Càr Dăk Lak geh 49 jơi bơtiàn ơm kis bal, khà kờp làng bol rlau 2 tơlak nă cau, tàm hơ̆, làng bol jơi bơtiàn dồ ết nă cau geh pơgap 34%. Tơngai bơh nam 2021-2025, càr Dăk Lăk geh Dà lơgar tam pà mờr 5 rơbô 600 tơmàn đong, càr kung neh tàm pơnring  ai rlau 1 rơbô 400 tơmàn đong nàng lơh jat 3 broă lơh jơnau kờñ Dà lơgar dê. Priă bơcri kwơ màng do neh lơh geh muh mat pa tàm tiah làng bol jơi bơtiàn dồ ết nă cau, phan bơna bơt bơtàu geh bơcri priă lơh dồ ròt bal, di tiah, di anih, priă lơh geh bơh làng bol geh dê tơnguh uă, khà hìu bơnhă rƀah gơmù rơ hời.

Pơrjum dờng Cau ala mat ală jơi bơtiàn dồ ết nă cau càr Dăk Lăk dơ̆ 4 ai tơlik ală jơnau kờñ kwơ màng, geh: nam 2029 tơnguh priă lơh geh kờp bal tơl nă cau tiah làng bol jơi bơtiàn dồ ết nă cau uă rlau bơh 1,5 tus 2 dơ̆ pơndrờm mờ tŭ do, khà hìu bơnhă rƀah tiah làng bol jơi bơtiàn dồ ết nă cau gơmù bơh 3 tus 4% dùl nam, lơh ngan tus nam 2030 sền bal ờ gam kơnhoàl rƀah, xã kal ke uă ngan tai.