Bơdìh mờ broă gàr niam lơngăp lơngai, ờ do ờ dă ai dơ̆ pơrlòng in, tiah do is ồn sền gròi dong kờl kơnòm pơrlòng tàm tiah sar lơgar ngài, tiah làng bol jơi bơtiàn dồ ết nă cau mờ ală kơnòm bơsram geh rài kis kal ke, ờ gŏ di lời khat dồ nă kơnòm pơrlòng lơi tài bơh ală bơta lòt rê, sa sào, ơm rlô mờ gơrềng tus broă tus bal pơrlòng. Dơ̆ pơrlòng nam do, càr Dăk Lăk bơyai lơh 64 tiah pơrlòng ngan ngồn, 55 tiah pơrlòng rcang lài mờ pơgăp 1 rơbô 500 cơdŭ pơrlòng.

Rơlao 5 rơbô nă kwang bàng, cau pơgru, cau lơh broă geh hòi jà tus bal ală broă lơh bơyai lơh dơ̆ pơrlòng. Càr neh tam pà kơnòl broă geh ngan ai tơl Sờh, gah, ală tiah in; mơkung kờp sền tơl làm ală bơta bè phan bơna, cau lơh broă mờ ală gùng dà broă lơh bơsong ală bơta digơlan gơlik geh. Gơwèt mờ ală tiah sar lơgar ngài mờ tiah kal ke, ală tiah pơgồp bal mờ hìu bơsram kờp sền, geh broă lơh dong kờl di pal ai ală kơnòm pơrlòng in. Broă lơh “Dong kờl kàl pơrlòng” geh lam lơh làm bă tiah mờ bơta tus bal bơh đoàn viên, ơruh pơnu mờ ală mpồl cau, dong kờl kơnòm pơrlòng bè tiah ơm, rơndeh rơndồ lòt rê mờ ală bơta kờñ pal geh tàm jơh tơngai bơyai lơh dơ̆ pơrlòng. Bal mờ hơ̆, ală mpồl lơh broă geh gơnoar gàr niam lơngăp lơngai lòt rê tàm gùng, pờ ồs đèng, yal tơngĭt jơnau mờ ală bơta drơng broă ai dơ̆ pơrlòng in tàm tơl ală bơta digơlan gơlik geh.