Bơh nam 2021 tus tŭ do, càr Dăk Lăk neh lơh wơl, lơh pa mờr 5 rbô 600 nơm hìu dong hìu bơnhă geh màng mờ dà lơgar; hìu rƀah, hìu pa jơh rƀah; hìu bơnhă geh dờp bơta dong kờl mpồl bơtiàn dê. Tŭ do, càr Dăk Lăk gam pơnđơl tus jơh nam 2025 rơ̆p tơn jơh jơh ală hìu ing, hìu ồm sèt ñhăt dà mìu. Jăt cồng nha kờp sền dồ bă nền nòn bơh ală tiah dê, tŭ do, càr Dăk Lăk kung gam sơl 9 rbô 560 hìu gam kal ke bè hìu ơm.

Ồng Nguyễn Hoàng Giang, Kwang ătbồ Sở Lơh broă, Cau ling sồt să mờ Mpồl bơtiàn càr Dăk Lăk pà gĭt, lơh jăt srơh tàm pơrlòng “Sơmbăt tê bal tơn jơh hìu ing, hìu ồm sèt ñhăt dà mìu tàm làm gùt lơgar tàm nam 2025” bơh Thủ tướng Cíñ phủ dê lam lơh, càr Dăk Lăk neh lam kờp sền dồ bă nền nòn, tơrgùm kờp, gĭt nền khà hìu ing, hìu ồm sèt ñhăt dà mìu, sac rwah dipal cau kờñ dong kờl. Càr geh broă rơndăp lơh, tŭ tơngai lơh broă lơh tơn jơh hìu ing tàm càr nàng kờñ ờ gơlik geh tai hìu ing bơh ală hìu ờ hềt lơh tơl jơnau sồr.