Củ tịc lơgar ồng Tô Lâm pa tìp mat mpồl ala mat cau kơ đơng yàng, ală mpồl jat yàng. Dơ̆ tìp mat geh bơta tus bal bơh ală kwang đơng lam bồ, cau kơ đơng yàng bơh 45 mpồl jat yàng gơ wèt 16 gah jat yàng neh geh Đảng, Dà lơgar dờp. Tàm dơ̆ tìp mat, Củ tịc lơgar ồng Tô Lâm pơyua tus jơh gùt mpồl bơtiàn, cau kơ đơng yàng, làng bol jat yàng gùt lơgar jơnau lùp còp đềt mềr, niam ngan bơh Tổng Ƀí thư ồng Nguyễn Phú Trọng dê. Mờ kung pơyua tus ală cau kơ đơng yàng, cau ala mat ală mpồl jat yàng jơnau nting bơr pràn kơldang, chờ hờp, bal mờ gơp brồ guh tàm gùng lòt bal mờ jơi bơtiàn. Củ tịc lơgar kơp kờñ, ală cau kơ đơng yàng pơn jat tai ai tơnggŏ niam rlau tai gơnoar broă là rbàng tơrbŏ kuơmàng đah Đảng, Dà lơgar tus làng bol jat yàng; hòi jà làng bol jat yàng tàm lơgar mờ bơdìh lơgar, tam klac bal mờ làng bol gùt lơgar jơh nùs lơh jat ală srơh tàm pơrlòng kờñ gơboh dà lơgar, bơtàu tơnguh lơh sa – niam chài – mpồl bơtiàn, sền gàr dà lơgar, sền gàr lơngăp lơngai, lơh broă mờ lơgar ndai; lơh krơh lài lơh jat gùng dà, broă lơh bơh Đảng mờ bơta dong kờl, adat boh lam bơh dà lơgar dê; lam lơh niam gơnoar broă, kơnòl broă bơh làng bol dê, lơh jat gùng dà jat yàng đềr mềr mờ jơi bơtiàn.