Tàm hìu “Hìu ơm Kông đoàn” pa geh lơh gơs, bi Trần Đình Thu, mpồl 1, Sơnah ƀòn Khánh Xuân, ƀòn dờng Buôn Ma Thuột, càr Dăk Lăk chờ hờp mờ ngoh rơngăc ngan. Rài kis hìu nhă bi Thu kal ke ngan, să tờm bi lơh broă sền gàr tàm hìu bơsram kấp 2 Trần Hưng Đạo, ƀòn dờng Buôn Ma Thuột, priă geh ờ uă, pơ-ùr ờ geh broă lơh, 2 nă kòn dềt gam tàm sơnam bơsram sră.

16 nam do, jơh ală cau tàm hìu bi pal ơm kơnờm ing tàm hìu ơm bal bơh hìu bơsram dê. Tơnơ̆ mờ tŭ neh prăp priă, càn tai priă bơh ală cau tàm hìu nhă, bi blơi geh dùl bă ù, bi neh geh Liên đoàn Lao động ƀòn dờng Buôn Ma Thuột dong kờl 50 tơlăk đong bơh kes priă “Hìu ơm Kông đoàn” dê. Mpồl kwang atbồ hìu bơsram bal mờ ală cau pơgru tàm hìu bơsram kung dong kờl ai càn ờ sa priă cồng nàng bi geh tai priă lơh gơs hìu ơm niam, kơl jăp. Bi Trần Đình Thu pà git:  “Añ ala măt hìu nhă ưn ngài broă sền gròi bơh Liên đoàn Lao động, mpồl cau pơgru tàm hìu bơsram neh dong kờl, ai añ in càn mờ dong kờl añ lơh gơs hìu do, hìu nhă añ chờ hờp ngan. Bơh broă lơh do, añ kung kơ̆p kờñ Liên đoàn sền gròi rơlao tai tus mờ ală cau geh rài kis gơtìp kal ke bè añ dê”.

Nam pa Giáp Thìn nam 2024 là nam sơnrờp ngan mè mờ kòn lŏ Trần Mai Hương Giang, kis tàm Sơnah ƀòn Ea Tam, ƀòn dờng Buôn Ma Thuột geh wă rò satềp tàm hìu pa nùs nhơm. Lŏ Giang yal, mờ priă nhai bơh cau pơgru bơto kấp 1, mìng tơl nàng ngui tàm rài kis mờ ròng 2 nă kòn lòt bơsram. Uă nam do, 3 nă mè mờ kòn lŏ kis kơnờm tàm hìu mè bèp lŏ dê. Bồ nam 2023, lŏ geh mè bèp pà dùl bă ù mờ Liên đoàn Lao động ƀòn dờng Buôn Ma Thuột dong kờl dùl bơnah priă nàng lơh hìu. Kơnờm mờ hơ̆, mè mờ kòn lŏ Giang geh hìu dờng niam nàng ơm mờ iang nùs lơh broă. Lŏ Trần Mai Hương Giang pà git: “Añ dan ưn ngài tus jơh ală cau kông đoàn neh pơgồp bal dùl bơnah bơta pràn nàng dong kờl mè mờ kòn añ in geh hìu ơm nàng iang nùs lơh broă sa”.

Pa dờp 50 tơlăk đong priă dong kờl lơh hìu “Hìu ơm Kông đoàn” geh Liên đoàn Lao động càr Dăk Lăk jào pà, lŏ H’ Ngăm Niê, cau pơgru bơto tàm hìu bơsram mẫu giáo Hoa Thủy Tiên, xã Dliê Ya, kơnhoàl Krông Năng chờ hờp mờ ngoh rơngăc ngan. Lŏ H’ Ngăm pà git, uă nam do, hìu nhă lŏ kis tàm hìu mpàn neh sèt, ờ tơl niam nàng ơm. “Hìu ơm Kông đoàn” tus mờ hìu nhă lŏ là phan pà kwơ màng ngan, dong kờl lŏ geh tai bơta pràn nàng tam gơl rài kis. Lŏ H’ Ngăm, pà git: “Ưn ngài gơnoar atbồ neh ai tơl bơta niam nàng oh geh dờp priă ngai do. Oh chờ hờp ngan, mùl màl bơh lài tus tŭ do ờ hềt tŭ lơi geh khà priă lơi dờng bè do nàng dong kờl lơh hìu. Oh kờp dŭ lơh hìu tàm pơgăp 90 tơlăk đong. Bơdìh mờ priă dong kờl, tàm hìu gam di pơgăp 15 tơlăk đong mờ càn tai priă bơh oh mi cau ùr pơgăp 20 tơlăk đong”.

Broă lơh “Hìu ơm Kông đoàn” là broă lơh geh kwơ màng mùl màl gơwèt mờ rài kis bơh cau lơh broă dê, ală nam do, Liên đoàn Lao động càr neh đơng lam pràn kơl dang mờ bơto sồr ală kấp Kông đoàn bơyai lơh mblàng yal, lam sồr lơh geh kes priă “Hìu ơm  Kông đoàn”. Mìng kờp is bơh nam 2023 tus tŭ do, Liên đoàn Lao động càr neh dong kờl lơh pa mờ lơh niam wơl 129 nơm hìu “Hìu ơm Kông đoàn” mờ priă tă rơlao 5 tơmàn đong.

Mò Nguyễn Thị Lý, Phó Củ tịc Liên đoàn Lao động càr Dăk Lăk pà git bơh bồ nam tus tŭ do, gùt càr neh lơh pa geh 27 nơm hìu. Ală nhai gam tai tàm nam, ală kấp Kông đoàn càr Dăk Lăk geh hòi jà, dong kờl tai 73 nơm hìu “Hìu ơm Kông đoàn” nàng jào ai cau kông đoàn, cau lơh broă gơtìp kal ke bè hìu ơm in. Mò Nguyễn Thị Lý pà git: “Tàm tơngai tus, Liên đoàn Lao động càr neh pơn jăt tai đơng lam nàng lơh mùl màl ală tơngu me tờm tàm broă drơng gàr, sền gàr gơnoar, bơta kwơ di mờ adăt boh lam ai cau lơh broă in mờ tơnguh ală bơta pràn nàng lơh jăt broă drơng gàr niam rơlao ai cau lơh broă in. Dơ̆ bàr là pơn jăt tai tam gơl pa ală broă lơh drơng gàr nàng di pal mờ jơnau kơ̆p kờñ, broă kờñ bơh đoàn viên tàm ală tiah, tàm hơ̆ pơn jăt tai lơh jăt broă bơ̆t bơtàu kes priă dong kờl đoàn viên kông ñân, viên cứk lơh broă tàm càr Dăk Lăk nàng lơh niam broă lơh hìu ơm “Hìu ơm Kông đoàn”.

Ală hìu geh lơh mờ priă dong kờl “Hìu ơm Kông đoàn” tàm càr Dăk Lăk neh dong kờl uă đoàn viên, cau lơh broă geh rài kis gơtìp kal ke in geh lơh hìu ơm, pơgồp bal bơta pràn nàng brồ guh tàm rài kis.