Bal mờ bơta sền gròi bơh gơnoar ătbồ mờ ală cau geh nùs nhơm niam dê, nùs nhơm Trung thu ram mhŭ gam lơh gơrề tus ală kơnòm dềt tàm ală ƀòn lơgar tàm càr Dăk Lăk dê. Tàm nùs nhơm Trung thu, kơnòm dềt càr Dăk Lăk geh ală broă lơh loh làng tàm sơm băt tê bal, kah hờ ală bơyô dềt tàm tiah mìu càl rbŭt dờng dà kŏ dà cò lơh aniai.

Tàm ƀòn dờng Buôn Ma Thuột, bàr pe hìu bơsram kâp dùl neh ơm ờ lơh tai sa tềp Trung thu, lời priă jền nàng blơi sră bơto bơsram, sră cih pơyua ală bơyô dềt ală càr tiah đah Tô dà lơgar in. Broă hòi jà dong kờl làng bol gam kong gơrềng tài bơh trồ tiah lơh aniai kung lơh gơrề uă tàm ală hìu bơsram. Ală bơnah phan pà, bơta tă pơgồp bơh ală kơnòm dềt càr Dăk Lăk dê bulah ờ uă mơya tơnggŏ bơta tam pà bal, tàm sơm băt tê bal kah tus ală bơyô tiah mìu càl rbŭt dờng dà kŏ dà cò lơh aniai. Do kung là broă lơh geh kwơ, bơto bơtê ală oh nùs nhơm tam klăc, bơhiàn ờs mờng bơh yau “nha ngan glòm nha sèt” niam bơnĕ bơh jơi bơtiàn he dê.