Lam lơh broă lơh “Tàm tơrbŏ bal ròng be- Tơnguh broă lơh sa”, Mpồl cau ùr lơh sa kă bro càr Dăk Lăk pơgồp bal mờ Mpồl tam klac cau ùr lơh sa kă bro Việt Nam jàu pà 100 nơm be me deh kòn ai cau ùr jơi bơtiàn dồ êt nă cau tàm càr Dăk Lăk in. Broă lơh geh lam lơh 3 dơ̆, jàu 100 nơm be me deh kòn pà 30 hìu bơnhă jơi bơtiàn dồ êt nă cau tàm ală ƀòn tàm càr Dăk Lăk. 

Broă lơh rơp dong kờl priă bơcri jat broă lơh tàm pơdar ai ală hìu bơnhă in geh sac rơ wah, geh bơta hơ pơrgon đah 3 gah, geh Mpồl cau ùr lơh sa kă bro càr Dăk Lăk, hìu bơnhă mờ Mpồl tam klac cau ùr tàm ƀòn lơgar. Tơl hìu bơnhă rơp geh dờp 3 nơm be me deh kòn. Mpồl bơh 3 tus 5 hìu bơnhă rềp hìu rơp pà tai 1 nơm be dam nàng tơnguh mpồl be. Tơngai pơrgon dùl dơ̆ dong kờl là 2 nam, tàm hơ̆ ală gah geh gơ rềng rơp jat sền, dong kờl tơl hìu bơnhă ròng be, sền sơ wì cồng nha lơh geh, dilah ờ lơh geh cồng nha den rơp ntrờn ai be hìu bơnhă ndai in ròng.