Việt Nam mờ Lào geh bal gùng nhàr lơgar jòng pơgap 2 rơbô 340 kơi sồ lă jòng bơh 10 càr lơgar Việt Nam mờ 10 càr bơh lơgar Lào dê. Bàr gah geh 8 yô mpồng tiah nhàr lơgar ală lơgar, 7 mpồng tiah nhàr lơgar Dà lơgar, 18 gùng pờ tiah nhàr lơgar mờ tiah lơh sa kwơ màng krơi is ngan.

Tàm dơ̆ pơrjum ală ling geh griăt kơnòm să Mpồl ling sền gàr tiah nhàr lơgar Việt Nam mờ ling geh griăt kơnòm să bơh Tổng kụk Lơngăp lơngai, Kảñ sát- Ƀộ Kwang àng lơgar Lào sền wơl bal cồng nha pơgồp bal lơh broă tàm tơngai pa do. Đơs nền gơnoar broă kwơ màng bơh mpồl ling geh griăt kơnòm să dê tàm broă tă pơgồp bal jơnau đơs, gàr niam broă lơh pơgồp bal lam lơh jat ală kơnòl broă. Thượng uý Nguyễn Văn Quang, Dong broă lơh broă làng bol, Mpồl pơlam tàp, Cơldŭ lơh broă cíñ trị, Mpồl ling sền gàr tiah nhàr lơgar càr Kon Tum, pà gĭt: “Geh tus bal tìp mat lơh kwèng là tŭ tơngai niam nàng añ mờ mpồl ling geh griăt kơnòm să in tìp mat, cribơyai mờ tơnguh uă bơta gĭt wă, bơtàu tơnguh rlau tai broă lơh atbồ mờ sền gàr tiah nhàr lơgar. Să tờm añ ai geh bơta mờng chài lơh broă pal rcang lài pơgồp bal mờ mpồl ling geh griăt kơnòm să lơgar Lào, bơh hơ̆ di tŭ sền gŏ ală kai, broă lơh, ală broă lơh lơh broă bơh ală cau dê nàng di tŭ tă pơgồp bal jơnau đơs ai gah đơng lam in ai tơlik ală gùng dà broă lơh, broă lơh rcang lài kơryan mờ ală cau lơh tìs”.

Bơh bồ nam 2023 tus tŭ do, ală ling geh griăt kơnòm să Mpồl ling sền gàr tiah nhàr lơgar Việt Nam mờ ling geh griăt kơnòm să Tổng kụk Lơngăp lơngai, Kảñ sát- Ƀộ Kwang àng lơgar Lào neh lơh sră nggal ai 499 mpồl kwang bàng 2 lơgar in lòt rê lơh broă; pơgồp bal lòt sền 264 dơ̆ mờ gĭt nđờ rơbô dơ̆ kwang bàng, cau ling tus bal; pơgồp bal kŭp, lơh glài rlau 1 rơbô 500 dơ̆ mờ rlau 2 rơbô 400 nă cau tìs....

Jat Đại tá Nguyễn Thanh Hải, Phó Củ ñiệm Cíñ trị Mpồl ling sền gàr tiah nhàr lơgar Việt Nam, mpồl ling geh griăt kơnòm să là rơnàng tàm pơrdờn bơh mpồl ling phàu crong 2 lơgar dê, ală broă lơh tìp mat lơh kwèng geh gơtha kwơ màng ngan tàm broă sền gàr, bơt bơtàu bơta gĭt gơ̆p lơh bơyô bal bơh yau, tam klăc bal kwơ màng đah Việt Nam mờ Lào:“Tìp mat lơh kwèng ling geh griăt kơnòm să Mpồl ling sền gàr tiah nhàr lơgar Việt Nam, ling geh griăt kơnòm să Tổng kụk Lơngăp lơngai, Kảñ sát lơgar Lào tŭ do là cơng tàng lơh geh ngan broă lơh pơgồp bal đah Ƀộ Tư lệñ Mpồl ling sền gàr tiah nhàr lơgar mờ Tổng kụk Lơngăp lơngai, Kảñ sát lơgar Lào. Tơngŏ bơta sền gròi, pin dờn dờng ngan bơh kwang đơng lam bồ 2 mpồl ling dê gơwèt mờ rơnàng kơnòm să, lơh geh tŭ tơngai niam nàng rơnàng kơnòm să 2 mpồl in tìp mat, tìp mat lơh kwèng, cribơyai mờng chài lơh broă, mơkung kah wơl bơhiàn pơn rơ ngan, dờng màng ngan, gĭt oh gĭt mi đah bơta gĭt gơ̆p Việt Nam mờ Lào dê”.

Kwang atbồ mpồl 2 gah neh ring bal bàr pe tơngume mờ pơlam gùng dà ală kơnòl broă tờm tàm tơngai tus gơwèt mờ mpồl sĩ quan kơnòm să Mpồl ling sền gàr tiah nhàr lơgar Việt Nam mờ ling geh griăt kơnòm să mpồl Lơngăp lơngai, Kảñ sát lơgar Lào dê. Tàm hơ̆, sền gròi sơlơ tơnguh tai cribơyai jơnau yal geh gơrềng, pơgồp bal, gàr niam lơh jat niam rlau tai Hiệp địñ bè kơrnoat atbồ tiah nhàr lơgar mờ mpồng tiah nhàr lơgar tềng hơđang ù gờl đah Cíñ phủ lơgar Kộng hòa xã hội củ nghĩa Việt Nam mờ Cíñ phủ lơgar Kộng hòa zân củ Ñân zân Lào; atbồ, gròi sền broă lik mờ mut tàm lơgar, lòt gan tiah nhàr lơgar, ơm kis ing, lòt rê bơh làng bol tơl lơgar dê; pơgồp bal tam dră rcang lài geh cồng nha ală cau lơh tìs, lơh geh tiah ơm kis lơngăp lơngai mờ lơh geh ală bơta ƀuơn ngan rlau jơh ai làng bol mờ ală mpồl lơh sa kă bro 2 lơgar in lòt rê gan mpồng nhàr lơgar, tiah nhàr lơgar, lơh broă bal bơtàu tơnguh lơh sa, tìp mat lơh kwèng niam chài mờ còp cau jơi nòi bal.

Lài hơ̆, mpồl kwang bàng sĩ quan kơnòm să 2 gah neh bơyai lơh ală broă lơh tam tờm chi lời kir sơnrai; jàu pà priă bơsram ai kơnòm bơsram rƀah sơr lèt gan kal ke; mblàng yal, bơto bơtê adat boh lam ai làng bol 2 gah nhàr lơgar gơwèt càr Kon Tum, lơgar Việt Nam mờ càr Attapư; bơyai lơh tìp mat lơh kwèng niam chài đơs crih tam ya, tàm pơrlòng tàp pràn să jan, lòt sền jòi gĭt bàr pe tiah lòt nhơl, niam chài bơh yau jơi bơtiàn tàm ù tiah ƀòn dờng Kon Tum dê.