Đơs gĭt wă loh bồ tơngoh tam gơl pa ală broă lơh adăt boh lam gơ jăt bal mờ broă lơh jăt adăt boh lam, Củ tịc Quôk hội ồng Trần Thanh Mẫn đơs niam ală anih lơh broă Cíñ phủ, Quôk hội mờ ală anih lơh broă geh gơrềng neh sơrbăc mhar rơcăng, dong Cíñ phủ pơgồp bal mờ Anih duh broă Lơh kơnòl broă sùm Quôk hội dê di tŭ bơyai lơh Pơrjum bơsram mờ lam lơh jăt ală adăt, jơnau lơh nền tàm pơrjum geh Quôk hội ring bal tàm Dơ̆ pơrjum dơ̆ 08, Quôk hội khoă XV, nàng gờñ ai ală adăt, jơnau lơh nền tàm pơrjum geh Quôk hội ring bal mŭt tàm rài kis. Củ tịc Quôk hội ồng Trần Thanh Mẫn đơs sùm: “Anih duh broă Lơh kơnòl broă sùm Quôk hội đơs niam ngan Thủ tướng Cíñ phủ neh sơrbăc mhar geh Jơnau lơh nền ai lơh jăt  măt broă mờ jàu broă anih lơh broă cih sră nggal cih nền cê gơ wèt mờ jơh ală adăt, jơnau lơh nền tàm pơrjum geh Quôk hội ring bal tàm Dơ̆ pơrjum dơ̆ 8. Tài bơh bơnah tơnggume, sră nggal cih nền cê kờñ pal geh ai lơh jăt uă ir, mìng is gơ wèt mờ 18 adăt, Cíñ phủ, ală Ƀộ pal ai lơh jăt 127 sră nggal, bàr pe adăt, jơnau lơh nền tàm pơrjum geh ai ngui lơh jăt tơn bơh bồ nam 2025, sồr tơl Ƀộ, anih lơh broă geh jàu đơng lam cih pal jăt nền jơnau sồr tàm Jơnau lơh nền bơh Thủ tướng Cíñ phủ dê, tơrgùm sồr lơh nàng lơh, ai lơh jăt sră nggal di tơngai, pal lơh geh bơta niam”.

Dơ̆ pơrjum dơ̆ 08, Quôk hội khoă XV neh ring bal bơnah uă adăt, jơnau lơh nền tàm pơrjum geh 18 adăt, 4 jơnau lơh nền tàm pơrjum jơnau pal jăt adăt boh lam dê mờ 17 jơnau lơh nền tàm pơrjum đơng lam lơh sa, mpồl bơtiàn mờ bơta dồ nùs bal, ring bal uă bơh ală cau ala măt Quôk hội dê. Tàm hơ̆, uă adăt, jơnau lơh nền tàm pơrjum gơrềng tus ală broă kwơmàng bơh rài kis mpồl bơtiàn dê, bè: Bơcri priă; priă jền, kes priă, dia; sền gàr rài kis mpồl bơtiàn; sền gàr dà lơgar, lơngăp lơngai. Jăt Thủ tướng ồng Phạm Minh Chính đơs, cồng nha hơ̆ neh tơnggŏ bơta jơh nùs lơh uă, lơh ngan uă, lơh broă kràñ cê jơh nùs, di broă, di anih bơh Quốc hội, Cíñ phủ, ală anih lơh broă, mpồl lơh broă geh gơrềng dê tàm broă lơh, lơh gơs adăt boh lam, bơta tus bal bơh làng bol, cau tĕ khà, mpồl lơh sa kă bro dê; pơn jăt tai đơs nền bơta pơgồp bal ngai sơlơ geh cồng nha, kơ̆ kơl jăp đah Quôk hội, Cíñ phủ. Thủ tướng ồng Phạm Minh Chính, đơs: “Bơta geh ngan tàm rài kis tơnggŏ loh làng pa do ală broă dong kờl neh rơhời mŭt tàm rài kis mờ lơh jăt geh cồng nha sùm sùm là dùl bơta gơ lòng dờng. Tơnơ̆ tŭ dơ̆ pơrjum tơn jơh tơn, bol hi neh ai lơh jăt tơn broă rơndăp lơh mờ pa do neh ai lơh jăt jơnau sồr lơh nàng rơcăng ai dơ̆ pơrjum mờr tus in. Mờr tus, dồ ròt ală broă pal yal mờ Quôk hội in bol hi neh rơcăng jơh rao, pơnyơu bè, Adăt Rơndăp broă Cíñ phủ, Adăt Rơndăp broă gơnoar ătbồ ƀòn lơgar, Adăt Ai lơh jăt ală sră nggal jơnau pal jăt adăt boh lam dê, hơ̆ là ală adăt tờm ngan nàng bol he in lam lơh broă tàm tơngai tus”.

Thủ tướng ồng Phạm Minh Chính pà gĭt, bơnah broă pal lơh tŭ tơngai tus là uă ngan, Cíñ phủ, Thủ tướng Cíñ phủ, ală anih lơh broă geh kơnòl broă ai lơh jăt 130 sră nggal bal mờ 569 tơngume jàu cih nền cê. Broă lam lơh ală adăt, jơnau lơh nền tàm pơrjum geh Quôk hội ring bal tàm Dơ̆ pơrjum dơ̆ 08 gơ sồr bơta tơrgùm, lơh ngan, jơh nùs uă ngan bơh ală ƀộ, gah, ală tiah dê.

Bè tơngguh uă cồng nha broă lơh pơgồp bal tàm lam lơh jăt adăt boh lam, Thủ tướng sồr: Ală anih lơh broă bơh Quôk hội, cau ala măt Quôk hội dê pal pơn jăt tai pơgồp kơ̆ kơl jăp mờ Cíñ phủ, ƀộ, gah bơh tơngai sơnrờp tơn tàm broă lơh lơh adăt boh lam, pal gàr geh bơta gơtùi lơh jăt bơh ală jơnau cih dê tàm ală rơndăp broă lơh adăt, jơnau lơh nền tàm pơrjum, ai tơl bơta ƀươn ai broă lơh jăt in tơnơ̆ tŭ geh ring bal. Thủ tướng ồng Phạm Minh Chính đơs sùm: “Đảng neh sồr lơh, Cíñ phủ neh ring bal, Quôk hội neh dồ nùs bal, làng bol kờñ bal, Dà lơgar kơ̆p gơn, bol he pal mờ gơ̆p gờñ ai ală adăt, jơnau lơh nền tàm pơrjum mŭt tàm rài kis, lơh geh jơnau kơ̆p gờn bơh cau tĕ khà mờ Làng bol dê, pơgồp bơnah bơ̆t bơtàu dùl Dà lơgar gơnoar adăt boh lam xã hội củ nghĩa kơnhăp pràn, ai dà lơgar kơ̆ kơljăp cơnđoà mŭt tàm Rài pa- Rài bơtàu tơngguh pas pràn, jak chài mờ bơtàu tơngguh sùm bơh jơi bơtiàn he dê”.