Tàm sàh Ia Pnôn, kơnhoàl Đức Cơ, Gah Đơng lam Mpồl ling Sền gàr tiah nhàr lơgar càr Gia Lai neh bơyai lơh broă lơh “Nam pa Sền gàr tiah nhàr lơgar - Ram nùs làng bol ƀòn lơgar” nam pa Ất Tỵ 2025. Ia Pnôn là sàh tiah nhàr lơgar, mờ uă ngan khà làng bol là làng bol jơi bơtiàn dồ êt nă cau, rài kis gam tìp uă kal ke; khà hìu rƀah sàh dê gam 16,49%. Mờ jơnau đơs ờ lời cau lơi gơtìp lời ơm wơl hờ ngkời mờ nàng kờñ tơl hìu làng bol ndrờm geh sa tềp lơm, broă lơh neh lam lơh uă broă lơh geh kwơ ngan mờ rài kis, bè: “Dar drà Sa tềp zero đong”, broă lơh klơm mbar kơnâm lơm pòng mờ tìp măt lơh kwèng niam chài đơs crih tam ya.

Di dơ̆ do, Gah Đơng lam Mpồl ling Sền gàr tiah nhàr lơgar càr Gia Lai neh jàu pà 100 bơnah phan pà ai ală hìu bơnhă geh dờp bơta dong kờl bơh mpồl bơtiàn dê mờ hìu geh rài kis kal ke. 20 nă kơnòm bơsram là “kòn ròng bơh mpồl ling sền gàr tiah nhàr lơgar dê” kung geh dờp phan pà sa tềp sơl.

Mpồl Lơh sơnơm kơnòm să Dà lơgar Việt Nam pa pơgồp bal mờ Sở Lơh sơnơm càr Dăk Lăk bơyai lơh broă lơh “Nam pa dong kờl is- sa tềp kờñ gơboh kòn bơnus” tàm  xã Cư Kpô, kơnhoàl Krông Búk. Broă lơh neh jàu 20 bơnah phan pà ai kơnòm bơsram mờ ală hìu bơnhă geh rài kis kal ke, dong kờl 10 bơnah reh kòp plai nùs ờ sa priă ai kơnòm dềt mờ 50 bơnah reh phaco ai làng bol gơtìp kòp bè mat tàm kơnhoàl Krông Kúk in. Kham kòp, pà sơnơm ờ sa priă ai 500 nă làng bol tàm ù tiah xã Cư Kpô in. Di dơ̆ do, mpồl bơyai lơh kung tus còp, pà phan ai 5 hìu bơnhă geh sră dong kờl Dà lơgar geh màng mờ Dà lơgar tàm  ù tiah xã Cư Kpô, kơnhoàl Krông Búk. Kờp jơh priă tă lơh ală broă lơh dê là 1 tơmàn 300 tơlak đong.

Broă lơh geh gơtha uă ngan, ngan ngồn dong kờl, sền gàr sa tềp bơhiàn Dà lơgar ram mhŭ, bơtòm tơrgùm, cèng wơl pràn kơldang să jan, bơta chờ hờp ai ală kơnòm dềt, làng bol tàm ală tiah kal ke bơh càr Dăk Lăk dê.