Tŭ do, Mpồl đơng lam pơrlòng jơh bơsram kâp 3 nam 2024 càr Dăk Lăk neh lơh 5 mpồl mờ 20 nă cau tàm mpồl, gam sền sơ wì broă rơcang lài ai dơ̆ pơrlòng bơh Mpồl đơng lam pơrlòng kâp kơnhoàl mờ 33 anih pơrlòng ngan ngồn tàm càr. Mpồl sền sơ wì kung cih dờp ală jơnau đơs, jơnau dan bơh ală tiah, hìu bơsram lơh anih pơrlòng dê bè ală kal ke tàm tŭ rơcang lài ai dơ̆ pơrlòng in; hơ ală kòl yan gơ rềng tus broă rơndap lơh rơcang lài kơryan bơta blac pơrlồm pơrlòng tàm anih pơrlòng; sền gàr lơngăp lơngai gùt dar anih pơrlòng nàng dơ̆ pơrlòng in geh lơh lơngăp lơngai, di kơrnuat pơrlòng. Jat ồng Phạm Đăng Khoa, Kwang atbồ Sở Giáo zụk mờ Đào tạo càr Dăk Lăk đơs, tŭ lòt sền ai gŏ, ală mpồl neh jơh nùs, geh kơnòl, gàr niam ală broă di mờ tŭ tơngai hơ pơrgon.