Gơl gùng Yên Ninh jòng pơgăp 100 thơk, gơ wèt ală mpồl làng bol tiah drà sồ 8, 9, 10 bơh sơnah ƀòn Yên Ninh, ƀòn dờng Yên Bái dê geh tus gĭt nđờ jơ̆t anih lơh broă, hìu lơh broă mờ hìu bơsram. Tiah do pah tŭ tus bồ giơ drim, lồi jiơ klo ngai, mho sùm gơtìp kòl gùng uă ngan, lơh tìs kềng gùng lơngăp lơngai lòt rê mờ neh geh tŭ gơlik geh rềs àr gùng lòt tàm do. Jăt bơh lùp sền, sền swì broă ngan ngồn tàm tiah do, kwang àng sơnah ƀòn Yên Ninh, ƀòn dờng Yên Bái neh geh jơnau đơs mờ kâp ủy, gơnoar ătbồ tiah do lơh broă lơh tơrlòng lài “Mpồl sền gàr is bè lòt rê rơndăp tăp sèng tàm mpồng hìu bơsram Kâp dùl mờ Kâp bàr Yên Ninh”, bal mờ cau tus bal, geh: ling klàng làng bol sền gàr is, sền gàr làng bol tiah drà, sền gàr hìu bơsram mờ tàm hơ̆, mpồl kwang àng là mpồl cau tờm. Trung tá ồng Phạm Việt Đức, Phó Kwang ătbồ Kwang àng sơnah ƀòn Yên Ninh, ƀòn dờng Yên Bái, pà gĭt: Mpồl sền gàr is geh 8 nă cau. Pah ngai rơ̆p sơnđờm lơh broă tàm tiah mpồng hìu bơsram lài mờ tơngai ală sau mŭt bơsram pơgăp 1 jiơ mờ lài mờ tơngai ală sau lik bơsram 1 jiơ, tài bơh do là pơgăp tŭ tơngai mè bèp lòt jun lòt rò gal, mơkung là tŭ ală sau lik bơsram dồ ròt bal bơh hìu bơsram lik là tơngai kòl gùng, pơhìn lơh roh bơta lơngăp lơngai uă ngan rlau jơh.

Hìu bơsram Kâp bàr Quang Trung ơm tàm gơl gùng Quang Trung, ƀòn dờng Yên Bái geh rlau 1 rbô 400 nă kơnòm bơsram. Bulah mpồng hìu bơsram ơm tơn kềng măt gùng, mơya ală ơdŭ bơsram gơ ơm wơl tàm dồ nơm kơh 10% jòng pơgăp 70 thơk. Pah ngai, pah tŭ tus jiơ lik bơsram, gĭt nđờ rbô nă kơnòm bơsram ur ur tai bơh kơh mù mờ đah đơm là gĭt nđờ rhiang nă mè bèp kơnòm bơsram gam ơm kơ̆p, bal mờ khà rơndeh rơndồ lòt rê tàm gơl gùng do den tàng sùm gơtìp kòl gùng uă ngan.

Nàng sền gàr niam lơngăp lơngai lòt rê tàm gùng, bơdìh mờ mblàng yal ală mè bèp kơnòm bơsram in, mblàng yal kơnòm bơsram in mờ ai kơnòm bơsram mờ cau pơgru in kĭ hơ sền gàr niam lơngăp lơngai lòt rê tàm gùng bơh bồ nam bơsram, pah ngai hìu bơsram jàu Mpồl Kwang ătbồ Hìu bơsram pơgồp bal mờ cau lơh broă drơng gak sùm 2 ƀùi sền gàr niam lơngăp lơngai lòt rê tàm mpồng hìu bơsram. Ùr pơrgu Nguyễn Thị Thúy Nga, Phó Kwang ătbồ Hìu bơsram pà gĭt: Hìu bơsram neh lơh jăt tam pà gùng ai kơnòm bơsram in lòt guh, lòt mù tàm mpồng hìu bơsram jăt 2 bơnah gùng, dùl  là ai kơnòm bơsram lòt jơng in, bàr là lời ai kơnòm bơsram in tề rơndeh mờ sồr mè bèp, kơnòm bơsram jun, rò kòn den ơm ngài mờ mpồng hìu bơsram 20 thơk. Lơh jăt sền gàr niam lơngăp lơngai lòt rê tàm gùng tàm mpồng, ƀùi drim geh Mpồl Kwang ătbồ hìu bơsram, cau pơgru, cau sền gàr mờ kơnòm bơsram ơdŭ drơng broă poh; klo ngai geh Mpồl Kwang ătbồ hìu bơsram, cau pơgru, cau sền gàr nàng lam kơnòm bơsram lòt pơrgan gùng jăt gah gùng đah ma, mờ tŭ lik bơsram den kơnòm bơsram rê jơh, tŭ hơ̆ ală pơgru hơ̆ sồng geh rê.

