh ring lơngai bè tŭ do”.

Broă lơh dờng 500 ngai mang ai mẫu ADN đal git măt ƀồc ntìng cau ling chơ̆t màng gam ge lơh dơ̆ lĕ bal tàm ală ƀlàng tơ̆p ƀồc cau ling chơ̆t màng tàm càr Gia Lai dê. Tàm bơta trồ tiah tơngai duh ha là trồ mìu, git nđờ rơhiang nă kwang bàng, cau ling, cau lơh sơnơm mờ mpồl cau tàm ală ƀòn kung gam lơh ngan tờ tơl bơtô ƀồc. Đại tá ồng Phạm Văn Đạt, Phó Chính ủy Gah Đơng lam Ling klàng càr Gia Lai pà git, jơnau kờñ kơnòl broă ờ mìng lơh gơs di tơngai geh ai mờ gam gàr niam bơta di uă ngan, jơnau kờñ là jòi geh wơl măt sơnđan ală cau khin cha jăk chài, cau ling chơ̆t màng in. “Bŭ lah do là kơnòl ờ hềt geh tŭ lơh, kơnòl broă pa ngan, krơi is ngan, kal ke ngan mơya kwang bàng, cau ling, cau lơh broă bơh ală mpồl lơh jăt kơnòl tus tơn ai mẫu ƀồc ntìng cau ling chơ̆t màng tàm ală ƀlàng tơ̆p ƀồc tơnguh nùs nhơm geh kơnòl, lơh mờ nùs nhơm geh kơnòl uă ngan mờ di jăt tơngai geh ai. Mpồl lơh broă kung sùm tus còp să, pơlam ală mpồl lơh kơnòl broă tàm ală ƀlàng tơ̆p ƀồc in nàng di tŭ pơn jờng oh mi tàm broă lơh jăt kơnòl”.

“Broă lơh dờng 500 ngai mang” ai tơngŏ broă lơh ngan bơh Đảng, Dà lơgar, Ling klàng bal mờ jơh mpồl lơh broă chính trị dê tàm broă lơh jăt kơnòl broă gơwèt mờ ală cau neh phi jơh să jan bal mờ rài kis nàng Dà lơgar in. Tơl mẫu ADN geh ai tŭ do là geh tai dùl nùs nhơm kơ̆p gơn nàng dùl hìu nhă tơn jơh nùs nhơm kơ̆p gơn neh git nđờ jơ̆t nam; tơl ntìng ƀồc geh đal git là geh tai dùl nă kòn bơnus dà lơgar dê geh rê mờ hìu nhă, ƀòn lơgar.

Gơwèt mờ càr Gia Lai, do là ù tiah neh geh tŭ là tiah tam lơh cui rơcai ngan, do là tiah git nđờ rơbô botô ƀồc cau ling chơ̆t màng ờ hềt git đal, ală kấp, ală gah lơh broă, mpồl ling bal mờ gơnoar atbồ càr gam lơh ngan pah ngai, pah tŭ nàng lơh gơs kơnòl broă kwơ màng do. Hơ̆ ờ mìng là jơnau sồr bơh “Broă lơh dờng 500 ngai mang” dê, mờ gam là broă pơn jăt tai bơhiàn “Hùc dà kah tô dà”, là jơnau ưn ngài mờ broă lơh bơh rơnàng tŭ do dê gơwèt mờ ală cau neh phi să tài lơngăp lơngai is, khăt gơboh is Dà lơgar in.