Tàm ƀòn H'Bel, xã Ia Kdăm, kơnhoàl Ia Pa, càr Gia Lai, hìu bơnhă mò Kpă H’Mrat (deh nam 1974) là hìu bơnhă jŏ nam mờ geh ết ngan bơta pràn lik klàs rƀah. Hìu bơnhă 8 nă cau mơya ờ geh ù lơh sa. Cau lơh broă là cau klau mìng dùl lơm là bơ klau den gơtìp kòp tê jê să sùm. Bơta kơn jơ̆ lơh sa gơ ơn tàm pơnì pơ ùr mờ kòn ùr dờng mò dê.

Mò H’Mrat pà gĭt, bulah dờp geh uă bơta dong kờl bơh ală broă lơh bơh Dà lơgar mờ mpồl bơtiàn, mơya hìu bơnhă ờ hềt geh broă lơh lơi nàng lik klàs rƀah. Mò H’Mrat đơs: "Hìu bơnhă añ kal ke ngan, oh kòn uă mờ gam dềt. Añ sùm lòt broă apah nàng drơng tàm hìu bơnhă. Ờ geh ù lơh sa, ờ geh broă lơh kơ̆ kơl jap, geh tŭ oh kòn kòp jê mờ bol añ kung ờ tơl priă jền nàng blơi sơnơm tơm bal sơl den kal ke ngan”.

Dilah bè xã Chư Mố geh 34 hìu bơnhă kòn cau Jrai bè hìu bơnhă mò H'Mrát den  tàm xã Pờ Tó, kơnhoàl bal mờ Ia Pa, bơta ờ tơl ù lơh sa, gơ lam tus kal ke lik klàs rƀah gam kal ke rlau tai. Ồng Nguyễn Quốc Việt, Củ tịc Anih duh broă làng bol xã Pờ Tó, pà gĭt, tàm 6 thôn làng bol jơi bơtiàn dồ ết nă cau geh tus 214 hìu bơnhă rƀah, uă ngan là tài bơh ờ geh tơl ù lơh sa. Ờ tơl bơta gĭt wă drơng broă lơh sa lơh cồng nha bơh ală broă lơh gơmù rƀah ờ hềt uă. Ồng Nguyễn Quốc Việt, đơs: “Lik klàs rƀah kơ̆ kơl jăp den kung pal lơh tàm tơngai jŏ jòng lơm ờ gơtùi là ngai dùl ngai bàr ờ. Is ồn là ală hìu bơnhă tàm thôn Bi Giông, Bi Gia den bơta ờ tơl ù lơh sa là uă ngan. Kờñ bơtàu tơnguh lơh sa geh, kờñ lik klàs rƀah den pal geh ù lơh sa, ù tiah. Ai pah ngai mờ mìng kơ̆p tàm kàl tơnhào phan, lơh bàr pe ngai lơh broă apah den kal ke ngan. Tŭ do, làng bol tàm do kal ke bè tơl bơta. Bulah neh lơh bal mờ ală priă jền tàm ală broă lơh jơnau kờñ dà lơgar nàng dong kờl làng bol in bè hìu ơm, broă lơh sa”.

Kờp tus jơh nam 2023, jơh gùt càr Gia Lai gam rlau 31 rơbô 500 hìu bơnhă rƀah jat tơl rƀah uă bơta, geh khà 8,11%. Tàm hơ̆, uă ngan khà hìu bơnhă rƀah là làng bol jơi bơtiàn dồ ết nă cau. Mìng is kơnhoàl Ia Pa geh rlau 2 rơbô 174 hìu bơnhă rƀah, geh khà 15,26%. Uă hìu bơnhă kal ke geh ală bơta nàng lik klàs rƀah tài bơh ờ tơl ù lơh sa.

Tơngai pa do, kơnhoàl Ia Pa, neh jơh nùs mblàng yal, hòi jà làng bol mờ ờ gŏ di tăc ù lơh sa. Mơkung bơh ù ờ gam tai, kơnhoàl dan mờ Anih duh broă làng bol càr Gia Lai ai wơl bă ù bơh ală mpồl lơh sa kă bro ngui ờ geh cồng nha, tơnơ̆ hơ̆ jàu ală tiah in nàng ai ù ai làng bol in. Tŭ do, broă lơh tềng đăp mat là tơrgùm hòi jà bơcri priă nàng kờñ lơh geh broă lơh bơtàu tơnguh tàm bơtàu tơnguh lơh sa, bơsong broă lơh tàm ală tiah dê. Ồng Ksor Suy, Phó Củ tịc Anih duh broă làng bol kơnhoàl Ia Pa, càr Gia Lai, pà gĭt: "Tơngai pa do kơnhoàl hòi jà ală cau bơcri priă, is ồn lơh ală hìu măi lơh gơlik phan lơh geh bơh suơn sre nàng lơh geh ală bơta tăc bro phan bơna, lơh geh broă lơh ai làng bol in. Bơh hơ̆, dong làng bol geh priă lơh geh kơ̆ kơl jăp, tơnguh priă lơh geh, tơn jơh hìu bơnhă rƀah kơ̆ kơl jăp, geh cồng nha. Rơndăp ù tiah kơnhoàl ù tiah, tiah lơh sa mờ măi mok, mblàng yal làng bol lòt bal mờ gơnoar atbồ ală tiah nàng lơh geh bơta ring bal, kơ̆ kơl jăp, lơngăp lơngai cíñ trị”.