Tàm hìu ơm ơnàng 70 thơk vuông neh lơh jơh ală broă lơh bơh sơn rờp mờ gam rcang mut lơh broă lơh lồi dŭt nàng lơh sir tàm ƀòn Bôn Chơ Ma, xã Ia Trôk, kơnhoàl Ia Pa, càr Gia Lai, bi Siu Shin Cha, 25 sơnam, brờn brài uă ngan. Bi đơs, hìu ơm lơh tềl broă lơh lơh sa bơh hìu bơnhă dê, bơh gơwèt hìu bơnhă rƀah tus lik klàs rƀah ngan ngồn. Jat bi Siu Shin Cha, tŭ tơngai niam neh tus mờ hìu bơnhă bơh nam 2020, tŭ càn geh 50 tơlak đong bơh Ngân hàng Cíñ sác xã hội dê: "Kơnờm priă càn do mờ hìu bơnhă añ geh ală bơta nàng bơtàu tơnguh lơh sa. Hìu bơnhă blơi tai 2 nơm kơnrồ me, tŭ do ròng neh geh 8 nơm kòn rao mờ pa lơh tai hìu ơm kơ̆ kơl jăp. Kơnờm geh priă tăc kơnrồ mờ hìu bơnhă añ geh tai priă jền nàng lơh sa, tam tai ală tờm jràu, blơi rơndeh kông nông”.

Broă lơh lik klàs rƀah bơh hìu bơnhă ồng Rơ Chăm Hà, deh nam 1962, ơm tàm thôn Hbel, xã Ia Kdăm kung geh dong kờl bơh priă càn dong kờl. Hìu bơnhă geh 5 nă cau mìng geh hìu ơm 24 thơk vuông geh lơh bơh priă càn dong kờl mờ 2 sào sre lơh kòi. Tơl priă jền tă ngui tàm hìu bơnhă ndrờm gơwèt tàm broă lơh lòt lơh broă apah tŭ geh tŭ ờ. Jơh nùs lơh ngan lik klàs rƀah, nam 2021, ồng Hà khin cha càn 50 tơlak đong bơh Ngân hàng Cíñ sác Xã hội bơh broă lơh càn priă tàm xã. Ồng ngui priă hơ̆ nàng blơi tai 2 nơm kơnrồ mờ ngui jơh ù gời gùt dar hìu nàng tam nhơ̆t. Bơnah priă gam wơl ồng ơpah ù tam blùm blàng nàng tơnguh tai priă lơh geh. Tŭ do, ồng Hà ờ mìng lik klàs rƀah lơm mờ gam geh rài kis hờm ram rlau tai: "Sơnrờp añ blơi 6 nơm sur, tàm tŭ ròng kung chơ̆t 1 nơm sơl. Tơnơ̆ hơ̆, añ blơi tai dơ̆ 2, ròng  mờ tơnguh mpồl sur tus 18 nơm. Tŭ tăc den geh priă nàng lơh hìu, blơi tai 4 lồ 4 sào ù nàng geh ù tam phan, geh tŭ lơh kòi, tam tờm jràu. Priă lơh geh hìu bơnhă dê geh sùm đau, geh priă rcang ai oh kòn in tơnơ̆ do”.

 Ồng Trần Ánh Tôn, Kwang atbồ Ngân hàng Cíñ sác Xã hội kơnhoàl Ia Pa, càr Gia Lai, pà gĭt: Tàm kơnhoàl Ia Pa, geh mờr 2 rơbô 200 hìu bơnhă rƀah, uă ngan là ală hìu bơnhă jơi bơtiàn dồ ết nă cau. Nàng geh tơl 100% hìu bơnhă rƀah càn priă dong kờl ờ sa priă cồng uă, 168 mpồl tềm pềr mờ càn priă tàm 9 tiah lơh broă neh lam lơh sac rơ wah mờ dong kờl hìu bơnhă rƀah gĭt mờ broă càn priă, lơh sir sră nggal. Bơh nam 2021 tus tŭ do, neh geh 6 rơbô 610 hìu bơnhă tàm kơnhoàl dê lik klàs rƀah kơnờm ngui geh cồng nha priă càn dong kờl. Ồng Trần Ánh Tôn, đơs:“Cơldŭ lơh broă neh tơrgùm ai lài priă càn ai 03 broă lơh tơrmù rƀah, dong kờl hìu bơnhă rƀah mờ hìu bơnhă pa lik klàs rƀah. Nàng gàr niam ală cau in ờ gơtìp ờ tơl priă càn, tŭ geh jơnau sồr mờ tơl ală bơta, cơldŭ lơh broă rơ̆p ai lài hìu bơnhă làng bol jơi bơtiàn in càn mờ priă dong kờl mhar mờ di tŭ nàng bơcri priă lơh sa kă bro tàm tiah do dê. Kờp tus tŭ do, kờp jơh priă dồs jơng kah bơh 3 broă lơh lik klàs rƀah tàm cơldŭ lơh broă dê neh geh rlau 166 tơmàn đong mờ 3 rơbô 900 dơ̆ hìu bơnhă càn, geh khà 36,7% kờp jơh priă dồs”.

Tàm 10 nam càr Gia Lai lơh jat Jơnau sồr sồ 40 nam 2014 bơh Ƀan Ƀí thư, bè sơlơ tơnguh tai đơng lam bơh Đảng dê gơwèt mờ càn priă dong kờl, neh geh 156 rơbô dơ̆ hìu bơnhă rƀah tàm càr geh càn priă, kờp jơh 7 rơbô 600 tơmàn đong. Bơh hơ̆, 55 rơbô 600 hìu bơnhă neh lik klàs rƀah. Priă càn dong kờl mpồl bơtiàn kung là priă jền kwơ màng nàng càr Gia Lai in lơh rlau 242 rơbô broă lơh dà sàng goh mờ rlau 3 rơbô nơm hìu ai hìu bơnhă rƀah tàm ală xã kal ke uă ngan in. Jat jơnau đơs bơh Tỉñ ủy càr Gia Lai dê, priă càn dong kờl là “bơta chồl tơnguh” dong cau geh sră dong kờl bơh dà lơgar mờ cau ờ pràn tàm càr in bơtàu tơnguh lơh sa, bơtàu tơnguh rài kis, pơgồp bơnah tơrmù rƀah kơ̆ kơl jăp. Do kung là gam là priă jền kwơ màng tàm tơngai tus, tă pơgồp tàm broă bơt bơtàu ƀòn lơgar pa, bơtàu tơnguh lơh sa- mpồl bơtiàn tiah làng bol jơi bơtiàn dồ ết nă cau mờ tiah kơh bơnơm tàm càr Gia Lai in.