Bơh bồ nam 2022 tus tŭ do, ƀòn dờng Pleiku neh pờ geh 5 ơdŭ tơn jơh bơta ờ gĭt sră ai làng bol jơi bơtiàn dồ êt nă cau in bal mờ mờr 100 nă cau bơsram tàm ală sàh Biển Hồ, Chư Á, Gào mờ sơnah ƀòn Chi Lăng. Pơnrơ bè ơdŭ bơto tơn jơh bơta ờ gĭt sră tàm Hìu bơsram Kâp dùl Lê Lai sàh Chư Á, geh rlau 30 nă làng bol ƀòn Bông Phun mờ Mơ Nú. Ơdŭ bơsram neh geh lơh sùm bơh ngai dơ̆ 2 tus ngai dơ̆ 6 pah poh, tŭ do neh mờr tơn jơh. Digơlan ală cau bơsram rơ̆p dờp sră cơng tàng tàm bồ nam 2025 do. Bi H’Then, 30 sơnam, ơm tàm ƀòn Mơ Nú, sàh Chư Á mŭt bal ơdŭ bơsram ngoh rơngăc ngan yal: “Ngai lài ờ hềt gĭt sră lik bơh ƀòn gơ là ƀàs sìl, ờ khin ngan, gơlơh ơm is tài bơh he ờ gĭt sră den tàng gŏ gơlơh kal ke ngan. Lòt bơsram gĭt sră, gĭt sền gĭt cih ờ gam gŏ ƀàs sìl, ờ khin tŭ lik lòt tàm gùng tai”.

Ồng Nguyễn Đình Thức, Lam bồ Cơldŭ Bơto mờ Bơsram ƀòn dờng Pleiku, càr Gia Lai pà gĭt, ală ơdŭ bơto tơn jơh bơta ờ gĭt sră neh dong cau bơsram gĭt sền, gĭt cih, gĭt kờp dŭ mờ gĭt geh ală jơnau gĭt wă kờñ pal geh bè bơta geh is, mpồl bơtiàn nàng jăt ngui tàm rài kis lơh broă lơh sa. Ồng Nguyễn Đình Thức, đơs: “Cơldŭ bơto mờ bơsram neh lam ală mpồl lòt lùp tơl anih hìu bơsram bè cồng nha bơsram ală bơta: Toán, Dà Yoan geh ală bơta pơlam kờp; iăt kơno tơn cau bơsram sền, cau pơgru sền ai kơnòm bơsram in cih jơnau; hơ̆ sồng kơnòm bơsram pờ tê đơs ală jơnau kơlôi jơnau gŏ he dê bơh lài mờ tơnơ̆ tŭ lòt bơsram sir ơdŭ bơsram den bè lơi. Bơh lùp gĭt bal den cau bơsram lơh geh cồng nha jăt jơnau sồr, bơta kơlôi sơnơng jơnau kơ̆p kờñ khi dê den kung chờ hờp chờ hờn ngan, gĭt sền, gĭt cih nàng bơh hơ̆ geh bơta sền gròi rlau ai rài kis in”.

Gơ wèt mờ tiah nhàr lơgar bè kơnhoàl Đức Cơ, càr Gia Lai tơngai bơh nam 2022 tus nam 2025, kơnhoàl pờ 20 ơdŭ bơto tơn jơh bơta ờ gĭt sră bal mờ rlau 600 nă cau bơsram. Tàm ală ơdŭ bơsram tàm tiah nhàr lơgar, ală pơgru neh sơrlèt rlau uă kal ke nàng dong cau bơsram. Ồng Lê Phú Huy, Phó Lam bồ Cơldŭ Bơto mờ Bơsram kơnhoàl Đức Cơ pà gĭt tai: “Bơh ơdŭ bơsram tơn jơh bơta ờ gĭt sră kung neh cèng wơl cồng nha sơl, uă bơta gơdờp niam ngan nàng tơngguh uă khà cau gĭt sră tàm sơnam bơh 15 tus 60 nàng lơh geh tŭ niam ai làng bol tiah làng bol jơi bơtiàn dồ êt nă cau in geh tơngguh uă bồ tơnggoh gĭt wă. Cơldŭ neh sồr pơgru tam gơl pa broă bơto bơsram ai gơ in dipal mờ cau dờng sơnam. Lam lơh sră ngui bơsram, ală phan ngui sền gŏ ngan ngồn tơn mờ măt rềp mềl nàng dipal mờ bơta lơh sa kung bè bơtàu tơngguh lơh sa- mpồl bơtiàn làng bol dê, bơrkuăt bal kơnòl bơh kwang bàng ătbồ, cau pơgru dê tàm broă lơh hòi jà cau bơsram lòt bơsram bơh tơl thôn ƀòn dê”.

