Gơwèt mờ 135 hìu bơnhă, jơi bơtiàn dồ ết nă cau Jeh- Triêng ơm tàm thôn Dục Nhầy 1, xã tiah nhàr lơgar Đăk Dục, kơnhoàl Ngọc Hồi, càr Kon Tum, den ală kwang bàng, cau ling pôs đồng ling sền gàr tiah nhàr lơgar Dục Nông bè là oh mi bal tàm hìu bơnhă. Jơh ală làng bol tàm thôn ndrờm lời ală nùs nhơm niam bơnĕ ngan rlau jơh pah tŭ đơs tus kwang bàng, cau ling sền gàr tiah nhàr lơgar dê. Bi A Luật, dùl nă làng bol tàm thôn đơs bè do:“Pôs đồng ling sền gàr tiah nhàr lơgar sền gròi tus ală hìu bơnhă, hìu bơnhă kal ke. Dong kờl den hơ̆ sồng dờp ròng bàr pe nă kơnòm dềt kòn đời. Sùm sền gròi uă ngan tus mờ làng bol tàm ù tiah xã Đắk Dục. Añ gŏ là ală cau ling, mpồl ling sền gàr tiah nhàr lơgar tàm do rềp mềr ngan, bơnĕ bơnài ngan, rềp mềr ngan".

Bi Xiêng Thị Tuý, Ƀí thư Ci ƀộ, Kwang atbồ thôn Dục Nhầy 1, pà gĭt, 3 nam do Mpồl đơng lam Pôs đồng ling sền gàr tiah nhàr lơgar Dục Nông sồr Thiếu tá Dương Văn Lương lòt pơrjum bal tàm Ci ƀộ thôn. Lơh jat niam nùs nhơm geh kơnòl bơh cau ling sền gàr tiah nhàr lơgar dê, thiếu tá Dương Văn Lương neh tă pơgồp jơnau đơs ai Ci ƀộ in tơlik ală Jơnau lơh nền tàm pơrjum lơh geh bơta tam gơl niam ngan tàm broă lơh bơt bơtàu Đảng mờ bơtàu tơnguh rài kis làng bol dê. Ci ƀộ thôn Dục Nhầy 1 tơmŭt geh 2 nă đảng viên pa tơnguh khà đảng viên Ci ƀộ gơguh tus 19 nă, tơrmù khà hìu bơnhă rƀah jơh gùt thôn gơmù mìng gam 6 hìu bơnhă. Bi Xiêng Thị Tuý, đơs: “Bi tus bal jơh nùs ngan tă pơgồp jơnau đơs bơt bơtàu Ci ƀộ dong Ci ƀộ lơh broă rơndăp lơh den hơ̆ sồng Jơnau lơh nền tàm pơrjum bơh Ci ƀộ mờ tơngume pơrjum li la rlau tai, uă rlau tai gơ hòi gơ jà đảng viên. Bơdìh mờ ală broă lơh hơ̆, bi kung jơh nùs ngan dong kờl làng bol. Bơh tŭ geh ling geh griăt geh sồr tus bal pơrjum tàm Ci ƀộ thôn den thôn kung lơh geh thôn sàng goh kơ̆ kơl jăp, pràn kơl dang, den ờ gam geh hìu bơnhă lơh tìs mờ adat boh lam tai”.

Nàng sơlơ lơh niam rlau tai nùs nhơm ling klàng làng bol, bơt bơtàu “nùs nhơm rcang lài” bơh làng bol dê kơ̆ kơl jăp, bơh nam 2020 tus tŭ do Gah đơng lam Mpồl ling sền gàr tiah nhàr lơgar càr Kon Tum neh ntrờn ling geh griăt lơh broă ờs mờng tàm ală Pôs đồng ling sền gàr tiah nhàr lơgar geh sồr tus bal pơrjum tàm jơh 13 xã tàm tiah nhàr lơgar rềp nhàr lơgar mờ lơgar Lào mờ Campuchia. Tàm hơ̆, geh 4 nă kwang bàng Pôs đồng dê tus bal tàm kấp ủy 4 kơnhoàl, 13 nă kwang bàng tus bal kấp ủy 13 xã tiah nhàr lơgar; 17 nă kwang bàng geh pồ mut tàm Mpồl duh broă làng bol kấp càr, kơnhoàl, xã dê...

Trung tá A Ngọc Chiến, Pôs đồng ling sền gàr tiah nhàr lơgar Dăk Nhoong geh Gah đơng lam mpồl ling sền gàr tiah nhàr lơgar càr Kon Tum sồr tus bal atbồ gơnoar broă Phó Ƀí thư Đảng ủy, Atbồ Anih duh broă lòt sền xã tiah nhàr lơgar Đăk Nhoong, kơnhoàl Đăk Glei, pà gĭt: “Añ neh tă pơgồp jơnau đơs ai Đảng ủy in tơlik Jơnau lơh nền tàm pơrjum đơng lam mờ sồr Anih duh broă làng bol, Mặt trận Dà lơgar mờ ală mpồl Cíñ trị mpồl bơtiàn dồ nùs mut lơh bal sền wơl ală broă lơh bơtàu tơnguh lơh sa, is ồn là broă lơh jat tơn jơh ală bơhiàn yau bơr ngơl gơla nàng lơh ai làng bol jơi bơtiàn dồ ết nă cau in brồ guh lik klàs rƀah kơ̆ kơl jăp. Bol añ sền gĭt là tam tờm chi lơh sơnơm dơ̆ 1 là kơnuh sơnơm Ngọc Linh, dơ̆ 2 là bol añ rơ̆p lam lơh tam bơsềt liñ ci nàng lơh geh bơtàu tơnguh priă lơh geh lơh sa uă”.

Mờ nùs nhơm “Pôs đồng là hìu, tiah nhàr lơgar là ƀòn tờm, làng bol ală jơi bơtiàn là oh mi jơi nòi bal” mpồl ling sền gàr tiah nhàr lơgar càr Kon Tum neh geh uă broă lơh geh ngan, ngan ngồn sơlơ lơh niam rlau tai nùs nhơm ling klàng làng bol tiah nhàr lơgar. Pơn rơ bè broă “Bơt bơtàu thôn Đăk Ga, xã Đăk Nhoong, kơnhoàl Đăk Glei hờm ram tơl làm, kơ̆ kơl jăp pràn kơl dang, lơngăp lơngai”; ală broă lơh drơng rài kis pah ngai ai làng bol in; bè: hìu măi pờ tơlik đèng dà dềt Đăk Giao- Đăk Long; dà ngui sa hòr is Bờ Y, Đăk Long, Đăk Blô; broă lơh drơng broă, lơh oh mi mờ ală hìu bơnhă geh rài kis kal ke dong brồ guh lik klàs rƀah; dong kờl 74 nă sau tàm broă lơh “Dong kờl oh lòt bơsram”, 15 nă sau kòn ròng Pôs đồng ling sền gàr tiah nhàr lơgar... Bơh bơta lòt bal, dong kờl bơh kwang bàng, cau ling sền gàr tiah nhàr lơgar dê, rài kis làng bol tàm tiah nhàr lơgar càr Kon Tum gam ngai sơlơ tam gơl, nùs nhơm rcang lài bơh làng bol dê ngai sơlơ kơ̆ kơl jăp mờ kơnhăp rlau tai.