Mùl màl, lam lơh srơh sa tềp kờñ gơboh bal mờ kòn bơnus nam 2023, Mpồl Cữ thập đỏ neh hòi jà tă pơgồp geh rlau 71 rbô bơnah phan pà hìu bơnhă rƀah, hìu bơnhă geh rài kis uă kal ke, cau gơtìp sơnơm khih điôxin lơh aniai, cau kuet kơlte in. Lơh 9 broă lơh dong kờl kòn bơnus, dong kờl 553 anih dong kờl cau mờ git nđờ jơt rbô dơ̆ cau rƀah tàm nhai lơh broă uă dong kờl kòn bơnus. Gàr sùm ală broă lơh hìu ƀềp trŭ sa, phan sa ờ sa priă dong kờl cau rƀah tàm ală hìu sơnơm.

Mò A Yun H’Hương, Củ tịc Mpồl Cữ thập đỏ càr Dăk Lăk pà git, tàm tơngai tus, Mpồl pơn jat tai sền gròi lam lơh ală broă lơh gơ jat bal mờ dơ̆ lam sồr “Tơl mpồl bal, tơl nă cau dùl nă să pơgồp bal mờ dùl anih dong kờl cau”, sơlơ hòi jà tă pơgồp priă jền nàng gàr sùm ală broă lơh tàm ƀòn lơgar.