Dơ̆ mìu dờng dà tih dà lìu kah yau lồi nam pa do neh lơh hoàc huơr kơn jơ̆ kơn jŭt ngan ai uă càr, ƀòn dờng tàm tiah tàm gùl lơgar mờ Tây Nguyên in. Tơnơ̆ dơ̆ trồ tiah lơh aniai, làng bol tiah dà tih dà lìu gam hời rơ hời bơtàu tơnguh wơl, gờñ bè ờs wơl rài kis.

Ờ mìng dong làng bol tàm tiah dà tih dà lìu lơm, tơnơ̆ tŭ trồ tiah lơh aniai, mpồl ling pơn jat tai geh mat tàm uă tiah nàng bơsong jơnau gơ lời wơl. Ală bi dong kờl bơsong dà tih ngơr, ƀŏ lơm bè tàm hìu sơnơm, pà phan sa ai làng bol mờ sền gàr cau kòp pal sơm kòp jŏ ngai tàm tiah dà tih dà lìu. Ƀák sìh Võ Thôi, Phó Kwang lam bồ Hìu sơnơm uă gah tiah Quảng Nam, pà gĭt: “Tŭ dà tih dà lìu gơlik geh den Gah đơng lam Mpồl ling klàng ƀòn dờng Đà Nẵng den Anih tờm rcang gàr lài tiah 5 neh ai ling mờ lơh sùm là nàng tàm tơrbŏ nàng sền gĭt ală jơnau. Tŭ dà tih dà lìu gam pơgăp 6 phơng den Gah đơng lam Mpồl ling klàng bơh ƀòn dờng Đà Nẵng kung bè Anih tờm rcang gàr lài tiah 5 dong kờl ai hìu sơnơm in pơs wàs wơl tiah dà tih dà lìu. Ưn ngài ală mpồl ling klàng neh dong kờl uă ngan”.

Gĭt nđờ rơbô nă làng bol neh geh mpồl ling di tŭ dong klàs lik bơh tiah dà tih dà lìu. Tŭ ală dơ̆ mìu càl tơbŭt dờng dà tih dà lìu tàm rơndăp rơndồl pa jơh, ờ thàn ơm rlô, kwang bàng, cau ling den pơn jat tai lòt gùng. Lơh jat Broă lơh “Quang Trung” bơh Thủ tướng Cíñ phủ dê lam lơh, mpồl ling tiah 5 den geh mat tai tàm ală tiah gơtìp hoàc huơr kơn jơ̆ kơn jŭt ngan nàng dong làng bol lơh wơl hìu đam. Ală ngai do, gĭt nđờ rơbô nă kwang bàng, cau ling soh tàm să he dê gơnoar broă pa- lơh cau lơh hìu, tơryang tơryồng lơh wơl tơl kơlik hìu, rơkàng hìu ai làng bol tiah gơtìp trồ tiah lơh aniai in. Lơh broă ờ kah dơ̆ sào sa, bĭc dồ ết jiơ, ală bi gơ jal ngan pah ngai geh trồ tơngai ờ hoan geh ngan mờ kơ̆p kờñ dong làng bol gờñ geh hìu ơm kơ̆ kơnhăp, bè ờs wơl rài kis lài mờ tơngai sa tềp Dà lơgar.

Trung úy Phạm Ngọc Dân, Tiểu đoàn 303, Trung đoàn 584, Gah đơng lam Mpồl ling klàng càr Dăk Lăk, gam bal mờ mpồl ling lơh wơl hìu ơm ai làng bol in, pà gĭt:“Lơh jat broă lơh Thủ tướng Cíñ phủ dê lam lơh, mpồl ling phàu crong Ling tiah do mờ ală mpồl ling bơh Ƀộ Ling klàng neh ai ling lòt lơh broă jơh nùs ngan, lơh ngai, lơh mang, lơh bal mờ tơngai trồ mìu, trồ tơngai. Oh mi bơsong kal ke bè phan bơna, phan bơt bơtàu, pơnđơl pràn lơh ngan tus ngai 15/1/2026 rơ̆p lơh sir ết ngan rlau jơh 50% khà hìu gơnoar atbồ ală tiah dê neh jàu ai mpồl ling phàu crong Ling tiah 5 mờ ală mpồl ling bơh Ƀộ Ling klàng tàm ù tiah do dê”.

