Ơdŭ bơsram “Tin học Cơl dŭ lơh broă ờ sa priă jơh tơn” geh sơn đờm mŭt lơh bơh nhai 03 nam 2024 mờ lơh broă tàm ală mang ngai dơ̆ Poh, 30 nă cau bơsram bơh ƀòn Ia Lang, sơnah ƀòn Chi Lăng tus bơsram sùm. Ồng Puih Chyh, 60 sơnam, cau bơsram dờng sơnam ngai tàm ơdŭ pà git: “Tus bal ơdŭ bơsram nàng git bè phan lơh broă tàm măi mok pa, nàng git wă rơlao tai bè mpồl bơtiàn tŭ do. Gŏ cau pơgru jơh nùs ngam tàm broă bơto, añ chờ hờp ngan”.

Gơwèt mờ uă anih lơh broă, mpồl lơh broă, cau dùl nă să, bơta chài măi mok pà là bơta mờng ngan, gơlơh bè ờ tŭ lơi ờ geh tàm rài kis mờ lơh broă, mơya mờ làng bol kis tàm ƀòn Ia Lang dê, do là bơta krơi is ngan. Mơya kung tài bè hơ̆, den tàng ơdŭ bơsram do geh bơyai lơh niam bơnĕ ngan. Jơh ală cau bơsram dờng sơnam mờ ală bơyô pa tào ndrờm chờ hờp kờñ bơsram. Oh H’ Kriêng, 14 sơnam, dùl nă cau bơsram gam kơnòm să ngan tàm ơdŭ tơlik nùs nhơm chờ hờp bè do: “Oh ưn ngài ală cau pơgru tài neh jơh nùs bơto bol oh, tài do là dơ̆ sơnrờp geh bơsram tin họk den tàng gam uă bơta is rơmis ngan, tŭ tus bal bơsram geh ală cau pơgru bơto uă ngan bơh tàm broă cih jơnau tàm Word, sòl ơn pang rùp bal mờ ală broă lơh kờp tàm Excel. Oh ưn ngài pơgru uă ngan tài sùm bơto sồr nền nòn ngan, kơnờm mờ hơ̆ den tàng bol oh geh wă mờ mhar rơlao ală broă lơh tàm măi vi tíñ. Oh dan pơyoa jơnau ưn ngài cau pơgru uă ngan”.

Broă bơsram geh bal ală jơnau git wă tờm ngan bè tin học cơl dŭ lơh broă bè broă cih jơnau tàm Word, broă kờp tàm Excel, broă sòl pang rùp tàm PowerPoint, broă crăp phần mềm tờm ngan mờ git bơsong ală bơta gơlik geh tàm măi vi tíñ. Hìu bơsram kấp pe Chi Lăng neh ai 03 nă cau pơgru bơto gah tin họk bal mờ 30 nơm măi vi tíñ nàng ai geh bơta niam ngan ală cau bơsram in. Pơgru Đồng Ánh Dương, do là cau pơgru tus bal bơto tơn pà git: “Ơdŭ bơsram geh uă jơnau lùp niam ngan. Hìu bơsram neh ai 30 nơm măi vi tíñ mờ ai 03 nă cau pơgru nàng bơto mờ dong kờl. Bol añ neh rơwah ală cau bơsram geh jơnrơ ngan tus bal dơ̆ pơrlòng ai sră dờp tin họk cơl dŭ lơh broă ală lơgar”.

Tơnơ̆ mờ dùl tơngai tus bal bơsram, ơdŭ bơsram neh tơn jơh tơngai bơsram tàm bồ nhai 10. Cồng nha geh 30 nă cau tus bơsram neh gơtùi cih is jơnau mờ ngui ală bơta ƀuơn tờm ngan tàm internet. Lŏ H’ Tinh, Ƀí thư Ci ƀộ mờ kung là kwang atbồ thôn Ia Lang, là dùl tàm ală cau bơsram jăk ngan tàm ơdŭ yal, kờp dŭ rơ̆p pơn jăt tai bơsram nàng geh sră dờp tin họk dờng rơlao.

Lŏ H’ Tinh pà git: “Ƀòn Ia Lang neh geh 12 nă cau bơsram dờp geh sră dờp jơh bơsram, tàm hơ̆ geh 05 nă cau bơsram jăk ngan. Tus do Hìu bơsram kấp pe Chi Lăng rơ̆p ai tai nàng cau bơsram geh bơsram ơdŭ tin họk cơl dŭ lơh broă geh sră dờp dờng rơlao. Añ rơ̆p pơn jăt tai lam làng bol tus bal tơl. Ưn ngài Dà lơgar neh geh broă lơh nàng dong kờl ƀòn Ia Lang, do là tiah làng bol gam gơtìp uă bơta kal ke, git tàm broă ngui jơnau yal tơngit rài pa”.

Jăt mò Hồ Thị Ngọc Huyền, Ƀí thư Đảng ủy sơnah ƀòn Chi Lăng yal, bal mờ gùt càr, sơnah ƀòn Chi Lăng gam lơh pràn broă lơh jăt broă tam gơl sồ dà lơgar. Broă pờ geh ală ơdŭ bơto bè bơta chài măi mok pa ờ sa priă geh kwơ màng ngan mùl màl, dong kờl tơnguh jơnau git wă bơh làng bol in. Bơh tŭ hơ̆ pơgồp bal tàm broă bơ̆t bơtàu bơta niam chài sồ, mpồl bơtiàn sồ geh cồng nha. “Bol añ kờñ rơhời dong kờl làng bol, tàm hơ̆ uă ngan là làng bol jơi bơtiàn ờ gal cau, bơtàu tơnguh bơta niam chài sồ. Bơh tŭ hơ̆, ală làng bol git nàng rơcang ngui internet, ngui ală broă lơh drơng ala sồ bè broă lơh sră nggal tàm internet, broă lơh sơnơm sồ, internet mpồl bơtiàn. Jơnau kờñ là ngui bơta chài măi mok pa tàm ală broă lơh tàm rài kis mpồl bơtiàn, wèt tus tam gơl sồ jăt broă lơh kwơ màng dà lơgar dê bè bơtàu tơnguh lơh sa sồ mờ mpồl bơtiàn sồ bơh Thủ tướng Cíñ phủ dê neh sồr”.