Jơnau yal bơh Ƀộ Ling klàng dê, ală mpồl ling klàng bơh kấp Mpồl ling dờng di mơ rlau hơđang neh lam lơh rlau 1 rơbô 800 broă lơh bơt bơtàu gờm chờ tơngkah kir sơnrai, kờp priă rlau 260 tơmàn đong; tŭ do neh lơh sir rlau 1 rơbô 400 broă lơh mờ rlau 400 broă lơh bơt bơtàu gam geh lơh jat. Ală anih lơh broă, mpồl lơh broă, ală tiah pơgồp bal lam lơh dong kờl priă jền lơh niam wơl, lơh pa tiah duh khoai (tàm hìu bơnhă) ai 32 tàm 34 nă cau ling Mpồl ling klàng Việt Nam mblàng yal ling tơngklàs, mờ kờp jơh khà priă 2 tơmàn 560 tơlak đong. Tŭ do neh lơh sir 24 hìu bơnhă, gam 8 hìu bơnhă gam wơl rơ̆p lơh sir lài mờ ngai 22 nhai 12 nam do.

Jơh gùt ling klàng lam lơh dong kờl priă jền, lơh pà hìu bơta nđàc, “Hìu tam klăc dờng” “Hìu cau lòt ling bal”, tơn jơh hìu lơh ing, hìu ồm sèt ñhăt dà mìu... ai làng bol ală tiah in, tus tŭ do lam lơh rlau 24 rơbô 900 nơm hìu. Tàm hơ̆, ai mut ơm hìu pa tàm ngai 22/12 là 15 rơbô 600 nơm hìu, ală hìu gam wơl hơ pơggon lam lơh pơn jat tai tàm nam 2025, mờ kờp jơh khà priă rlau 1 rơbô 624 tơmàn đong. Thiếu tướng ồng Đoàn Quang Hòa, Kwang atbồ Kụk Cíñ sác, Tổng kụk Cíñ trị Ling klàng làng bol Việt Nam pà gĭt: “Mìng is dong kờl lơh hìu tam klăc dờng, hìu cau lòt ling bal bơh Tổng kụk Cíñ trị dê lam lơh tàm Định Hóa, Thái Nguyên nhai 11/2023, neh geh 40 anih lơh broă, mpồl lơh broă jơh gùt ling klàng neh hơ dong kờl neh lơh 3 rơbô 857 nơm hìu mờ kờp jơh priă lơh là 242 tơmàn 500 tơlak đong. Tơnơ̆ dơ̆ lam lơh, ală anih lơh broă, mpồl ling jơh gùt ling klàng pơn jat tai mblàng yal, hòi jà ală priă jền, dong kờl ai ală cau geh bơta  kal ke bè hìu ơm. Khà hìu tam klăc dờng, hìu cau lòt ling bal tŭ do là 12 rơbô 863 nơm hìu, hơ̆ là sơrlèt broă jàu 4 rơbô 863 nơm hìu”.

Ƀộ Ling klàng kung neh sồr dong kờl priă Ƀiñ đoàn 15 in lơh pà 4 nơm hìu Rông Niam chài ai tiah do dê in mờ khà priă là rlau 12 tơmàn đong. Ling tiah 1 dong kờl lơh broă lơh ƀòn lơgar pa tàm xã Tam Kim mờ Hoa Thám, kơnhoàl Nguyên Bình, càr Cao Bằng mờ kờp jơh priă bơcri lơh rlau 70 tơmàn đong. Đại tá Nguyễn Xuân Thủy, Phó Kwang atbồ Kụk Mblàng yal Pơlam tàp, pà gĭt tai: “Ƀộ Ling klàng dong kờl lơh Hìu bơsram kấp 1 mờ kấp 2 Điện Biên tàm xã Thanh Xương, kơnhoàl Điện Biên, càr Điện Biên mờ khà priă 120 tơmàn đong; dong kờl 10 broă lơh bơt bơtàu ai ală mpồl ling klàng in tus bal tơrmù rƀah kơ̆ kơl jăp; bơt bơtàu ƀòn lơgar pa; lơh broă lơh bơt bơtàu drơng làng bol in lòt rê bơh kes priă tài cau rƀah mờ khà priă là 23 tơmàn 800 tơlak đong”.

Rcang ai dơ̆ tơngkah kir sơnrai 80 nam ngai tơnggơs Mpồl Ling klàng làng bol Việt Nam, 35 nam Ngai chờ jơh gùt làng bol sền gàr dà lơgar, pa do, Mpồl mblàng yal mờ bơto bơtê Dà lơgar, Ƀộ Ling klàng, Ƀộ Yal tơngĭt jơnau mờ Mblàng yal jơnau pơgồp bal bơyai lơh pơrjum ƀăo yal ală broă lơh tơngkah kir sơnrai.

Jat mờ hơ̆, uă broă lơh pơn rơ geh kwơ ngan bè Tổng kụk Cíñ trị Mpồl ling klàng làng bol Việt Nam đơng lam, pơgồp bal mờ Đoàn Ơruh pơnu Kộng sản Hồ Chí Minh Dà lơgar lam lơh dơ̆ pơrlòng jòi gĭt bơhiàn yau “80 nam Ngai tơnggơs Mpồl ling klàng làng bol Việt Nam mờ 35 nam Ngai chờ jơh gùt làng bol sền gàr dà lơgar” geh uă ngan đoàn viên, ơruh pơnu lơh jat mờ tus bal. Dơ̆ pơrlòng cih jơh gùt làng bol “Jơnau yal tàm mpồl ling dờng” mờ pơrlòng lơh video “Cau ling añ gơboh ”. Dơ̆ bơyai lơh đơs crih tam ya ờs mờng bè tơngume jơh gùt làng bol sền gàr tiah nhàr lơgar mờ bơyai lơh pơrlòng đơs crih tam ya làng bol mpồl ling phàu crong mờ ơruh pơnu, cau bơsram dờng dơ̆ 10. Anih duh broă ling klàng Dà lơgar, Ƀộ Ling klàng neh sồr ală anih lơh broă, mpồl ling tàm jơh gùt ling klàng rcang lài pơgồp bal mờ ală anih lơh broă yal tơngĭt jơnau, sră ƀăo Dà lơgar mờ ală tiah lơh pràn mblàng yal bè ling klàng, sền gàr dà lơgar, mblàng yal bè Mpồl ling klàng; lam lơh dơ̆ pơrlòng uă ngan “Pơn yờ să bơhiàn yau- Cih tai cồng nha lơh geh bơh tam lơh- di pal mờ măt hòi Cau ling Wa Hồ”.

Is ồn di dơ̆ tơngkah kir sơnrai, Ƀộ Ling klàng bơyai lơh Dơ̆ ràng tơlik sền gàr Dà lơgar ală lơgar Việt Nam dơ̆ 2 tàm ƀlàng rơndeh par Gia Lâm, ƀòn dờng Hà Nội kờp dŭ bơh ngai 19 tus ngai 22 nhai 12, mờ lơh dờng, bă tiah ràng tơlik dờng rlau pơndrờm mờ dơ̆ bơyai lơh dơ̆ 1. Dơ̆ tơngkah kir sơnrai 80 nam Ngai tơnggơs Mpồl ling klàng làng bol Việt Nam mờ 35 nam Ngai chờ jơh gùt làng bol sền gàr Dà lơgar rơ̆p geh bơyai lơh yŭ rơyùm tàm drim ngai 20/12/2024 tàm Anih tờm Pơrjum Dà lơgar.