Tàm jơnau kah yau bơh cau ling yau Nguyễn Huy Thương, ơm tàm kơnhoàl Ea Kar, càr Dăk Lăk, bơh lồi nam 1959 là ală ngai nhai ờ tŭ lơi hŭi. Tŭ hơ̆ ồng mìng pa 17 sơnam lơm, neh lik lòt bơh ƀòn lơgar tờm Hà Tĩnh, lam lài lòt gùng lơh kơnòl broă  jat jơnau hòi jà bơh Dà lơgar dê. Rlau 12 nam 7 nhai rềp mềr tàm gùng lòt Trường Sơn, bơh tŭ là ơruh pơnu lam lài tus tŭ gơ gơs ling geh griăt ờs mờng, ồng neh sền gŏ uă ngan cau ling bal chơ̆t phi să, ơm bĭc wơl tàm gơl gùng do. Ồng Nguyễn Huy Thương yal, tài bơh geh gơnoar broă dờng màng ngan tàm broă dong kờl bè cau, bơta pràn mờ phan bơna bơh tiah đah Tô Dà lơgar dê jun tus tàm tiah tam lơh đah Jum Dà lơgar den tàng gùng Trường Sơn là tiah tờm ngan tam lơh sơgràm cui rơcai bơh ling rơndeh par, ling rah phào bơh lơgar Mỹ mờ bol Ngụy dê: “Gùng hơ̆ geh 4 tiah, bơh đah bơdìh Quảng Bình mut là tiah 1, lòt guh tus tàm gùl là tiah 2 den tiah 3, tus tiah 4 mù tus pôs đồng Cù Bai. Mơya tài bơh ơm tàm gah đah ne là Ngụy ling Sài Gòn, đah do sồr pal lòt tus Lao Bảo, Triệu Phong, tơnơ̆ hơ̆ mut tàm gùng 9 nàng mut tus tàm kơh 700. Trung đoàn 71 bơh mpồl Ling tiah 4 dê khi pờ gùng tàm hơ̆ jŏ rau, bol añ mut tàm hơ̆ mờ kơnòl broă là àñ, tui, pơnđiang phan bơna, lơh bè lơi nàng jun pơndiang geh gàr tơl ngan, pơn yơu bè 10 kĭ tàm do den mut tàm gơl gùng lồi dŭt kung pal gam geh 1 kĭ đau. Bơta chơ̆t phi să den tŭ do ờ gơtùi đơs jơh ờ”.

Gùng Trường Sơn lòt jat bơh tiah đah Tô Dà lơgar mut tàm tiah đah Jum Dà lơgar, geh gơl lòt gan tiah đah Jum lơgar Lào, lơgar Campuchia. Tàm càr Dăk Lăk, gùng Trường Sơn geh gơl lòt gan ù tiah xã Krông Na, kơnhoàl Buôn Đôn. Tàm hơ̆, Anih sơlàng ơm Serepok là mpồng mut tờm ngan dong kờl bè cau, bơta pràn, phan bơna, jun pơndiang phan sa, phan tam lơh, gar phàu geh dong kờl dờng ngan bơh tiah đah Tô Dà lơgar dê ai tiah tam lơh dờng tiah đah Jum Dà lơgar bal mờ 2 lơgar Lào mờ Campuchia dê. Ngan ngồn gùng lòt do neh lơh geh ai ling tơngklàs pờ ală dơ̆ tam lơh dờng bè Nam pa Mậu Thân 1968, tam lơh  Sơnam pa kàl prang nam 1972 mờ tam lơh Tây Nguyên 10/3/1975 pờ tơngai ai tam lơh pha lin dờng nam pa 1975 tơrgùm dùl Dà lơgar.

