Bulah trồ tơngai duh halà trồ mìu, ồng Cil Yŭ Ha Giảng, kòn cau K’Ho, ơm tàm thôn Liêng Bông, xã Dà Nhim, kơnhoàl Lạc Dương, càr Lâm Đồng kung sùm gàr niam broă lơh lòt sền, sŏk sền bơnah brê geh Dà lơgar dê jàu atbồ sền gàr. Ồng pà gĭt ală nam pa do, khà priă dờp geh bơh broă tă tơm priă drơng  broă tiah brê ngai sơlơ geh gơguh, cèng wơl priă lơh geh sùm ai hìu bơnhă in den broă lơh atbồ sền gàr brê geh sền là broă lơh tờm bơh làng bol tàm thôn dê.

Ồng Cil Yŭ Ha Giảng, đơs: “Làng bol he dê wă ngan bè brê, geh gơta gĭt wă he là cau dờp apah atbồ sền gàr brê den lòt sền brê pah ngai, lơh jat di. Bè lơh sa den pah ngai, pah nhai là he kis geh, priă dờp apah den gàr tơl ngui sa tàm hìu bơnhă, ờ geh bơta lơi suơ̆i ờ, tơl sa lơm, rài kis tơl niam. Geh priă jền den làng bol brơn brài ngan den broă sơng ka mờ sền gàr brê niam ngan”.

Tŭ do tàm càr Lâm Đồng, tơl lồ brê dờp apah atbồ sền gàr geh Dà lơgar tă tơm priă tàm khà lơyah ngăn rlau jơh là 445 rơbô đông dùl nam, uă ngan rlau jơh là 2 tơlak 723 rơbô đông dùl nam jat tiah dê. Ồng Bon Dảng Ha Ya Bình, ơm tàm thôn Dà Cháy, xã Dà Nhim, kơnhoàl Lạc Dương, càr Lâm Đồng pà gĭt, kờp bal tơl hìu bơnhă geh dờp priă apah sền gàr brê 25 lồ brê, mờ khà priă tă tơm do, uă hìu bơnhă rƀah là làng bol jơi bơtiàn dồ ết nă cau tàm ù tiah do dê neh brồ guh lik klàs rƀah, bơtàu tơnguh rài kis. Ồng Bon Dảng Ha Ya Bình, đơs:“Suơn chi là ờ geh rao, añ tŭ do kis là kơnờm tàm brê lơm. Lài do priă jền ết ngan mìng geh pơgăp 60 rơbô đông lơm, tŭ do den priă lơh geh bơh 40 tus 50 tơlak đong là brơn brài ngan, chờ hờp ngan. Den tàng, să tờm añ lơh ngan lơh bè lơi pơgồp bal mờ brê, mờ oh mi tàm Mpồl sền gàr brê nàng gàr brê  niam rlau tai, geh priă lơh geh sùm rlau, nàng lơh niam broă lơh bơh he dê neh geh Dà lơgar jàu”.

Bơdìh mờ ală mpồl lơh sa kă bro geh rơndăp broă lơh bơcri priă geh jàu mờ apah brê, càr Lâm Đồng tŭ do geh 28 mpồl tờm brê Dà lơgar, 3 mpồl bơtiàn, 4 mpồl cau, mờr 1 rơbô 500 hìu bơnhă geh jàu ù, jàu brê. Bal mờ hơ̆, geh pơgap 13 rơbô hìu bơnhă geh dờp apah sền gàr brê mờ dờp geh bơta kwơ bơh broă lơh tă tơm priă drơng tiah brê, uă ngan là hìu bơnhă làng bol jơi bơtiàn dồ ết nă cau. Jat ồng Đinh Hữu Đạo, Phó Kwang atbồ Mpồl sền gàr brê rcang gàr bồ tô dà Dà Nhim, broă ngui broă lơh tă tơm priă drơng broă tiah ƀrê neh lơh geh ală priă jền kơ̆ kơl jăp mờ sơlơ tơnguh tai kơnòl bơh làng bol jơi bơtiàn dồ ết nă cau tàm tiah do dê mờ broă lơh sền gàr mờ bơtàu tơnguh brê kơ̆ kơl jăp. Tàm ală nam do, brê rcang gàr lài bồ tô Dà Nhim neh ờ lời gơlik geh dơ̆ ồs sa lơi kơn jơ̆. Khà dơ̆ mus brê mờ bă brê gơtìp sơgràm kung gơmù uă ngan. Ồng Đinh Hữu Đạo, đơs: “Jat tàm ală broă lơh dong kờl dờp apah jat broă lơh tă tơm priă sền gàr brê ală nam pa do neh lơh geh priă jền gàr niam rài kis ngui sa pah ngai ai làng bol in. Priă lơh geh geh gơguh den làng bol geh nùs nhơm lơh is tàm broă pơgồp bal mờ ală mpồl, mpồl cau nàng tus bal lòt sền, sŏk sền brê kờp jơh bal tàm trồ mang. Tŭ gŏ dơ̆ mus brê, sơgràm ù brê den ndrờm yal ai ală anih kấp hơđơm in nàng mut bal bơsong di tŭ.  Tàm kàl prang nam 2023-2024 tàm bơnah brê bol añ ờ gơlik geh dơ̆ ồs sa brê lơi lơh hoàc huơr phan kwơ geh is tàm brê, hơ̆ là kơnòl mpồl cau dờp apah atbồ brê neh sền gŏ dơ̆ ồs sa mờ hòi jà is mpồl cau gơ sơ̆t ồs di tŭ”.

Lâm Đồng geh bă brê geh is pơgăp 538 rơbô lồ, khà chi che tàm brê lơh geh rlau 54 %. Tàm khà do, neh geh mờr 400 rơbô lồ brê geh tă tơm priă drơng broă tiah brê, geh 75% bă brê geh brê tàm jơh gùt càr dê. Broă dờp apah atbồ sền gàr brê mờ geh dờp bơta kwơ tơn bơh broă lơh tă tơm priă drơng broă tiah brê ờ mìng lơh geh broă lơh broă sa kơ̆ kơl jăp ai làng bol kis rềp brê in lơm mờ gam pơgồp bơnah kwơ màng tàm broă sền gàr mờ bơtàu tơnguh brê jat gùng dà kơ̆ kơl jăp ai tiah do in.