Tŭ cing mồng tàm Hìu Niam chài thôn M6, xã Vĩnh Hòa, kơnhoàl Vĩnh Thạnh, càr Bình Định dê mpong tus kung là tŭ mpồl dròng cing jañ mồng bơh ƀòn do dê tơrgùm wơl pơrjum. Mpồl dròng cing jañ mồng thôn M6 geh tơl ală cau, jơh bal cau kra bal mờ cau kơnòm să làng bol kòn cau Bahnar dê. Tŭ do, thôn M6, xã Vĩnh Hòa gam lơh jat Rơndăp broă lơh sồ 6 bè  prap gàr, ngui niam bơta kwơ niam chài bơh yau niam bơnĕ ngan bơh ală jơi bơtiàn dồ ết nă cau pơgồp bal mờ bơtàu tơnguh lòt nhơl gơwèt broă lơh jơnau kờñ Dà lơgar bơtàu tơnguh lơh sa - mpồl bơtiàn tiah làng bol jơi bơtiàn dồ ết nă cau mờ tiah kơh bơnơm. Thôn M6 tơrgùm prap gàr mờ ngui niam bơta kwơ niam chài bơh làng bol he dê, pơn rơ ngan là bơtàu tơnguh niam chài cing mồng pơgồp bal mờ ală gùng tam ya xoang bơh yau bơh kòn cau Banhar dê. Pah nhai, tơnơ̆ dơ̆ pơrjum, ală cau geh bơngă pin dờn tàm thôn M6 den tơrgùm wơl ơruh pơnu tàm thôn nàng bơto bơtê wơl broă dròng cing jañ mồng.

Ồng Y Khoa, 69 sơnam, kòn cau Banhar, ơm tàm thôn M6, xã Vĩnh Hòa, kơnhoàl Vĩnh Thạnh là đảng viên geh uă bơngă pin dờn tàm tiah do dê. Jat ồng Y Khoa, gơwèt mờ làng bòn ƀòn lơgar thôn M6, cing mồng mpoong tus là yal bơta lơngăp lơngai, ù tiah tàm bơh bơr bal mờ Yàng mờ mpồl bơtiàn. Ồng Y Khoa, đơs: “Bol añ sùm sền gàr mờ prăp gàr bè bơhiàn niam chài niam bơnĕ jơi bơtiàn bơh bol he dê ngan là dơ̆ lơh chờ dròng cing jañ mồng, đờng goòng kòn cau bơh jơi bơtiàn dê. Kờñ ngui niam geh bơta niam chài bơh yau den ală cau kra, cau kra ƀòn geh bơngă pin dờn pal geh kơnòl mblàng yal, hòi jà ală rơnàng kơnòm să. Ală ngai chờ, ngai lơh yàng pơrjum den pal geh lơh dròng cing jañ mồng. Ală cau gĭt pal bơto pơlam tơn, lơh niam broă ngui niam bơhiàn niam chài niam bơnĕ bơh bol he dê”.

 Thôn M6, xã Vĩnh Hòa, kơnhoàl Vĩnh Thạnh geh pơgap 60% là làng bol kòn cau Bahnar, rài kis làng bol dê uă ngan kơnờm tàm lơh sa suơn sre mờ ròng phan. Lơh jat Broă lơh jơnau kờñ Dà lơgar bơtàu tơnguh lơh sa- mpồl bơtiàn tiah làng bol jơi bơtiàn dồ ết nă cau mờ tiah kơh bơnơm, tơngai pa do, kơnhoàl Vĩnh Thạnh neh dong kờl broă lơh broă sa hìu bơnhă, dong kờl măi mok ai bàr pe hìu bơnhă in. Ồng Đinh Văn Hảo, Kwang atbồ thôn M6, xã Vĩnh Hòa, kơnhoàl Vĩnh Thạnh pà gĭt, nàng niam chài bơh kòn cau Bahnar dê geh prap gàr, tơl nă đảng viên pal lơh krơh lài mblàng yal, hòi jà làng bol prap gàr bơhiàn niam bơnĕ bơh yau bơh jơi bơtiàn kòn cau he dê. Pah nhai, tơnơ̆ ală dơ̆ pơrjum ling klàng làng bol, ngan là tàm hìu niam chài thôn M6, mpồl niam chài dròng cing jañ mồng rơ̆p bơto ai làng bol in broă dròng cing mồng. Ồng Hảo pà gĭt tai, đảng viên, cau geh bơngă pin dờn lam lài bơsram tàp mờ đoàn viên, ơruh pơnu, bơto pơlam rơnàng kơnòm să in đòm jat ală cau lòt lài. Ồng Đinh Văn Hảo, đơs: “Pah dơ̆ pơrjum làng bol, tŭ lơi kung sùm mblàng bal bơto tơngkah làng bol pal ngui niam bơhiàn niam chài jơi bơtiàn bơh tiah he dê. Mờ kơnòl broă là dùl nă đảng viên den să tờm añ kung bè ală cau tàm ƀòn sơl pơgồp bal tàm tơl hìu bơnhă tơn nàng mblàng yal hòi jà làng bol, ală broă lơi làng bol ờ hềt gĭt wă den bol añ mblàng yal tai làng bol gĭt loh rlau tai bè ală bơta kung bè broă bau bơh dềt”.

