Gơwèt Rơndăp broă lơh dềt sồ 1, rơndăp broă lơh sồ 3 broă lơh jơnau kờñ Dà lơgar bơtàu tơnguh lơh sa- mpồl bơtiàn tiah làng bol jơi bơtiàn dồ ết nă cau mờ tiah kơh bơnơm tơngai dơ̆ 1 bơh nam 2021- 2025, mơya tus tŭ do broă dong kờl phe ai hìu bơnhă tus bal tam brê lơh sa mờ tam uă brê bơnơm ờ di dơm chi tàm càr Kon Tum kung gam ờ hềt gơtùi lơh jat. Do là broă geh cau ala mat Mpồl duh broă làng bol càr Kon Tum khoă 12 sền gròi, lùp mờ hơ jơnau lùp tàm pơrjum dơ̆ 7 gam geh bơyai lơh tàm ƀòn dờng Kon Tum.

Geh gơrềng tus ală bơta kòl yan pa đơs do, geh gĭt càr Kon Tum neh geh uă sră nggal yal ală Ƀộ, gah lơh broă Dà lơgar sồr bơto pơlam nàng tă bơsong. Mơya tus tŭ do ală Ƀộ, gah lơh broă Dà lơgar kung ờ hềt geh bơto pơlam ngan ngồn den tàng càr ờ hềt gơtùi lơh jat geh broă dong kờl phe ai hìu bơnhă tus bal tam brê mờ tam uă brê bơnơm ờ di dơm chi. Uă jơnau đơs bơh cau ala mat Mpồl duh broă làng bol càr Kon Tum dê đơs là, broă lơh broă, broă dong kờl geh mơya lơyài mut lơh tàm rài kis gam gơ rềng tus jơnau kờñ bơtàu tơnguh lơh sa- mpồl bơtiàn kung bè broă bơtàu tơnguh rài kis bơh làng bol dê.