Tus tŭ do, broă ai càn priă cíñ sác neh lam lơh tus jơh ală xã tiah sar lơgar ngài gùt càr Gia Lai. Kờp jơh khà priă ai càn dong kờl priă cồng mờr 16 rbô 500 tơmàn đông, mờ rlau 500 rbô dơ̆ hìu bơnhă rƀah, hìu bơnhă ndrờm bè cau rƀah mờ ală cau geh sră dong kờl bơh dà lơgar ndai geh càn priă. 

Tàm khà do, cau jơi bơtiàn dồ êt nă cau geh mờr nggùl. Bơh hơ̆, khà hìu bơnhă rƀah bơh càr Gia Lai dê neh gơmù uă ngan bơh rlau 23% tàm nam 2014 gơmù gam rlau 8% bè tŭ do. Priă càn ală broă lơh ai càn priă cíñ sách pơgồp bơnah uă ngan lam lơh ală broă lơh jơnau kờñ dà lơgar bè tơrmù rƀah kơ̆ kơljap jŏ jòng sùm, bơt bơtàu ƀòn lơgar pa; bơtàu tơnguh lơh sa – mpồl bơtiàn tiah jơi bơtiàn dồ êt nă cau mờ tiah kơh bơnơm tàm càr Gia Lai.