Nàng dong ală kơnòm bơsram geh rài kis kal ke in iang nùs bơsram wơl jơnau bơsram pơrlòng jơh bơsram kấp pe, càr Kon Tum neh geh uă broă lơh dong kờl ală kơnòm in. Tàm rlau 5 rơbô nă kơnòm pơrlòng bơh càr Kon Tum dê tus bal cih mat dan pơrlòng jơh bơsram kấp pe nam do, geh rlau 1 rơbô 100 nă kơnòm bơsram geh rài kis kal ke, neh geh ală hìu bơsram tàm càr dê lơh geh ală bơta bơsram tơrgùm wơl jơnau bơsram tàm Hìu bơsram. Mìng is gơwèt mờ ală hìu bơsram kấp pe Jơi bơtiàn Ơm kis mờ bơsram tàm hìu bơsram tơn, ală kơnòm bơsram geh ai jơh bal tiah ơm mờ dong kờl priă sa sào.

Nàng geh priă jền dong kờl ală kơnòm bơsram in, ală kơnhoàl, ƀòn dờng bơh càr Kon Tum dê tă bơh kes priă mờ hòi jà tă pơgồp bal dong kờl, tus tơngai tŭ do geh 430 tơlak đong. Tŭ do, càr Kon Tum gam pơn jat tai hòi jà ală mpồl lơh broă, cau geh nùs nhơm niam, sơlơ tơnguh tai dong kờl ală kơnòm bơsram geh rài kis kal ke. Sở Giáo dục mờ Đào tạo càr Kon Tum mờ ală tiah, ƀan, ngàñ bơh càr dê rơ̆p tơrgùm priă jền, dong kờl tơl bơta gơwèt mờ ală kơnòm tus dì tŭ tơn jơh dơ̆ pơrlòng. Bơta sơm bat tê bal bơh ală kấp, ngàñ dê là dùl bơta pơndờm pơnđiang dờng ngan gơwèt mờ cau pơgru mờ kơnòm bơsram nàng pơn jat tai tơnguh uă bơta niam bơsram wơl jơnau bơsram tàm tơngai gơ jal ngan.