Đơng lam tơngu me pơrjum, Phó Củ tịc Quốk hội mò Nguyễn Thị Thanh đơs sùm, Anih duh broă Sùm Quốk hội tơlik nùs nhơm ưn ngài uă ngan mờ pơyoa jơnau chờ gờm niam bơnĕ ngan tus mờ ală cau pơgru lài do, ală cau ala măt Quốk hội neh mờ gam lơh broă tàm gah bơto bơtê, bal mờ mờr 1 tơlăk 600 rơbô nă cau pơgru, kwang bàng atbồ geh bơto bơtê tàm ală tiah gùt lơgar.

Ală cau ala măt tơlik nùs nhơm ring bal uă mờ broă pal geh Adăt Cau pơgru nàng lơh gơs adăt boh lam bè cau pơgru, mờ geh gùng dà broă lơh krơi is nàng bơ̆t bơtàu mờ bơtàu tơnguh mpồl cau pơgru; bơsong ală bơta gơkòl tàm broă atbồ dà lơgar bè cau pơgru tŭ do. Jăt ồng Trần Văn Thức, mpồl kwang bàng Quốk hội càr Thanh Hoá đơs, broă rơwah cau pơgru tàm ală hìu bơsram dà lơgar tŭ do gam lơh jăt jơnau geh ai bal bè rơwah viêc cứk, do là bơta gơkòl lơh gơtìp jơnkah ờ tơl cau pơgru tàm ờ uă tiah, ờ gơtùi bơyai lơh bơto bơsram tàm ờ uă môn nàng lơh jăt broă bơto 3 kấp nam 2018.