Tàm càr Phú Yên, uă nam do, Mpồl cau ùr càr sùm sền gròi lam lơh ală broă lơh, broă lơh nàng kờñ dong kờl, lòt bal mờ cau ùr jơi bơtiàn dồ ết nă cau bơt bơtàu hìu bơnhă hờn chờ; dong oh mi geh tai bơta gơn kơnờm, ală bơta nàng khin cha tus bal ală broă lơh mpồl bơtiàn, tơnguh uă gơnoar mờ jơnau đơs tàm mpồl bơtiàn.

Bơh bồ nam tus tŭ do, Mpồl Tam klăc cau ùr càr Phú Yên pơgồp bal mờ ală kấp, mpồl sơlơ tơnguh tai broă lơh mblàng yal, lam lơh uă broă lơh nàng kờñ lơh jat geh cồng nha rơndăp broă lơh sồ 8- lơh jat ring bal ùr klau mờ bơsong ală broă jal mhar gơwèt mờ cau ùr mờ kơnòm dềt tiah làng bol jơi bơtiàn dồ ết nă cau. Mpồl Tam klac cau ùr càr Phú Yên neh bơyai lơh tơlik mat 63 mpồl mblàng yal jơnau mpồl bơtiàn. Tơl mpồl geh 10 nă cau geh Ƀí thư Ci ƀộ, Kwang atbồ thôn, kwang atbồ mpồl cau ùr, kwang atbồ Mpồl Lơh broă Mặt trận mờ ală mpồl cau tàm tiah do dê.

Pah nhai, Mpồl mblàng yal jơnau mpồl bơtiàn bơyai lơh ết ngan rlau jơh 1 broă lơh mblàng yal jơnau, lơh li la uă broă lơh mblàng yal, rơ wah ală broă lơh mblàng yal di pal mờ tơl nă cau tus bal. Mpồl mblàng yal mpồl bơtiàn sùm tus tơl nơm hìu làng bol nàng kờp sền mờ sền gĭt bơta kơ̆p kờñ bơh làng bol dê. Tơnơ̆ hơ̆, tàm bơrlŭ bal tơngume mblàng yal pơgồp bal mờ bơsong ală bơta kòl yan, kal ke bơh làng bol dê tàm ală dơ̆ pơrjum thôn. Bơdìh mờ ală tơngume bè hòi jà, bơto pơlam làng bol in bơtàu tơnguh lơh broă sa, mpồl mblàng yal jơnau mpồl bơtiàn gam sền gròi tus kơnòm dềt, pleh lơh pờng hìu bơnhă mờ bau gờñ; broă sang tĕ bơhiàn yau bơr ngơl gơla duh khoai tŭgơtìp kòp jê mờ mblàng yal làng bol in pal tus tàm hìu sơnơm nàng kham mờ sơm kòp. Oh  Hồ Ngọc Kim Linh, ơm tàm xã Sơn Hội (kơnhoà Sơn Hòa) pà gĭt: “Oh kờñ tus bal Mpồl mblàng yal jơnau do nàng gĭt wă uă rlau tai mờ pleh mờ bơta lơh tìs. Gơ rơ̆p cèng wơl ală bơta kwơ ai rài kis mờ rơ̆p ai să tờm oh in wă wờng rlau tai, ai oh in gĭt bơta lơi di mờ bơta lơi tìs”.

Jat mò Hà Thị Thìn, Củ tịc Mpồl tam klăc cau ùr xã Ea Trol (kơnhoàl Sông Hinh), tàm broă lơh ngan kơryan bơta bau gờñ đơs is, rcang lài kơryan bĭc bài aniai lơh pờng kơnòm dềt đơs bal, Mpồl Cau ùr xã bal mờ ală mpồl, gah broă, mpồl cau neh lòt tus tơn tàm ală thôn, ƀòn nàng mblàng yal pah nhai, pah qúy: “Tơnơ̆ tŭ dờp geh sră nggal bơh Dà lơgar dê kung bè càr, kơnhoàl, den Mpồl cau ùr kung neh geh broă rơndăp lơh. Tơnơ̆ hơ̆ là lam lơh broă rơndăp lơh tus ală thôn, ƀòn gơwèt rơndăp broă lơh sồ 8 den añ rơ̆p đơs tus adat tus tàm thôn, ƀòn nàng mblàng yal tơl thôn in kung bè tơlik mat ală bơta lơh jat ring bal ùr klau den he geh tơlik mat broă lơh là đơs ờ mờ bau gờñ lơh jat 5 ờ tàm bơrlŭ bal tàm lơh jat 3 sàng goh. Pah qúy pah nhai añ kung pơrjum cau ùr den añ mblàng yal tơn sùm lơh jat ring bal ùr klau”.

Mò Nguyễn Thị Phương Liên, Phó Củ tịc Mpồl tam klăc cau ùr càr Phú Yên, pà gĭt, Mpồl tam klăc cau ùr càr Phú Yên neh pơgồp bal mờ Sở Lơh broă, Cau ling sồt să mờ Mpồl bơtiàn càr pờ bàr pe ơdŭ tề lam nàng kờñ tơnguh uă bơta pràn jak ai kwang bàng kấp kơnhoàl, xã in bè mờng chài bơsong ală broă geh gơrềng tus lơh pờng hìu bơnhă, bĭc bài aniai cau ùr mờ kơnòm dềt tiah làng bol jơi bơtiàn dồ ết nă cau mờ tiah kơh bơnơm.

 Mpồl tam klăc cau ùr càr Phú Yên kung sồr ală kấp mpồl cau ùr ƀòn lơgar rề ơnàng ală broă lơh, broă lơh geh cồng nha kung bè broă lơh, broă lam lơh ală broă lơh mờ ngui niam ală broă lơh Mpồl mblàng yal jơnau mpồl bơtiàn gơwèt Rơndăp broă lơh sồ 8 dê: “Mờ broă jàu là tus nam 2025 den rơ̆p tơlik mat geh 63 mpồl den tŭ do neh tơlik  mat geh 45 mpồl mờ 430 nă cau tàm mpồl tus bal. Ală mpồl do neh geh Mpồl cau ùr tề lam bè ală bơta gĭt wă mờ bơta chài mblàng yal jơnau ai ală cau tàm mpồl in”.

Broă lam lơh rơndăp broă lơh sồ 8 là ală bơta ƀuơn nàng Mpồl cau ùr ală kấp mờ ală gah broă geh gơrềng, gơnoar atbồ ală tiah sơlơ tơnguh tai sền gròi cau ùr mờ kơnòm dềt làng bol jơi bơtiàn dồ ết nă cau in, là ală cau kong sươ̆i siar; sơlơ tơnguh tai gơnoar niam brồ guh, đơs nền gơnoar broă cau tờm cau ùr, kơnòm dềt dê tàm broă bơt bơtàu mờ bơtàu tơnguh mpồl bơtiàn, pơgồp bơnah bơt bơtàu càr Phú Yên bơtàu tơnguh kơ̆ kơl jăp.