Tàm dơ̆ tìp măt cau tĕ khà xã Dơng K’Nơh, kơnhoàl Lạc Dương, càr Lâm Đồng, cau tĕ khà dan mờ Dà lơgar pal mhar lơh sir gơl gùng Trường Sơn Đông, gùng càr 722 lòt gan xã nàng lơh pràn tàm tơrbŏ gùng lòt rê rề ơnàng kă bro phan, bơcri lơh phan bơna, ngan là ală gùng che đèng 3 dang ai tơl drơng lơh sa mờ rài kis in, ai tơl bơta lơh sa- mpồl bơtiàn in bơtàu tơngguh…Cau tĕ khà tiah do is ồn sền gròi tus broă lơh ătbồ sền gàr brê mờ ală broă dong kờl dờp kwơ tơn bơh brê nàng kờñ tơngguh uă priă lơh geh, kơ̆ kơl jăp rài kis. Cau tĕ khà yal, broă dong kờl tă tơm priă drơng broă tiah brê neh lam lơh tàm uă nam do, bulah bè hơ̆ tài bơh ù tiah xã ờ geh broă bơ̆t bơtàu hìu măy lơh đèng dà den tàng khà priă làng bol dờp kwơ bơh broă dong kờl do dê êt rlau pơndrờm mờ uă tiah ndai. Cau tĕ khà là bi Bon Niêng Oanh ơm tàm thôn 1, xã Dơng K’Nơh, kơnhoàl Lạc Dương dan, Dà lơgar pal sền swì nàng geh bơta ndrờm bal, dipal rlau tàm broă tă tơm priă dờp jàu ătbồ sền gàr brê, geh bè hơ̆ den làng bol hơ̆ sồng đềt mềr mờ brê hơ̆ sồng kơ̆ kơl jăp broă lơh broă sa mờ rài kis. Bi Bon Niêng Oanh, đơs: Broă tă tơm priă drơng tiah brê den xã bol hi dờp kwơ dồ êt ngan pơndrờm mờ ală xã ndai, gơ nđàc sơngĭt ngan. Tàm tŭ hơ̆, uă ngan làng bol tiah ndo ndrờm kơnờm tàm broă lơh ătbồ sền gàr brê den tàng tìp uă ngan kal ke. Bol hi kơ̆p kờñ pal tam gơl wơl giă tă tơm priă drơng broă tiah brê.

Đơs tàm dơ̆ tìp măt, ồng Phan Đình Trạc, Kwang bàng Ƀộ Cíñ trị, Ƀí thư Đảng Dà lơgar, Kwang ătbồ Mpồl lơh Broă cíñ trị dơlam lơgar Dà lơgar dê đơs là, jơnau đơs bơh cau tĕ khà dê là dipal ngan. Mpồl cau ala măt Quôk hội càr Lâm Đồng rơ̆p sồr ală anih lơh broă, mpồl lơh broă geh gơrềng sền swì, bơsong, mơkung kơlôi sơnơng tai ală broă lơh nàng gàr niam broă lơh broă sa kơ̆ kơl jăp ai làng bol kis kơnờm tàm brê in. Ồng Phan Đình Trạc, đơs: Tiah lơi gàr geh brê niam mờ ờ geh ală broă bơ̆t bơtàu lơh đèng dà, drơng broă ờ kas priă den làng bol mus kơl brê rơ̆p lơh gơbàn hoàc hươr rlau halà tơngguh priă tă tơm priă drơng broă tiah brê ờ huan hoàc hươr rlau taih? Broă do, bol he pal kờp dŭ nàng jơnau kơ̆p kờñ dŭt ndơl là sền gàr geh tiah ơm kis. Is ồn, pal geh bơto pơlam lơh bè lơi jòi geh ală tờm chi lơh sơnơm kwơ tềng hơđơm mƀur brê, nàng làng bol in ătbồ sền gàr brê, tam brê, pik tơnhàu tờm chi lơh sơnơm nàng bơtàu tơngguh rài kis. Jăt añ đơs den mìng geh broă lơh hơ̆ den hơ̆ sồng gàr geh brê mờ tơngguh uă priă lơh geh.

