Đơs tàm dơ̆ tìp mat, ala mat kwang đơng lam bồ Đảng, Dà lơgar, Củ tịc lơgar ồng Tô Lâm pơyoa jơnau lùp còp, jơnau hờn chờ niam bơnĕ ngan, gờm chờ pràn kơl dang să jan bơh Tổng Ƀí thư ồng Nguyễn Phú Trọng dê tus mờ ală ơruh pơnu lam lài lài do. Củ tịc lơgar pơyoa jơnau hờn chờ tus mờ Ơruh pơnu lam lài lài do, jơh bal mờ ală cau tàm mpồl tàm gùt lơgar sùm kis hờn chờ, pràn kơl dang, pơn jat tai lơh gơrề uă nùs nhơm “ơruh pơnu lam lài” tàm broă lơh bơt bơtàu Dà lơgar Việt Nam kờñ gơboh.

Tŭ do, jơh gùt lơgar geh pơgap 650 nă ơruh pơnu lam lài lài do neh tus bal ală dơ̆ tam lơh tài lơngăp lơngai jơi bơtiàn dê. Tơngai pa do, Mpồl neh bơyai lơh uă broă lơh geh ngan nàng dong kờl ai ală Ơruh pơnu lam lài lài do in. Tàm hơ̆, neh hòi jà cau tàm mpồl mờ mpồl bơtiàn jàu pà rlau 1 rơbô nơm hìu bơta nđàc, lơh niam wơl 509 nơm hìu ơm; hòi jà pà phan mờ ală phan bơna ndai bè sră tềm pềr, rơndeh coh, phan sa, ào soh, phan ngui bơsram sră ai kơnòm bơsram in kờp priă rlau 269 tơmàn đong.

Di dơ̆ Mpồl rcang ai Pơrjum dờng cau ala mat gùt lơgar Mpồl Ơruh pơnu lam lài lài do Việt Nam dơ̆ 5, tơngai lơh broă bơh nam 2024-2029, Củ tịc lơgar kơ̆p kờñ là ală cau tàm mpồl cih kah mờ pơnđơl pràn lơh ngan ai jơh bơta pràn he dê lơh jat jơnau nting tơngkah bơh Wa Hồ dê : “Gơwèt mờ ală cau neh khin cha phi dùl bơnah mhàm ntìng bơh he  dê”, Đảng, Cíñ phủ mờ làng bol pal jòi broă dong kờl ai khi in tiah sa sào, tiah ơm lơngăp lơngai, mơkung pờ ơdŭ bơto broă ai tơl nă cau in nàng gơtùi hời rơ hời lơh tờm is rài kis he dê”. Củ tịc lơgar ồng Tô Lâm, đơs: “Gĭt loh jơnau bơto bơh Wa Hồ dê, cau ling mờ kwang bàng geh pơlam tàp ală nùs nhơm niam, bè: Jơh nùs lơh ngan, khin cha jak chài, jơh nùs lơh ờ gŏ rơngòt bòl glar, geh tề lam nùs nhơm lơh broă, nùs nhơm duh rơngòt kơrnoat boh lam bơh làng bol song dơ pă đơs lah mờ kwang bàng tam gơl geh nùs nhơm ờ niam bè pơn hừ să sền ờ sơ̆p jơnau sồr, sa kuề sa kuà, pơhì pơhà; tàm hìu bơsram hơ̆ sơndồi đơs tê lơh, jơnau tàm sră pơ àr gơ jat bal mờ lơh broă ngan ngồn, lơh ai kwang bàng in geh bồ tơngoh sơlơ gĭt loh rlau tai, nùs nhơm sơlơ kơ̆, gùng dà broă lơh sơlơh ai làng bol lơh tờm. Ală hìu bơsram hơ̆ pơlam tàp jài mờ lòng kwang bàng jài”.

