Tàm sàh Ea Tiêu, kơnhoàl Cư̆ Kiuñ, Ƀộ Kwang àng pơgồp bal mờ Kwang àng càr mờ Đoàn ơruh pơnu bơyai lơh broă lơh “Rê mờ ƀòn lơgar”. 

Di tàm dơ̆ do, kwang đơng lam bồ Ƀộ Kwang àng neh jào 300 pò phan satềp tus mờ ală hìu nhă cau geh màng mờ dà lơgar, kra ƀòn, kwang atbồ ƀòn, cau geh rài kis gơtìp kal ke; ơruh pơnu kwang àng Làng bol. Đoàn ơruh pơnu càr Dăk Lăk jào pà dùl jơdŭ măi vi tíñ, 100 khà priă dong kờl bơsram dà Mỹ tus ală kơnòm bơsram kấp 1, lơh jăt broă lơh sòl àng ƀòn lơgar, gùng bồng bi Dà lơgar; Mpồl đơng lam Kảñ sát Kơ động ai ngui mờ jào pà hìu nùs nhơm. Broă lơh “Rê mờ ƀòn lơgar” bơh Ƀộ kwang àng lơh nàng bơto bơtê bơhiàn kờñ gơboh dà lơgar, lơh geh uă bơta kwơ niam bơnĕ bơh broă lơh “Hùc dà kah tô dà”, git ưn ngài gơwèt mờ cau geh màng mờ dà lơgar, lam lơh nùs nhơm tam klăc bal, dong kờl bal tàm mpồl bơtiàn ală jơi bơtiàn tàm lơgar Việt Nam dê.

Tàm sàh tiah nhàr lơgar Ia Lốp, kơnhoàl Ea Súp, càr Dăk Lăk neh bơyai lơh Broă lơh “Nam pa tiah nhàr lơgar ram mhŭ nùs nhơm làng bol ƀòn lơgar”, cèng tus ai làng bol ală jơi bơtiàn dồ ết nă cau tiah do in dùl nam pa ram mhŭ mờ bềng lìu bơta kơ̆p kờñ.

Tàm broă lơh, mờr 400 bơnah phan pà neh geh jàu tus ală hìu bơnhă geh sră dong kờl Dà lơgar mờ hìu bơnhă rƀah in, bal mờ dùl nơm hìu “Tam klăc dờng” kờp priă 100 tơlak đong. Is ồn, ală priă bơsram kung geh jàu ai kơnòm bơsram rƀah bơsram jak in, dong kờl ală kơnòm cơnđoà mut tàm rài tơnơ̆ do. Broă lơh “Nam pa mpồl ling tiah nhàr lơgar ram mhŭ nùs nhơm làng bol ƀòn lơgar” ờ mìng là phan pà phan bơna lơm mờ gam là dăng che tơrbŏ bal nùs nhơm ling klàng làng bol, bơrkoăt kơ̆ rlau tai bơta gĭt gơ̆p đah mpồl ling sền gàr tiah nhàr lơgar mờ làng bol ală jơi bơtiàn, lơh geh bơnàng jă kơ̆ kơl jăp ai dùl tiah nhàr lơgar ring lơngai mờ hờm ram.