Thôn Ti Tu, xã Đăk Hà, kơnhoàl Tu Mơ Rông geh 80 hìu bal mờ mờr 400 nă làng bol. 04 nam do, bơh tờm sơntìl dong kờl bơh gơnoar ătbồ dê mờ blơi is, làng bol tàm thôn neh tam pa geh rlau 30 lồ brê bal mờ uă ngan là tờm nho pe nha. Lam lài tàm broă tam brê tàm bă ù lơh sa jŏ nam neh klàr ờ gam nđiơm gơs tai tàm thôn Ti Tu là bi Vi Văn Chồm, Ƀí thư Ci ƀộ mơkung là Kwang ătbồ thôn. Nam 2021, bi Chồm tă is priă blơi sơntìl tam 1 lồ 5 sào nho pe nha. Tàm 02 nam bơh nam 2022 tus nam 2023, bơh bơnah dong kờl sơntìl bơh gơnoar ătbồ dê mờ hìu bơnhă bi tam tai mờr 1 rbô 500 tờm chi sơn tra bal mờ macca. Bi Vi Văn Chồm, pà gĭt, hìu bơnhă bi kung bè ală làng bol thôn Ti Tu neh wă geh bơta kwơ bơh broă tam brê dê. Bi Vi Văn Chồm, đơs: Làng bol gĭt wă geh bơta kwơ bơh broă tam brê dê. He tam brê là glòm tơlir ù tiah lời gời grồi bơnơm làc ờ geh chi che, mơkung kơryan bơta cò pơrdô ù lơh klàr ù gàr geh wơl dà căt nàng làng bol in lơh kòi sre. Tơrmù geh ƀà bơta tơrlah ù, dà hùp, dà cò. Dơ̆ bàr tai là gŏ giă cài nho là kung jơnhoa sơl bal mờ tờm nho kung gơdờp mờ bơta nhơm trồ tiah ù tiah tàm do den tàng làng bol kờñ ngan tam tờm nho.

Bal mờ ătbồ sền gàr niam rlau 2 rbô lồ brê geh is, 04 nam do, làng bol 9 thôn bơh xã Đăk Hà, kơnhoàl Tu Mơ Rông dê kung tam pa geh mờr 200 lồ brê. Tàm hơ̆ rlau 100 lồ bơh kes priă dà lơgar dong kờl priă blơi sơntìl mờ khà ai 10 tơlak đong dồ lồ mờ bă ù gam wơl bơh làng bol dê bơcri is bal mờ bơta dong kờl bơh priă jền mpồl bơtiàn dê tă pơgồp bal. Ồng Dương Đăng Khoa, Củ tịc Anih duh broă Làng bol xã Đăk Hà, pà gĭt: kung ờ gŏ ƀươn sơl nàng làng bol tam gơl bơh tam phan tam lơyah ngai ờ huan lơh geh cồng nha tus tam brê lơh sa. Ồng Dương Đăng Khoa, đơs: Mờ bơta mŭt lơh bal bơh jơh ală anih lơh broă cíñ trị dê kràñ cê jơh nùs ngan den jơnau gĭt wă bơh làng bol dê neh rơhời gơguh tai. Is ồn hơ̆ là cau geh bơngă pin dờn, kwang bàng thôn lơh krơh lòt lài, lam lài tam brê làng bol gŏ geh cồng nha rơhời làng bol lòt jăt. Ngan ngồn tàm khà hơ̆ kung geh sơl bàr pe hìu bơnhă ờ hềt gĭt broă sền gàr. Dàr dàr, dàr dàr gơnoar ătbồ ƀòn lơgar kung gam lơh ngan mblàng yal hòi jà làng bol lơh jăt niam broă do.

