Tàm 235 hìu làng bol tŭ do gam ơm kis tàm tiah gơkòl nhàr ù tiah, làng bol ơm kis đah xã Đăk Nên, kơnhoàl Kon Plông, càr Kon Tum mờ xã Trà Vinh, kơnhoàl Đah Jum Trà My, càr Quảng Nam den geh tus rlau nggùl khà hìu là hìu rƀah. Tài gơkòl nhàr ù tiah, làng bol neh ờ geh bơcri priă lơh phan bơna kờñ pal geh bè đèng, gùng, hìu bơsram; ờ geh pà sră ù tiah…den tàng neh lời tĕ uă tŭ niam bơtàu tơngguh lơh sa bơtàu tơngguh rài. Ồng Phan Quốc Vũ, Kwang ătbồ Mpồl Ătbồ sền gàr brê rơcăng gàr bồ tô dà Thạch Nham, càr Kon Tum pà gĭt, mpồl kờñ ngan jàu brê làng bol in, mpồl bơtiàn in sền gàr ătbồ, mơya tài bơh brê là bơh càr Kon Tum dê ai làng bol bơh càr Quảng Nam dê ătbồ den tàng ờ gơtùi jàu brê. Tài bè hơ̆, làng bol, mpồl bơtiàn den ờ geh jàu brê nàng geh tai priă jền ai mpồl sền gàr brê pơn jăt tai tìp uă kal ke tàm broă lơh ătbồ. Ồng Phan Quốc Vũ, đơs: Broă lơh ătbồ sền gàr brê tiah do kal ke ngan. Bơta ơm kis tàm do den là tiah ờ hềt geh đèng pờ àng gùng bè ờ hềt geh gùng che điện thoại mờ ală phan bơna ndai ờ hềt geh lơh den tàng kal ke ngan tàm broă ơm kis, sàu sa bơh mpồl sền gàr brê dê. Tiah do nhàr ù tiah gơnoar ătbồ, bơnah brê gơ wèt càr Kon Tum ătbồ mơya làng bol den càr Quảng Nam. Mpồl kal ke ngan là broă lơh mblàng yal hòi jà làng bol ătbồ sền gàr brê.  

Tŭ do, tàm tiah gơkòl nhàr ù tiah, làng bol ơm kis đah xã Đăk Nên, kơnhoàl Kon Plông, càr Kon Tum mờ xã Trà Vinh, kơnhoàl Đah Jum Trà My, càr Quảng Nam, ờ geh broă bơ̆t bơtàu phan bơna lơi geh bơcri priă bơh priă dà lơgar dê. Bơta do lơh rài kis làng bol dê neh kal ke sơlơ kal ke rlau. Mò Y Thị, Phó Ƀí thư Duh broă sùm Huyện ủy kơnhoàl Kon Plông, càr Kon Tum, pà gĭt: Jơnau kờñ bơcri priă bơsong ală kal ke tàm rài kis làng bol kung bè bơcri priă bơ̆t bơtàu phan bơna mờ ală bơta sền gàr lơngăp lơngai rài kis mpồl bơtiàn xã Trà Vinh, kơnhoàl Đah Jum Trà My ờ gơtùi bơsong tài bơh adăt boh lam ờ ai gơnoar lơh bơcri priă bơdìh nhàr ù tiah gơnoar ătbồ dê. Tơnơ̆ uă dơ̆ gơnoar ătbồ 2 xã Đăk Nên mờ Trà Vinh mờ 2 kơnhoàl Kon Plông mờ Đah Jum Trà My lơh broă mơya gơkòl ờ gơtùi bơsong geh.

Tềng đăp rài kis kal ke bơh 235 hìu dê, mờr 1 rbô 100 nă làng bol tàm tiah gơkòl, sùm 3 nam do, uă dơ̆ pơrjum đah gah geh gơnoar mờ gơnoar ătbồ ală kâp bàr càr Kon Tum mờ Quảng Nam dê neh geh bơyai lơh mơya gơkòl kung gam ờ hềt geh bơsong sơl tài bơh 2 đah ờ lơh geh bơta ring bal. Ồng Đặng Quang Hà, Củ tịc Anih duh broă Làng bol kơnhoàl Kon Plông, càr Kon Tum, dan: Kơ̆p kờñ là kâp geh gơnăp gơnoar gờñ sền swì, bơsong broă gơkòl nhàr ù tiah gơnoar ătbồ neh geh bơh jŏ do. Bơh hơ̆ ală tiah geh bơta nàng bơcri priă bè lơh phan bơna, sền gròi tus rài kis làng bol in, gàr geh ai làng bol in ală bơta bè ù tiah, bè hìu ơm, bè lơh broă sa sươn sre bơh hơ̆ làng bol geh rài kis kơ̆ kơl jăp, rài kis niam rlau.

Tơnơ̆ uă dơ̆ tìp đah 2 gah, càr Quảng Nam kung gam bè ờs sơl nùs nhơm kờñ gàr wơl sră cih măt tiah ơm kis cau tàm hìu bơnhă bơh làng bol dê mờ tam gơl nhàr ù tiah càr Kon Tum tus đah he. Sơlơ̆u wơl, càr Kon Tum đơs là kờñ pal gàr wơl bè ờs nhàr ù tiah gơnoar ătbồ mờ gơtùi ntrờn sră cih măt tiah ơm kis cau tàm hìu bơnhă mờr 1 rbô 100 nă cau bơh Quảng Nam tus càr Kon Tum in. Geh tŭ tàm nam 2023, 2 càr ring bal lơh 2 mpồl lơh broă tus lùp sền nền wơl tơl làm tiah do, mơkung pà sră lùp jơnau đơs làng bol gơ wèt mờ 2 broă rơndăp lơh “tam gơl nhàr ù tiah gơnoar ătbồ mờ tam sră sră cih măt tiah ơm kis, sră cih măt tiah ơm kis cau tàm hìu bơnhă”.

Cồng nha tàm 2 rbô 240 nă làng bol geh lùp, geh 882 nă cau, geh tus rlau 37% sồr tam gơl nhàr ù tiah anih lơh broă sră pơ àr gơnoar ătbồ đah 2 tiah dê; 1 rbô 358 nă cau, geh tus rlau 60% sồr ntrờn sră cih măt tiah ơm kis, sră cih măt tiah ơm kis cau tàm hìu bơnhă ai làng bol xã Trà Vinh, kơnhoàl Đah Jum Trà My in gam ơm kis tàm tiah gơkòl nhàr ù tiah, làng bol ơm kis rê hờ càr Kon Tum. Bè hơ̆, mơya tus tŭ do, cồng nha dơ̆ lùp bòl glar kal ke ngan đah 2 càr kung gam ờ hềt geh kwơ ngan ngồn sơl. Kon Tum mờ Quảng Nam kung gam ờ hềt ring bal mờ làng bol kung gam pơn jăt tai kis tàm bơta siău siar, kal ke.