Bal mờ ală broă gơrềng tus bơtàu tơnguh lơh sa mpồl bơtiàn, lơngăp lơngai dà lơgar bơh càr dê, broă bè bơta niam bơto bơtê mờ bơsram bal mờ tam cah is kơnòm bơsram tơnơ̆ mờ jơh bơsram kấp 2 geh ală cau ala măt đơs tus uă ngan.

Tềng đăp mờ bơta mùl màl, cồng nha pơrlòng mŭt ơdŭ 10, nam bơsram 2024-2025 tàm càr Dăk Lăk gơmù ngan, uă cau ala măt pà git cau tĕ khà tơlik nùs nhơm kơlôi rơcang ngan bè broă bơto bơtê mờ bơsram tŭ do. Bal mờ hơ̆, broă tam cah is kơnòm bơsram tơnơ̆ mờ tŭ neh jơh bơsram kấp 2 jăt rơndăp broă “Bơto bơtê mờ bơsram jăt broă lơh bal mờ gùng dà tam cah is kơnòm bơsram tàm broă bơto 3 kấp tơngai bơh nam 2018 tus 2025” tàm càr gam uă bơta kal ke. Tàm dơ̆ cri bơyai, ală cau ala măt Mpồl duh broă làng bol càr Dăk Lăk kung pơgồp bal uă jơnau đơs, jơnau dan geh broă lơh nàng tơnguh uă bơta niam broă bơto bơtê mờ bơsram bơh càr dê tàm tơngai tus. Tàm hơ̆ uă ngan là broă dong kờl kơnòm bơsram tàm tiah gơtìp kal ke, tiah jơi bơtiàn ờ gal cau in.