Tàm dơ̆ tìp măt cau tĕ khà xã Ka Đơn, kơnhoàl Đơn Dương, cau tĕ khà tơnggŏ bơta dồ nùs bal, pin dờn mờ jờng rơ ngan cồng nha lơh jăt broă lơh rơcăng lài dră wơl sa kwề sa kwà, is ồn là jơh nùs lơh ngan uă tàm lơh jăt tơrmù mpồl lơh broă bơh Đảng, Dà lơgar dê. Mờ cau tĕ khà kung đơs mờ Mpồl cau ala măt Quôk hội càr Lâm Đồng uă broă ờ hềt dipal gơlik geh tàm tŭ lam lơh jăt Adăt Ù tiah, Adăt Mpồl lơh broă bal, broă ai apah, lơh nền giă ù gơ wèt mờ ală tiah lơh broă. Cau tĕ khà pơn jăt tai sồr pal sền gròi bơcri priă, lơh ơnàng wơl ală gùng lòt rê tàm sươn sre, rbàng ngui tàm rài kis làng bol dê, lơh bươn soh ală sră pơ àr, bơta pal geh lơh jăt tơn jơh hìu ing, hìu ồm sèt ñhăt dà mìu, ai lài priă càn drơng lơh sa…Pal sền ngăc, cau tĕ khà yal gam geh sơl jơnau dồ bơnah kwang bàng, kông cứk lơh pơn jê pơn sồt, sră pơ àr gơnoar ătbồ rơ̆ ru, kal ke, pà sră dờp gơnoar ngui ù gam lơh gơbàn uă jơnau lơngah lơngañ, lơh làng bol lòt rê wih wơl uă dơ̆.

Jăt ồng Phan Đình Trạc, Kwang bàng Ƀộ Cíñ trị, Ƀí thư Đảng Dà lơgar, Kwang ătbồ Mpồl Broă cíñ trị dơlam lơgar Dà lơgar dê, do là ală broă gơ rềp mềl ngan mờ rài kis, gơrềng tơn tus lơh broă lơh sa mờ rài kis làng bol dê, kờñ pal geh ală gah, ală kâp sền gròi bơsong. Tàm hơ̆, pin geh bơta ờ niam tàm bơsong sră pơ àr gơnoar ătbồ, lơh pơn jê pơn sồt làng bol, pal geh lùp khàu lơh loh mờ lơh glài kràñ. Ồng Phan Đình Trạc, sồr: Sră nggal dồ mpồng den jàu wih jàu wơl uă ngan dơ̆, hơ̆ sồng lơh gơtìp cau gĭt jơnau yal tơnggĭt sră nggal cau pơyua dê, ờ yal ai cau pơyua sră nggal in mờ yal bơh cau lơh kòn gùng, cau tàm tơrbŏ. Tơnggŏ loh bè bơta jak tàm broă lơh, kơnòl mờ làng bol halà bơh ngkời hơ̆ geh bơta lơi ờ niam ờ? Tŭ do, Tổng Ƀí thư ồng Tô Lâm uă dơ̆ đơs sùm, mờ bol he jơh nùs lơh nganb lơh dồ dơ̆ tam gơl bơta yau gơs bơta pa bè mpồl lơh broă bơh jơh gùt lơgar dê, tơrmù mpồl lơh broă, tơngguh uă cồng nha mpồl kwang bàng kông cưk, mờ bol he lời bè do là ờ lơh jăt jơnau sồr rao. Añ sồr bol he pal lơh loh broă do, dilah geh bơta ờ niam den bơsong tus jơh tơn mờ yal wơl ai làng bol cau tĕ khà tàm do in.