Ală mpồl sền gàr is bè lơngăp lơngai lòt rê tàm gùng lơh broă jơh nùs neh pơgồp bơnah dong yờ tơngguh uă bơta gĭt wă bơh mè bèp kơnòm bơsram, cau bơsram dờng dê tàm broă lơh jăt Adăt Lơngăp lơngai lòt rê tàm gùng, dong ală oh iang nùs rlau pah tŭ lòt bơsram, tơrmù ƀà bơta kòl gùng uă tàm ală tŭ jiơ geh uă cau lòt rê. Oh Bùi Lương Nguyên, kơnòm bơsram Hìu bơsram Kâp bàr Yên Ninh, ƀòn dờng Yên Bái yal: Tàm hìu bơsram bol oh kung geh bơto sơl bè lơngăp lơngai lòt rê bè lòt rơndeh den pal ndau sơgơn gàr bồ, bal mờ uă jơnau sồr ndai mờ bol oh kung lơh jăt niam sơl. Tŭ lòt bơsram, oh gŏ ală pơgru, ală wa, ală mơi mờ ală wa kwang àng pơlam den oh kung gŏ mpồng hìu bơsram rơđàih rlau, bol oh kung iang nùs rlau sơl.

Tàm ƀòn dờng Yên Bái tŭ do geh 35 hìu bơsram, mờ rlau 22 rbô nă kơnòm bơsram, tàm khà hơ̆ geh uă hìu bơsram gùng lik mŭt hat hal ngan, gùng kơh uă…Tài bè hơ̆, gah Bơto bơtê ƀòn dờng Yên Bái sùm geh sră sồr lơh, sồr ngan ală hìu bơsram pal sơlơ tơngguh tai sền gàr niam lơngăp lơngai rơndăp tăp sèng, lơngăp lơngai lòt rê ai kơnòm bơsram in. Ồng Hà Yên Thái, Phó Kwang ătbồ Cơldŭ Bơto bơtê mờ Bơsram ƀòn dờng Yên Bái, càr Yên Bái, pà gĭt: Cơldŭ Bơto bơtê mờ Bơsram ƀòn dờng sùm pơgồp bal niam ngan mờ Mpồl Lơngăp lơngai lòt rê càr dê nàng mblàng yal Adăt lòt rê ai kơnòm bơsram in; Sồr ală hìu bơsram tàm jiơ uă cau lòt rê geh pơgru, kơnòm bơsram tàm mpồl bồng bi pơrhê ơm ntàu tàm ală mpồng hìu bơsram sền gàr tam pà gùng, tơngkah kơnòm bơsram lik mŭt tàm mpồng hìu bơsram, ngan là tàm ală mpồng hìu bơsram geh gùng kơh uă sồr kơnòm bơsram pal tề rơndeh guh mù, bulah rơndeh coh halà rơndeh coh đèng.

Jăt tơrgùm kờp, bơh bồ nam 2023- 2024 tus tŭ do ờ hềt geh dơ̆ rềs àr gùng lòt lơi kơn jơ̆ gơlik geh tàm tiah mpồng hìu bơsram tàm ƀòn dờng Yên Bái. Mơya tềng đăp bơta rơndeh rơndồ cau dồ nă să is dê geh uă mhar ngan, ngan là rơndeh ô tô, tàm tŭ gùng lòt tàm uă tiah mpồng hìu bơsram ờ hềt lơh geh jơnau kờñ ngan ngồn, kung gam sơl bơta kơnòm bơsram lơh tìs Adăt Lơngăp lơngai lòt rê, den tàng bè hơ̆ bơdìh mờ bơta lơh ngan bơh hìu bơsram, ală mpồl lơh broă geh gơnoar dê, tơl nă mè bèp kơnòm bơsram dê kung kờñ pal yờ tơngguh uă bơta gĭt wă lơh jăt Adăt Lơngăp lơngai lòt rê; sùm sền gròi, tơngkah oh kòn he dê lơh jăt di ală jơnau sồr bè lơngăp lơngai lòt rê, nàng kờñ tơrmù uă ngan rlau jơh ală rềs àr digơlan gơlik geh.