Lơh jat broă lơh bơh Mpồl duh broă Đảng ƀộ ƀòn dờng pleiku khoă XII dê “bè pơn jat tai lơh pràn broă lơh tơrmù rƀah kơ̆ kơl jăp, tơnguh uă bơta niam rài kis làng bol, ngan là tàm ală ƀòn lơgar làng bol jơi bơtiàn dồ ết nă cau tàm ù tiah do dê”, bơh nam 2021 tus tŭ do, ƀòn dờng pơgồp bal mờ ală anih lơh broă, mpồl lơh broă, Anih duh broă làng bol ală xã, sơnah ƀòn hòi jà ală mpồl lơh sa kă bro, cau dồ nă să geh nùs nhơm niam, kes priă “Tài cau rƀah ƀòn dờng dê” mờ bơh xã dê dong kờl 95 hìu bơnhă lơh hìu ơm pa mờ lơh niam wơl hìu ơm mờ kờp jơh khà priă rlau 4 tơmàn 700 tơlak đong; dong kờl pà tờm chi sơntìl, phan ròng sơntìl, phơng sih, priă lơh sa 1 tơmàn 200 tơlak đong; dong 252 hìu bơnhă rƀah, hìu bơnhă pa lik klàs rƀah, ai hìu bơnhă pa lik klàs rƀah in càn priă dong kờl rlau 13 tơmàn 800 tơlak đong.

Ồng Trần Tấn Quang, Kwang atbồ Cơldŭ lơh broă Lơh sa ƀòn dờng Pleiku pà gĭt, khà hìu bơnhă rƀah tàm ƀòn dờng geh 0,24% mờ 149 hìu bơnhă rƀah. Ƀòn dờng gam pơn jat tai kơlôi sơnơng, lam lơh tai uă broă lơh drơng rài kis làng bol in di pal nàng tơnguh uă cồng nha bơh broă lơh do dê.