Jơnau sồr cih: Gàr niam kơ̆ kơl jăp gàr tơl năng lượng dà lơgar, ai tơl đèng là dùl tàm ală jơnau tờm ngan gơtùi tơngguh mhar tam gơl pràn bơh rài lơh sa dê mờ lơh nền broă lơh lơh sa mờ măy mŏk, măy mŏk lơh jơh lơm dà lơgar dê tàm tơngai tus. Jăt hơ̆, jơnau kờñ gơguh lơh sa jơh gùt lơgar dê nam 2025 pơnđơl lơh geh rlau khà 8% mờ gơguh lơh sa tơngai bơh nam 2026- 2030 pơnđơl ơm tàm khà 2 khà, gơ sồr đèng ngui gơguh tus 1,5 dơ̆, digơlan kờp bal pah nam bơh 12% tus rlau 16%.

Nàng rơcăng lài ală broă lơh bơh gờñ, bơh ngài, gàr niam ngan ờ lời ờ tơl đèng tàm khăt jơnau gơlik geh lơi, Thủ tướng sồr ală tiah, mpồl lơh broă tơrgùm lơh jăt kơnòl broă ai tơl đèng drơng bơtàu tơngguh lơh sa- mpồl bơtiàn tơngai bơh nam 2025- 2030 in, gàr niam tơl năng lượng dà lơgar tàm rài pa, sền do là kơnòl broă cíñ trị kwơmàng ngan. Tơrgùm kờp sền nền, kơlôi sơnơng tam gơl Rơndăp ù tiah đèng VIII nàng di tŭ bơtơl ală jơnau sồr, jơnau kờñ jŏ jòng pa bè bơtàu tơngguh lơh sa- mpồl bơtiàn; cih, bơtơl ală rơndăp broă lơh anih lơh đèng pa, anih lơh đèng tơlir, sàng goh, kơ̆ kơl jăp.