Củ tịc lơgar kơ̆p kờñ ală Cau tàm mpồl neh pơn đơl pràn lơh ngan rau den pơn đơl pràn lơh ngan rlau tai, neh jơh nùs lơh ngan rau den kung jơh nùs lơh ngan uă rlau tai, mờ uă broă lơh geh ngan rlau nàng gờñ bơsong ală broă gam ờ niam tàm broă lơh gơwèt mờ Ơruh pơnu lam lài lài do dê, sền hơ̆ là broă lơh, là kơnòl, nùs nhơm, tơngŏ nùs nhơm gĭt ưn ngài, kah kơlôi uă ngan rlau jơh gơwèt mờ ală cau tă pơgồp dà kơl hề, phi să ai broă lơh tơngklàs jơi bơtiàn, tơrgùm dùl Dà lơgar, bơt bơtàu mờ sền gàr Dà lơgar. Củ tịc lơgar ồng Tô Lâm, đơs wih đơs wơl:“Ală ƀộ, mpồl lơh broă, gah broă, ngan là Đoàn ơruh pơnu Kộng sản Hồ Chí Minh pơn jat tai kơlôi sơnơng, geh jơnau đơs mut lơh bơceh lơh bồ tơngoh Hồ Chí Minh bè hìu bơsram dờng bơh ơruh pơnu lam lài dê, bơt bơtàu mpồl kwang bàng, bơt bơtàu rơnàng ơruh pơnu Việt Nam bềng nùs nhơm kờñ gơboh Dà lơgar, pơn đơl pràn lơh is, pơn yờ să jơi bơtiàn geh nùs nhơm khin cha cíñ trị kơ̆ kơl jăp, geh nùs nhơm kăc màng sàng goh, geh bơta pràn jak, geh nùs nhơm khin cha mut gơrờm bal dunia, geh bơta kơ̆p kờñ dờng, lam lài bơceh lơh lơh tờm bơta chài măi mok pa ngan ndrờm pal mờ tàm tơngai pa, crăp rcang tă pơgồp dà kơl hề, phi să, să tờm mut lơh tơn, ngan ngồn gơ gơs bơta pràn dờng màng bơh broă lơh bơt bơtàu mờ sền gàr Dà lơgar dê”.

Củ tịc lơgar kung sồr pơn jat tai tơrgùm, tam klăc bal bơt bơtàu Mpồl mờ mpồl ơruh pơnu lam lài lài do tàm jơh gùt lơgar pràn kơl dang, kơ̆ kơl jăp; tus bal jơh nùs, geh cồng nha tàm tam gơl pa, bơt bơtàu Dà lơgar. Mơkung sền gròi sền gŏ, bơt bơtàu, lơh niam wơl, lơh pa ală ù tiah kah yau, ală tiah tềl lời wơl kah yau bè ơruh pơnu lam lài, ngan ngồn gơ gơs “tiah tam lơh lài do”, bơto bơtê bơhiàn kăc màng.

Tŭ do Mpồl Ơruh pơnu lam lài lài do Dà lơgar gam lam lơh dùl dơ̆ hòi jà mờ 2 srơh dờng, geh hòi “Ơruh pơnu lam lài lài do lơh krơh niam lơh jat bồ tơngoh, nùs nhơm, rài kis mờ broă lơh Hồ Chí Minh dê”; srơh “Ơruh pơnu lam lài lài do lơh sa jak tài nùs nhơm cau ling bal “, srơh “Tài nùs nhơm cau ling bal, tơl nă kwang bàng, cau tàm mpồl lơh uă broă niam”. 74 nam do ală rơnàng Ơruh pơnu lam lài neh tă pơgồp dà kơl hề, phi să, lơh duh hồl bơhiàn dờng màng bơh Ơruh pơnu lam lài mờ ală rơnàng Việt Nam dê; dong kờl is lơh khat dùl broă lơh lơi, lòt khat tàm tiah lơi tŭ Dà lơgar sồr; kis tài nùs nhơm cau ling bal dê.