Is ồn, broă lơh tơn jơh bơta ờ gĭt sră gam geh bơta tus bal jơh nùs ngan bơh mpồl ling sền gàr tiah nhàr lơgar càr Gia Lai dê. Tàm mpồl làng bol ơm kis Suối Khôn, sàh Ia Mơ, kơnhoàl Chư Prông, là tiah geh 70 nă cau ờ gĭt sră, Pôs đồng ling sền gàr tiah nhàr lơgar Ia Lốp neh pờ geh 2 ơdŭ bơsram bơh gùl nam 2023 tus tŭ do. Đại úy Nguyễn Văn Luân, Lam bồ Mpồl hòi jà làng bol, Pôs đồng ling sền gàr tiah nhàr lơgar Ia Lốp dê, pà gĭt: “Tŭ pờ ơdŭ bơsram geh uă ngan mè bèp geh oh geh kòn kung lòt bơsram bal mờ mè bèp. Nàng kơ̆ kơl jăp ơdŭ bơsram mờ lơh geh cồng nha uă ngan rlau jơh den bol hi rơndăp ală tiah nhơl chờ hờp nàng ală oh in tus bal nhơl chờ hờp, đah dơlam mè bèp ală sau rơ̆p tus bal bơsram niam rlau”.

Jăt Sở Bơto mờ Bơsram càr Gia Lai dê, jơh gùt càr geh pơgăp 60 rbô nă cau ờ gĭt sră tàm sơnam bơh 15 tus 60, geh tus 5,6% khà kờp làng bol, mìng là cau ùr jơi bơtiàn dồ êt nă cau lơm. Pơndrờm mờ gùt lơgar, Gia Lai geh khà cau ờ gĭt sră uă ngan. Lơh jăt Broă lơh Jơnau kờñ dà lơgar dê bơtàu tơngguh lơh sa- mpồl bơtiàn tiah làng bol jơi bơtiàn dồ êt nă cau mờ tiah kơh bơnơm tơngai bơh nam 2021- 2025, Gia Lai neh pờ 735 ơdŭ bơto tơn jơh bơta ờ git sră ai mờr 23 rbô 500 nă cau in. Ồng Lê Duy Định, Kwang lam bồ Sở Bơto mờ Bơsram càr Gia Lai yal, tŭ do jơh gùt càr geh 15 tàm 18 mpồl lơh broă kâp kơnhoàl lơh geh tơl broă jàu tơn jơh bơta ờ gĭt sră khà 2, lơh geh jơnau kờñ tơngai dơ̆ dùl bè bơto bơtơl tơn jơh bơta ờ gĭt sră jăt Ală jơnau neh lơh nền “Bơ̆t bơtàu mpồl bơtiàn bơsram tơngai bơh nam 2021- 2030” bơh càr dê: “Bơh broă lam lơh bơto tơn jơh bơta ờ gĭt sră ai làng bol jơi bơtiàn dồ êt nă cau in bơh sơnam 15 rlau hơđang, tàm bơta mùl màl broă lơh neh cèng wơl uă bơta kwơ ai làng bol in. Tàm tơngai tus, Sở Bơto mờ Bơsram pơn jăt tai sồr ală anih bơto ơsram mờ ală tiah lơh jăt broă lơh bơto tơn jơh bơta ờ gĭt sră pal ngăc ngar rlau nàng ai tơl bơta ƀươn ƀoài ngan rlau jơh dong làng bol geh lòt bơsram wil tơl mờ jơh nùs jơh tồr.

Mờ bơta lơh ngan bơh ală kâp gơnoar ătbồ, pơgru mờ bơta dong kờl bơh mpồl ling sền gàr tiah nhàr lơgar, càr Gia Lai gam jơh nùs lơh ngan lơh jăt gơtùi broă tơn jơh bơta ờ gĭt sră, pơgồp bơnah bơtàu tơngguh bơta niam rài kis, niam chài bơh làng bol dê, bơtàu tơngguh lơh sa- mpồl bơtiàn, is ồn là tàm tiah jơi bơtiàn dồ êt nă cau.