Bè dùl dơ̆ pơrjum tàm ală dơ̆ pơrjum bơh Quôk hội dê sơl, ală “Kwang bàng Quôk hội kơnòm dềt” bal mờ ală “Kwang bàng Cíñ phủ kơnòm dềt” neh geh dơ̆ cribơyai, lùp mờ hơ lơh loh broă lơh dong kờl, sền gàr ai kơnòm dềt in, bè: Rơcăng, sơndră rềs àr sồt să, lơh pờng, sơgràm aniai kơnòm dềt; Sền gàr kơnòm dềt tàm yal tơngĭt jơnau niam bơnĕ, bơceh lơh tàm anih internet.

Đơs tàm dơ̆ pơrjum ai lơh pơnyơu Quôk hội kơnòm dềt dơ̆ I, Củ tịc Quôk hội ồng Vương Đình Huệ đơs nền: Đảng, Dà lơgar mờ jơh gùt mpồl bơtiàn sùm lời ai bơta dong kờl, sền gròi uă ngan ai kơnòm dềt in. Nàng pơn jăt tai lơh jăt niam rlau tai broă lơh sền gàr, dong kờl, bơto bơtê kơnòm dềt, Củ tịc Quôk hội sồr ală kâp ủy Đảng, gơnoar ătbồ pơn jăt tai kơlôi sơnơng jrô gùng dà broă lơh bơh Đảng dê, broă dong kờl mờ adat boh lam Dà lơgar dê bè broă sền gàr, dong kờl, bơto bơtê kơnòm dềt. Ală broă dong kờl, adăt boh lam bè sền gròi, dong kờl, bơto bơtê kơnòm dềt, bè rơcăng sơndră lơh pờng, sơgràm aniai, rềs àr sồt să kơnòm dềt neh geh ai lơh jăt wil tơl đau, dùl ròt bal, neh cèng wơl ală cồng nha uă ngan tàm rài kis ngan ngồn.