Gĭt nđờ rơbô nă kwang bàng, cau ling Ling tiah 5 neh mờ gam geh mat tàm jơh ală thôn, ƀòn gơtìp gơrềng tài bơh trồ tiah lơh aniai, tus dong kờl tơn broă lơh pa, lơh niam wơl hìu đam ai làng bol gơtìp ờdiơng in. Nùs nhơm geh kơnòl, bơta tơryang tơryồng bơh ală cau ling Wa Hồ dê neh lơh bơta gơrề uă, lơh ngoh rơngăc nùs nhơm bơh làng bol tiah tàm gùl lơgar mờ Tây Nguyên dê. Gŏ mpồl ling bòl glar, làng bol tàm thôn, ƀòn kung tàm sơm bat tê bal pơgồp bal dà kơl hề. Bơdìh mờ trŭ gơm piang, cau gơm dà, cau dong broă, bal mờ gơ̆p tam pà bal bơta kal ke. Tàm ù tiah neh gơtìp tơrlah tơrlơm jơh tơnơ̆ dơ̆ mìu càl rơbŭt dờng, dà tih dà lìu, nùs nhơm ling klàng làng bol sơlơ tam klăc bal, ram mhŭ nùs nhơm bơta nđàc. Mò Nguyễn Thị Mận, ơm tàm sàh Hòa Thịnh, càr Dăk Lăk ngoh rơngăc đơs:“Gŏ ală wa mpồl ling lơh broă bòl glar ngan, sơn nđàc ngan den tàng oh mi kung tus dong bal sơl geh broă lơi den broă hơ̆. Bol añ dong kờl cau ling, trŭ gơm ai cau ling in sa  dơ̆ sa bơkah nàng geh pràn să jan lơh hìu ai làng bol in”.

Sa bal, ơm bal, lơh bal, đơs bal jơnau đơs bơh làng bol ală jơi bơtiàn dê. Nùs nhơm ling klàng làng bol ngai sơlơ kơ̆ wền, lơh geh “nùs nhơm bơt bơtàu rcang gàr lài làng bol dê” kơnhăp kơ̆, lơh geh tai bơta pràn nàng mpồl ling phàu crong Ling tiah 5 in cơnđoà kơ̆ tàm tơl gùng lòt bơt bơtàu mờ sền gàr Dà lơpgar. Thiếu tướng ồng Lương Đình Chung, Cíñ ủy Ling tiah 5 đơs nền, tàm sùm 81 nam bơt bơtàu, tam lơh mờ dờng pràn, Mpồl ling klàng Làng bol Việt Nam sùm tơngŏ loh làng gơnoar broă lam lài, lòt lài, tài Làng bol drơng broă:“Mpồl ling klàng he bơh làng bol mờ geh, tài Làng bol mờ tam lơh”. Lơh pôs đồng tàm ù tiah tàm ngùl lơgar mờ Tây Nguyên, ù tiah kong uă bơta trồ tiah lơh aniai kal ke ngan, kwang bàng, cau ling Mpồl ling phàu crong Ling tiah 5 gĭt wă jrô ngan là, dong làng bol mờ kơnòl broă bơh plai nùs dê, tus mờ Làng bol gờñ ngan rlau jơh, mhar ngan rlau jơh dilah gơtùi. Bol añ kung neh tă pơgồp bơnah bal mờ jơh bal ală anih lơh broă cíñ trị mờ jơh tơl nă làng bol tàm ù tiah ling tiah do dê neh sơr lèt gan geh ală bơta kal ke, bòl glar tàm dơ̆ trồ tiah lơh aniai, mìu càl rơbŭt dờng, dà tih dà lìu. Tŭ làng bol mờ ală tiah sơr lèt gan geh dơ̆ trồ tiah lơh aniai mìu càl rơbŭt dờng, dà tih dà lìu den kwang bàng cau ling phàu crong Ling tiah do dê gơ lơh chờ hờp mờ ram nùs”.

Tàm kàl mìu kal ke ngan mờ ală bơta bòl glar kal ke gam geh, rùp hin cau ling tiah 5 ngềt ngơ̆t tài làng bol, lòt bal mờ làng bol neh gơ gơs tiah kơldìng kơnhăp kơ̆ ai làng bol tiah tàm gùl lơgar mờ Tây Nguyên. Tŭ tơngai digơlan lòt gan tĕ, mơya nùs nhơm ling klàng- làng bol den gam sùm. “Cau ling wa Hồ- Mpồl ling bơh Làng bol dê”- rùp hin hơ̆ sùm ơm sùm uă ngan tàm nùs nhơm làng bol tiah tàm gùl lơgar mờ Tây Nguyên dê.