Dơ̆ hòi jà tam gơl bơta mờng sơning, bơta mờng lơh jàu wơl dà tơlir ai brê in tàm kơnhoàl Tu Mơ Rông, càr Kon Tum gam ngai sơlơ lơh gơrề pràn kơldang mờ dờp geh bơta kờñ bal bơh uă mpồl cau, cau dồ nă să tàm dơlam mờ bơdìh càr dê. Tàm khà hơ̆ geh ală cau chài Gah bơsram săp ntas gùng đơs crih, Anih kơlôi sơnơng bơsram gùng đơs crih Dà lơgar Việt Nam. Ală cau chài neh tus tơn tàm kơnhoàl, jàu pà 200 hìu kòn cau Sơdàng rƀah tàm 4 xã: Măng Ri, Tê Xăng, Đăk Hà mờ Tu Mơ Rông in 100 rbô tờm chi sơntìl 2 sơnam. Tiến sĩ săp ntas gùng đơs crih, cau chài bơceh jơnau đơs crih Làng bol ồng Đỗ Quốc Hưng, Phó Kwang ătbồ drơng kơnòl broă Anih kơlôi sơnơng bơsram Gùng đơs crih Dà lơgar Việt Nam, pà gĭt: Bơh nùs nhơm mờ bơta kờñ gơboh is ồn ngan bơh oh mi cau bơceh jơnau đơs crih Anih kơlôi sơnơng bơsram Gùng đơs crih Dà lơgar Việt Nam dê. Bơh ală tờm nho do nàng ai làng bol in dồ anih lơh gơlik priă nàng klàs bơh rƀah.

Jơh nùs glòm tơrlir ù tiah lời gời grồi bơnơm làc nàng lơh gơlik geh broă lơh broă sa kơ̆ kơl jăp ai làng bol in, bơh nam 2021 tus tŭ do, kơnhoàl Tu Mơ Rông neh tam geh rlau 2 rbô lồ brê tơrgùm bal bal mờ rlau 1 tơlak 200 rbô tờm chi rah rài, mìng là tờm nho, sơn tra mờ macca…Is ồn tàm nam do, kơnhoàl Tu Mơ Rông geh Anih duh broă Làng bol càr Kon Tum jàu tam pa 270 lồ brê. Kờp tus jơh nhai 9 pa do, kơnhoàl neh tam geh rlau 325 lồ brê, sơrlèt 55 lồ pơndrờm mờ broă jàu. Ồng Võ Trung Mạnh, Củ tịc Anih duh broă Làng bol kơnhoàl Tu Mơ Rông pà gĭt, nàng tam gơl geh bơhiàn mờng kwèng bơh mus brê lơh mìr tus tam gơl tam brê, sền gàr brê den pal dong làng bol lơh geh broă lơh broă sa. Ồng Võ Trung Mạnh, đơs: Nùs nhơm bơh kơnhoàl dê broă tam pa mờ tam wơl brê pal gàr geh gơ jăt bal mờ sền gàr niam lơngăp lơngai rài kis den tàng kơnhoàl neh sồr ală xã, ală mpồl lơh sa kă bro dong kờl làng bol tam brê mơkung pal dong kờl bơtàu tơngguh tềng hơđơm brê pa tam. Pơnyơu bè tam prìt sơkò, tam kơnuh sơnơm jriang, ală bơta chi lơh sơnơm nàng gàr geh tàm tơngai ờ hềt dờp kwơ bơh drơng broă tiah ơm kis brê mờ lơh geh wơl cồng nha bơh tam chi brê den làng bol kung gam geh sơl broă lơh broă sa nàng ròng gàr chi brê bơtàu tơngguh jŏ jòng.

Bal mờ pơlam gùng tam wơl brê nàng tam chi lơh sơnơm, ròng phan tềng hơđơm mƀur chi brê gơ jăt bal mờ bơtàu tơngguh lòt nhơl, kơnhoàl Tu Mơ Rông, càr Kon Tum bal mờ lơh ngan ătbồ, sền gàr niam rlau 58 rbô lồ brê geh is gam geh tŭ do kung gam pơn jăt tai tam tai brê. Bal mờ broă hòi jà làng bol jơh nùs tam brê tàm bă ù lơh sa sươn mìr jŏ nam neh klàr ờ gam nđiơm gơs tai, gơnoar ătbồ kơnhoàl kung hòi tơrgùm uă priă jền nàng pơn jăt tai glòm tơlir bă grồi dòr bơnơm làc gam wơl. Do là jơnau bơh sơnrờp kwơmàng nàng kơnhoàl Tu Mơ Rông in rề ơnàng tai bă ù mờr 4 rbô lồ chi lơh sơnơm gam geh tŭ do, lơh pràn bơtàu tơngguh lơh sa brê, lơh gơlik geh broă lơh broă sa kơ̆ kơl jăp ai gĭt nđờ jơ̆t rbô nă làng bol kòn cau Sơdàng in, mùl geh tus rlau 95% khà kờp làng bol bơh kơnhoàl dê.