Tơrgùm phan jun mut ơm tàm hìu pa, hìu bơnhă H'Bion Buôn Yă, ơm tàm ƀòn Ea Sar, xã Ea Sar chờ hờp ngan ờ gĭt lơh. Bi H’Bion yal, 13 nam do, dùl nơm hìu geh 4 nă cau ơm hat hal tàm bơta ơnang pơgap 20 thơk vuông den kal ke ngan. Kơ̆p kờñ geh dùl nơm hìu ơm ơnàng rlau geh 2 nă ùr bơklau bi dê kơ̆p kờñ ngan pah nam mơya kung ờ hềt gơtùi lơh geh sơl tài bơh rài kis gam uă kal ke bòl glar ngan. Tŭ geh gĭt Dà lơgar dong kờl lơh hìu ơm, 2 nă ùr bơklau bi neh ơm wơl lòt lơh broă apah, tus dong kờl lơh hìu nàng tơrmù ƀà priă tă lơh hìu. Kơnờm bơh hơ̆ hìu bơnhă ùr bơklau bi dê geh dờng ơnàng rlau. Bi H’Bion yal: “Tŭ do geh Dà lơgar dong kờl lơh hìu ơm rau, ùr bơklau iang nùs lơh broă, tơrgùm bơtàu tơnguh lơh sa, mhar lik klàs rƀah”.

Bơta chờ hờp geh hìu ơm pa tơnơ̆ 13 nam ơm hìu ing, bi H'Mah Mlô, ơm tàm thôn 6, xã Ea Sar, kơnhoàl Ea Kar, pà gĭt: ùr bơklau bi lòt lơh broă apah gùt nam kung ờ gŏ tơl sơl nàng ngui tàm rài kis pah ngai mờ rcang ai 2 nă kòn in lòt bơsram, den ờ khin kơlôi tus broă lơh geh dồ nơm hìu ơm kơ̆ kơl jăp. Mơya bơta ờ khin kơlôi hơ̆, tŭ do neh geh ngan, kơnờm 44 tơlak đong Dà lơgar dong kờl mờ 40 tơlak đong càn priă dong kờl ờ sa priă cồng uă bơh Ngân hàng Cíñ sách Xã hội dê. Geh hìu ơm pa kơ̆ kơl jăp, rài kis bơh ùr bơklau bi H’ Mah dê bè neh tàm gơl pa:“Lài do, 2 nă ùr bơklau ơm tàm hìu mpàn gơtìp kơnàp cuh lơm, hìu den ñhăt kung ờ gĭt pal lơh bè lơi sơl. Bơh tŭ geh hìu ơm bơh gơnoar atbồ dong kờl lơh là 2 nă ùr bơklau geh rài kis niam rlau, jơh nùs lơh broă sa mờ ai oh kòn in lòt bơsram tơl làm”.

Lơh jat Rơndăp broă lơh sồ 1, Broă lơh jơnau kờñ Dà lơgar 1719, nam 2023, xã Ea Sar, geh lơh 36 nơm hìu ai ală hìu bơnhă rƀah làng bol jơi bơtiàn dồ ết nă cau in. Tus tŭ do, ală hìu ndrờm neh lơh sir, làng bol neh mut ơm. Jat ồng Văn Đình Thìn, Củ tịc Ủy ƀan Ñân zân xã Ea Sar yal, tơnơ̆ tŭ lơh sir broă dong kờl lơh hìu ai hìu bơnhă rƀah in, xã gam lơh jat ală broă lơh nàng dong kờl pà ù ơm ai 44 hìu bơnhă ờ geh ù ơm tàm xã in:“Lơh jat broă lơh dong kờl ù ơm ai ală cau dờp geh bơta dong kờl jat Rơndăp broă lơh sồ 1, den xã kung neh kờp sền. Tŭ do, xã ờ geh ù den tàng broă lơh bơh xã dê là rơndăp ù tiah ală tiah tàm bơrlŭ bal nàng dong kờl ală cau in blơi ù”.

Rơndăp broă lơh sồ 1 tàm broă lơh 1719, càr Dăk Lăk geh ai rlau 91 tơmàn đong nàng lơh jat broă lơh dong kờl ù ơm, hìu ơm, ù lơh sa mờ dà ngui sa pah ngai ai ală hìu bơnhă rƀah làng bol jơi bơtiàn dồ ết nă cau in. Tàm hơ̆, kơnhoàl Ea Kar là dùl tàm khà ết ngan ală tiah tàm càr dê lơh sir di tŭ tơngai, mờ 150 hìu bơnhă neh geh hìu ơm, 629 hìu bơnhă geh ngui dà sàng goh pà làm bă tiah. Broă lơh dong kờl pà ù ơm, ù lơh sa kung gam geh kơnhoàl lơh mhar ngan jat tŭ tơngai, pơnđơl pràn lơh ngan lơh sir broă jàu tàm nam 2024 do.

Ồng Nguyễn Đăng Kai, Phó Kwang atbồ Cơldŭ lơh broă jơi bơtiàn kơnhoàl Ea Kar pà gĭt, nàng lam lơh geh cồng nha rơndăp broă lơh sồ 1 bơh broă lơh 1719, tơnơ̆ tŭ geh broă rơndăp lơh mờ jơnau bơto pơlam bơh Dà lơgar mờ càr, cơldŭ lơh broă neh cribơyai mờ Ủy ƀan Ñân zân kơnhoàl ai lơh jat broă rơndăp lơh lơh jat; yal, bơto pơlam ală xã, thị trấn kờp sền, cih mat, lơh cơng tàng nàng ring bal cau dờp geh bơta dong kờl... Mơkung lơh pràn broă lơh mblàng yal nàng kờñ lơh geh bơta ring bal bơh làng bol dê. Ồng Nguyễn Đăng Kai, đơs:“Lài mờ tŭ lơh bol añ đơs tàm ală dơ̆ pơrjum mờ lơh bè lơi pal di mờ broă lơh, jàu di cau nàng drơng broă lơh mờ lơh di broă lơh, di jơnau cih bơh adat boh lam dê. Mờ khi neh đơs ală broă rơndăp lơh geh ngan den gơ lơh bè ală mpồl lơh broă, anih lơh broă, ală cau geh drơng broă là khi lơh broă jơh nùs ngan. Bơh bơta jơh nùs do hơ̆ sồng lơh geh cồng nha”.

Kơnờm bơta mut lơh broă kràñ cê jơh nùs bơh gơnoar atbồ tiah do dê mờ ală anih lơh broă geh gơnoar, gĭt nđờ rơhiang hìu bơnhă rƀah, hìu bơnhă ndrờm bè rƀah tiah làng bol jơi bơtiàn dồ ết nă cau, tiah kơh bơnơm kơnhoàl Ea Kar, càr Dăk Lăk, geh hìu ơm, bè ờs wơl rài kis, pơgồp bơnah dong tiah do lơh mhar broă lơh tơrmù rƀah, gàr tơl niam rài kis mpồl bơtiàn.