Kơnhoàl tiah kơh bơnơm Vĩnh Thạnh, càr Bình Định là càr lơh jat niam ngan ală rơndăp broă lơh gơwèt broă lơh jơnau kờñ Dà lơgar bơtàu tơnguh lơh sa- mpồl bơtiàn tiah làng bol jơi bơtiàn dồ ết nă cau mờ tiah kơh bơnơm. Bơh broă lơh do, rài kis phan bơna, nùs nhơm làng bol jơi bơtiàn dồ ết nă cau pơn jat tai geh tam gơl, khà hìu bơnhă rƀah gơmù uă ngan; phan bơna bơt bơtàu lơh sa- mpồl bơtiàn geh bơcri priă, gah bơto bơtê lơh geh uă cồng nha niam ngan, broă lơh sền gròi pràn kơl dang să jan làng bol kòn cau in ngai sơlơ niam rlau; bơhiàn niam chài ală jơi bơtiàn geh prap gàr mờ ngui niam... Ồng Đinh Tiêu, Kwang atbồ cơldŭ lơh broă Jơi bơtiàn kơnhoàl tiah kơh bơnơm Vĩnh Thạnh pà gĭt, tàm ù tiah kơnhoàl geh 31 nă cau geh bơnhă pin dờn. Cau geh bơngă pin dờn neh tă pơgồp uă ngan tàm dơ̆ hòi jà làng bol lơh jat ală gùng dà broă lơh bơh Đảng, Adat boh lam bơh Dà lơgar dê. Do kung là “tê tơn jòng” tàm broă cri tơrña bơyai, bơsong ală broă tam lah tam ring, tam pìt tam phà ù tiah bơh làng bol tiah do dê. Jat ồng Đinh Tiêu, ală cau geh bơngă pin dờn neh bal mờ gơnoar atbồ hòi jà làng bol pà is ù lơh gùng lòt: “Tŭ lơh jat broă lơh tiah làng bol jơi bơtiàn dồ ết nă cau, jơh ală anih lơh broă cíñ trị lam lơh jat bal. Cau geh bơngă pin dờn, đảng viên lòt lài tàm broă mblàng yal, hòi jà bè broă bau bơh dềt mờ bau mờ cau jơi nòi rềp bal, broă prap gàr mờ ngui niam bơhiàn niam chài tiah làng bol jơi bơtiàn dồ ết nă cau kung bè hòi jà làng bol tus bal ală rơndăp broă lơh lơh sa. Cau geh bơngă pin dờn, Ƀí thư Ci ƀộ, kwang atbồ thôn neh dong kấp xã, Mpồl đơng lam kấp kơnhoàl lam lơh jat tus di mờ ƀòn lơgar, lam lơh jat ală broă lơh, rơndăp broă lơh bơtàu tơnguh lơh sa tiah làng bol jơi bơtiàn dồ ết nă cau”.