Đại tá Lê Xuân Bá, Củ tịc Mpồl Bơhiàn yau Trường Sơn- gùng Hồ Chí Minh càr Dăk Lăk, lài do là Atbồ là Sư đoàn 470 yal, nam 1973, tŭ hơ̆ ồng gam là Cau Atbồ Trung đoàn 4 (gơwèt Sư đoàn 470, Mpồl 559), geh jàu kơnòl broă đơng lam mut lơh gơl gùng Trường Sơn jòng pơgăp 80 kơi sồ bơh gùng 19 (càr Gia Lai) tus dà dờng Serepok, càr Dăk Lăk. Tàm hơ̆, gơl lòt gan dà dờng Serepok lơh ală bơta phan: anih sơlàng ơm lòt gan dà dờng, anih ndơ̆p rơndeh sơtăng ơm, rơbàng tàm tơrbŏ nàng rơndeh sơtăng, rơndeh ôtô, ling tam lơh mờ phan kơn jơ̆, ling tam lơh hơđang ù gờl in tiă gan dà dờng. Đại tá Lê Xuân Bá, đơs: “Sư đoàn 470 lơh gùng ai rơndeh sơtăng in lòt, rơndeh sơtăng, ling tam lơh mờ phan kơn jơ̆, cau, kòi phe, phan sa, sơnơm tơm ba bal jơh ală cau ling lơh sơnơm, ling jun pơndiang phan mut jơh lơm, geh bal phàu ding dờng, phàu ding dềt, ai rơndeh sơtăng mut nàng tơngklàs Buôn Ma Thuột mờ tơngklàs tiah đah Jum Dà lơgar den Sư đoàn 470 mờ gùng lòt Trường Sơn pơgồp dùl bơnah dờng ngan”.

Mờ tiah tam lơh kwơ màng, tàm dơ̆ tam lơh mờ cau sò tơm lơgar Mỹ dong klàs dà lơgar, Dăk Lăk geh sền là dùl tàm ală pôs đồng tiah tam lơh. Gùng Hồ Chí Minh lòt gan càr Dăk Lăk ờ mìng là dùl bơta tàm tơrbŏ kwơ màng tàm ală gơl gùng dong kờl lơm mờ gam là pôs đồng kwơ màng tơn bơh tiah tam lơh B2 dê, pơgồp bơnah tam lơh jai pha ală broă rơndăp lơh tam lơh bơh lơgar Mỹ mờ gơnoar atbồ lơh dĭ Nguỵ Sài Gòn dê. Den tàng, mpồl ling Trường Sơn, ơruh pơnu lam lài, ling lam lài pờ gùng, ling griăp ƀòn sền gàr ală tiah bơh càr Dăk Lăk dê neh duh hồl ngan tus bal, gàr niam gùng lòt tàm dà dờng Serepok tàm ală nam tam lơh mờ cau sò tơm lơgar Mỹ dê. Ồng Tô Tấn Tài, lài do là Phó Ƀí thư Tỉñ ủy càr Dăk Lăk, pà gĭt:“Dà kơl hề làng bol Dăk Lăk dê tă pơgồp nàng lơh gơl gùng kềng mut tàm tiah đah Jum Dà lơgar, mờ làng bol jơi bơtiàn tă pơgồp tàm ùr klau ơruh pơnu ală jơi bơtiàn, tŭ hơ̆, añ hòi jà nàng bơtơl tàm ală tiah jun ală sră nggal tàm rài tam lơh. Lòt jơh 1 ngai gùng là tus 1 tiah jàu sră nggal bè hơ̆ uă ngan là ai ală oh mi jơi bơtiàn bơh càr dê tus bal tàm ală tiah hơ̆. Oh mi tă pơgồp, tŭ hơ̆ chơ̆t phi să kung uă ngan mơya oh mi khi tă pơgồp bal den kwơ ngan”.

Rlau 65 nam neh lòt gan kờp bơh tŭ gơl gùng geh lơh gơs, mơya gùng Trường Sơn ndu gơnrơh mờ jơnau kah wơl bơh ală cau ling dê kung gam kis sùm tàm bồ tơngoh làng bol Việt Nam dê. Hơ̆ ờ mìng là jơnau yal bè bơta chơ̆t phi să, bòl glar kal ke lơm mờ gam là rùp pơrya bơh nùs nhơm kờñ gơboh Dà lơgar, nùs nhơm kơ̆ dơn mờ nùs nhơm pơnyờ să jơi bơtiàn dê. Ală nam nhai kah yau hơ̆ neh cih geh jơnau đơs crih dờng màng ờ tŭ lơi hŭi, là phan lời wơl nùs nhơm dờng ngan ai rơnàng tŭ do mờ tơnơ̆ do in, tàm pơdờn sền gàr mờ đòm jăt niam bơhiàn dờng màng bơh jơi bơtiàn Việt Nam dê.