Thủ tướng ồng Phạm Minh Chính đơng lam dơ̆ pơrjum bè lơh jăt broă dong kờl tơn jơh hìu sèt, hìu ñhăt dà mìu ai hìu rơƀah, hìu pa jơh rơƀah in
Thứ tư, 13:37, 02/10/2024
Cau mblàng Ndong Brawl/VOV
Cau mblàng Ndong Brawl/VOV
VOV4.K’Ho- Mho òr (01/10), tàm Hìu lơh broă Cíñ phủ, Thủ tướng Cíñ phủ ồng Phạm Minh Chính đơng lam dơ̆ pơrjum Duh broă sùm Cíñ phủ mờ Măt trận Dà lơgar Việt Nam, ală ƀộ, anih lơh broă dà lơgar bè lơh jăt broă dong kờl tơn jơh hìu sèt, hìu ñhăt dà mìu ai hìu rơƀah, hìu pa jơh rơƀah in.
Jơnau đơs pơn dŭt dơ̆ pơrjum, Thủ tướng Cíñ phủ ồng Phạm Minh Chính neh jào kơnòl broă gơwèt mờ tus tơl ƀộ, gah lơh broă dà lơgar, mpồl lơh sa kă bro mờ kơnòl bơh ală càr, ƀòn dờng dê tàm broă hòi jà tă priă dong kờl tơn jơh hìu sèt, hìu ñhăt dà mìu ai hìu rơƀah, hìu pa jơh rơƀah in.
Thủ tướng đơs sùm, broă pơrlòng “Tus bal tơn jơh hìu sèt, hìu ñhăt tàm gùt lơgar tàm nam 2025” neh geh lam lơh, lơh jăt geh cồng nha, ờ lơh gời. Mơya nàng lơh gơs jơnau kờñ tơn jơh hìu sèt, hìu ñhăt dà mìu tàm gùt lơgar tus lồi nam 2025, chờ gờm Pơrjum dờng cau ala măt gùt lơgar dơ̆ XIV bơh Đảng mờ tơnkah 80 nam Ngai sơn tờm Dà lơgar, 50 nam tơnklàs đah jum, dà lơgar tơrgùm bal, pal geh broă lơh pa, lơh pràn, khoa họk, geh cồng nha rơlao.
Viết bình luận