Kơnhoàl Hoài Ân geh 3 xã tiah kơh bơnơm là: Ðak Mang, Bok Tới, Ân Sơn là tiah ơm kis bơh uă ngan làng bol kòn cau Banhar mờ H’rê. Tơngai bơh nam 2021-2025, kơnhoàl Hoài Ân lơh jat rơndăp broă lơh Rơndăp ù tiah, rơndăp tăp sèng kơ̆ kơl jăp tàm bàr pe xã tiah kơh bơnơm do. Bơh priă Broă lơh jơnau kờñ Dà lơgar bơtàu tơnguh lơh sa- mpồl bơtiàn tiah làng bol jơi bơtiàn dồ ết nă cau mờ tiah kơh bơnơm, kơnhoàl Hoài Ân neh lơh sir tiah làng bol ơm kis ƀòn T6 (ƀòn pa Đak Bok), xã Đak Mang. Tiah làng bol ơm kis do gơ ơm tàm Rơndăp broă lơh sồ 2: rơndăp ù tiah, rơndăp tăp sèng, rơndăp tiah ơm mờ bè ờs làng bol tiah ơm kis tàm ală tiah kờñ pal geh gơwèt broă lơh jơnau kờñ Dà lơgar bơtàu tơnguh lơh sa- mpồl bơtiàn tiah làng bol jơi bơtiàn dồ ết nă cau mờ tiah kơh bơnơm. Rơndăp broă lơh geh sơnđờm mut lơh bơh nam 2022, tus tŭ do sền bal là neh lơh sir mờ rcang tàm jàu ai Ủy ƀan Ñân zân xã Đak Mang in ai tiah ơm kis pa ai làng bol in. Ồng Nguyễn Xuân Phong, Phó Củ tịc Ủy ƀan Ñân zân kơnhoàl Hoài Ân đơs nền, broă lơh tiah ơm kis ƀòn Đak Bok, Đak Mang pơgồp bơnah jơnau kờñ ù ơm ai làng bol in gờñ bè ờs wơl rài kis:“Ngan ngồn tă pơgồp bơh ală cau geh bơngă pin dờn tàm mpồl bơtiàn tiah làng bol ơm kis tơngŏ loh làng ngan bơh broă lam lơh ală broă lơh bơtàu tơnguh lơh sa mpồl bơtiàn mờ tàm ală broă lơh tơrmù rƀah tàm tiah làng bol jơi bơtiàn dồ ết nă cau. Hơ̆ là gah rbàng tàm tơrbŏ bal nàng Đảng, Dà lơgar mờ ală kwang bàng at gơnoar broă ală tiah tìp mat mờ làng bol. Bơh ală cau do, ală broă kal ke bơh tiah do dê rơ̆p geh ală cau geh bơngă pin dờn bal mờ bơta tus bal bơh ală anih lơh broă gơnoar atbồ”.

Pah nam, Mpồl lơh broă Jơi bơtiàn càr Bình Định pờ ală ơdŭ tề lam, bơto jơnau gĭt wă adat boh lam lời ai ală cau geh bơngă pin dờn in. Ồng Đinh Văn Lung, Kwang atbồ Mpồl lơh broă jơi bơtiàn càr Bình Định pà gĭt: Ủy ƀan Ñân zân ală kơnhoàl kung rcang lài yal jơnau, mblàng yal bơto bơtê adat boh lam ai cau geh bơngă pin dờn in, bơta chài lơh broă mblàng yal ai cau geh bơngă pin dờn in. Ồng Đinh Văn Lung, đơs: “Tŭ do, càr Bình Đinh geh 21 xã lơh jat broă lơh jơnau kờñ Dà lơgar bơtàu tơnguh lơh sa- mpồl bơtiàn tiah làng bol jơi bơtiàn dồ ết nă cau mờ tiah kơh bơnơm. Gơnoar bơh cau geh bơngă pin dờn tàm làng bol jơi bơtiàn dồ ết nă cau tus bal tàm broă mblàng yal, hòi jà tàm làng bol jơi bơtiàn dồ ết nă cau jat Jơnau lơh nền sồ 1719 do den gơnoar broă bơh ală cau kra dê jơh nùs jơh tồr ngan. Tŭ Mpồl lơh broă Jơi bơtiàn càr Bình Định kung bè ală gah lòt mblàng yal tàm tiah làng bol jơi bơtiàn dồ ết nă cau den ală cau kra hơ̆ ndrờm geh mat lơm, iăt, kơno, tus bal mờ broă lơh, tơngume, ngan là tàm 10 rơndăp broă lơh ală rơndăp broă lơh dềt mờ tơngume bơnah phan dê".