Pa do, tàm xã Ia Chía, kơnhoàl Ia Grai, Gah đơng lam Mpồl ling sền gàr tiah nhàr lơgar càr Gia Lai neh pà phan, priă jền, sră giáo khoa, sră cih, phan ngui bơsram sră tàm rơndăp broă lơh “kwang bàng cau ling Mpồl ling klàng dong kờl oh lòt bơsram”. Lơh jăt rơndăp broă lơh do, Gah đơng lam Mpồl ling sền gàr tiah nhàr lơgar càr Gia Lai neh dờp dong kờl 193 nă kơnòm bơsram bơh ơdŭ 1 tus ơdŭ 12 tàm ù tiah ală xã tiah nhàr lơgar tàm càr Gia Lai dê. Di dơ̆ do, ală Pôs đồng ling sền gàr tiah nhàr lơgar rơ̆p dùl ròt bal pà priă mờ pà phan ai ală kơnòm bơsram tàm broă lơh do in, tàm hơ̆ geh 2 tơlak priă blơi sră giáo khoa, sră cih, phan ngui bơsram sră, ào mpha mut nam bơsram pa mờ  6 nhai priă sào sa. Kờp jơh priă lơh rơndăp broă lơh do là rlau 1 tơmàn đong, pơgồp bơnah dong ală kơnòm bơsram tàm ù tiah nhàr lơgar in sơr lèt gan rài kis kal ke. Bi Nguyễn Thị Dung, ơm tàm ƀòn Beng, xã Ia Chía, là mè kơnòm bơsram geh mat tàm dơ̆ pà phan geh lơh ngai do, đơs: “Ưn ngài Mpồl ling sền gàr tiah nhàr lơgar mờ ală kấp gơnoar atbồ geh ală bơnah phan pà geh ngan ngan tàm tiah nhàr lơgar Ia Chía in, ală bơnah phan geh kwơ uă ngan, dong bol añ tơrmù ƀà bơta kơn jơ̆ bè lơh sa tàm gùng lòt ai ală sau in lòt bơsram”.

Bồ nam bơsram pa, Gah đơng lam Mpồl ling sền gàr tiah nhàr lơgar càr Kon Tum pà gĭt, jơh ală khà priă mờr 2 tơmàn đong dong kờl ală kơnòm bơsram geh rài kis kal ke tàm tiah nhàr lơgar neh geh ală Mpồl lơh broă bơh Gah đơng lam Mpồl ling sền gàr tiah nhàr lơgar càr Kon Tum mờ mpồl ling ƀòn lơgar jàu tơn tàm tê ală kơnòm in. Khà priă do dong kờl ai 253 nă kơnòm bơsram gơwèt rơndăp broă lơh “Kwang bàng, cau ling Mpồl ling klàng dong kờl oh lòt bơsram”. Ală kơnòm ndrờm geh rài kis kal ke hìu ơm tàm 13 xã tiah nhàr lơgar gơwèt 4 kơnhoàl bơh càr Kon Tum dê, tàm hơ̆ geh: Đăk Glei, Ngọc Hồi, Sa Thầy mờ Ia H’Drai. Bal mờ hơ̆ 74 nă kơnòm bơsram, tàm hơ̆ geh 6 nă kơnòm tàm tiah nhàr lơgar bơdìh tiah nhàr lơgar đah lơgar Lào mờ Campuchia gơwèt broă lơh “Dong kờl oh lòt bơsram” geh Gah đơng lam Mpồl ling sền gàr tiah nhàr lơgar càr Kon Tum dong kờl 110 tơlak đong.

Di dơ̆ ală kơnòm bơsram mut tàm nam bơsram pa 2023-2024, ală Pôs đồng ling sền gàr tiah nhàr lơgar jat kềng gah tiah nhàr lơgar Lào mờ Campuchia gơl lòt gan càr Kon Tum kung pà phan, phan ngui bơsram sră ai 15 nă sau là “Kòn ròng pôs đồng ling sền gàr tiah nhàr lơgar” pơn dờm pơnđiang ală sau geh tai bơta pin dờn mut tàm nam bơsram pa 2023- 2024.

