Bơh 10 nam lơh jăt Jơnau lơh nền 217 nam 2013 bơh Ƀộ Cíñ trị dê, Mpồl ala măt cau lơh broă (kông đoàn) mờ Mặt trận dà lơgar ală kâp neh đơng lam mờ tus bal mờr 144 rbô dơ̆ jăt sền, mờr 80 rbô dơ̆ tă pơgồp jơnau đơs mpồl bơtiàn; geh rlau 408 rbô sră nggal sồr dan tơnơ̆ jăt sền, mờ rlau 39 rbô 200 sră nggal sồr dan tơnơ̆ tă pơgồp jơnau đơs; geh rlau 33 rbô sră nggal yal wơl bơh ală anih lơh broă, mpồl geh jăt sền dê mờ geh sră nggal jơnau rơcăng cih geh tă pơgồp jơnau đơs. Bal mờ ală bơta niam ngan, broă lơh jăt Jơnau lơh nền 217 kung gam ờ dồ êt bơta ờ hềt dipal.

Ồng Vũ Hồng Quang, Kwang bàng tàm Mpồl Duh broă, Phó Kwang ătbồ Mpồl Gùng dà broă lơh kơrnoăt boh lam Mpồl ala măt cau lơh broă dà lơgar Việt Nam dê pà gĭt, ală bơta gam geh gam gơkòl do rơ̆p geh Mpồl ala măt cau lơh broă dà lơgar Việt Nam pơn jăt tai cih yal mờ tă pơgồp jơnau đơs tàm ală tŭ lơh adăt boh lam mờ ală sră nggal kơrnoăt boh lam tàm tơngai tus.