Mờ gùng dà “jàu akhar, lơh geh bơta kơ̆p kờñ” nam bơsram do, Gah đơng lam Mpồl ling sền gàr tiah nhàr lơgar càr Dăk Nông pơn jat tai lơh broă lơh “Dong kờl oh lòt bơsram”. Đại tá ồng Bùi Đức Chính, Phó cíñ uỷ Mpồl ling sền gàr tiah nhàr lơgar càr Dăk Nông pà gĭt, tus tŭ do, neh geh 222 nă kơnòm bơsram tàm 7 xã tiah nhàr lơgar bơh càr Dăk Nông dê mờ 12 nă sau bơh càr Mondulkiri (lơgar Campuchia) geh mpồl ling sền gàr tiah nhàr lơgar càr Dăk Nông dong kờl kơnòm lòt bơsram. Kờp jơh priă tă dong kờl ală sau geh rài kis kal ke là mờr 4 tơmàn 500 tơlak đong, bơh kes priă tă pơgồp bal bơh jơh gùt mpồl ling sền gàr tiah nhàr lơgar càr Dăk Nông dê. Mờ bơta dong kờl bơh kwang bàng, cau ling sền gàr tiah nhàr lơgar, ală kơnòm bơsram neh pơnđơl pràn lơh ngan sùm nàng sơr lèt gan ală bơta kal ke, sươ̆i siar bè phan bơna bal mờ nùs nhơm nàng gơ gơs kòn gơ lòng sồr, kơnòm bơsram jak. Uă sau bơh kơnòm bơsram ờ jak mờ jak đau neh brồ guh nàng gơ gơs kơnòm bơsram jak mờ jak ngan. Đại tá ồng Bùi Đức Chính, đơs: “Broă lơh “Dong kờl oh lòt bơsram- Kòn ròng Pôs đồng ling sền gàr tiah nhàr lơgar” mờ rơndăp broă lơh “Kwang bàng, cau ling Mpồl ling dong kờl oh lòt bơsram” đơs nền bơta niam nùs nhơm dong kờl kòn bơnus uă ngan, bơta tam klăc bal rềp mềr poăc mhàm đah kwang bàng, cau ling Mpồl ling sền gàr tiah nhàr lơgar dê gơwèt mờ làng bol ală jơi bơtiàn tàm tiah nhàr lơgar. Mờ bơh broă lơh do neh bơto tơl nă kwang bàng, cau ling Mpồl ling sền gàr tiah nhàr lơgar in sùm yờ tơnguh uă nùs nhơm gĭt wă tam klăc bal ling klàng làng bol, bơt bơtàu nùs nhơm ling klàng làng bol tam klăc bal rềp mềr poăc mhàm mờ làng bol kòn cau ală jơi bơtiàn tàm tiah nhàr lơgar, pơgồp bơnah lơh àng sơrdah tai nùs nhơm mờ bơhiàn “Mpồl ling Wa Hồ”, “Cau ling geh grăt tơlir” tàm tơngai pa”.

Ală broă lơh “Dong kờl oh lòt bơsram”. “Kòn ròng Pôs đồng ling sền gàr tiah nhàr lơgar” bơh mpồl ling sền gàr tiah nhàr lơgar neh dong ai uă kơnòm bơsram tàm tiah nhàr lơgar ală càr tiah nhàr lơgar Tây Nguyên in geh ală bơta nàng bơsram sră mờ brồ guh. Rùp hin ală cau ling geh grăt tơlir sơlơ geh kwơ rlau tai gơwèt mờ tiah nhàr lơgar gam uă kal ke. Ală broă lơh cèng bơta kwơ geh ngan hơ̆ sơlơ lơh niam rlau tai bơta tam klăc bal nùs nhơm “Cau ling Wa Hồ” mờ làng bol tàm gơl gùng tiah nhàr lơgar.