Là càr kơh bơnơm tiah nhàr dà lơgar, khà làng bol jơi bơtiàn dùl êt nă cau geh rlau 80%, ală nam do, Lai Châu sùm git nền broă lơh jat niam ală broă dong kờl kòn cau, dong làng bol kòn cau bơtàu tơnguh lơh sa, gàr kơ̆ kơljap rài kis, tơn jơh jơgloh tơrmù rƀah. Mờ 20 jơi bơtiàn ơm kis, tàm hơ̆ geh 4 jơi bơtiàn geh dùl êt ngan cau là Cống, Mảng, La hủ mờ Si la, bồ tơngoh bơsram sră, bơta chài git wă, bơhiàn bơh yau li la. Bulah là ƀuơn mơya kung là bơta lòng gơ wèt mờ gơnoar atbồ ală kâp tàm broă ngui niam bơta kuơ niam chài đah ală jơi bơtiàn tàm ù tiah càr dê nàng bal mờ gơp bơtàu tơnguh. Lai Châu neh ai tơlik nghị quyết bè broă dong kờl bơtàu tơnguh lơh sa suơn sre phan bơna tơrgùm bal tơngai bơh nam 2021 tus nam 2025. Do là bơta pal geh nàng ală kơnhoàl, ƀòn dờng hòi jà crơng gơs, gơ hòi gơ jà ală hợp ták xã bơcri priă, lơh bal, lòt bal mờ gơnoar atbồ tàm ƀòn lơgar lơh geh cồng nha broă lơh tơl xã dùl phan bơna, ai gŏ là dùl tàm uă broă dong kờl geh cồng nha bơh càr Lai Châu dê nàng kờñ dong kờl ai làng bol kòn cau in jòi anih blơi phan lơh gơs bơh suơn sre, dong tơn jơh jơgloh tơrmù rƀah kơ̆ kơljap jŏ jòng sùm. Ồng Lê Xuân Tiến, Phó Kwang atbồ Sở Kông thương càr Lai Châu pà git: “Tàm tơngai bơh nam 2021 tus nam 2025 den git nền lơh 7 drà tiah làng bol jơi bơtiàn dùl êt nă cau. Gơ wèt mờ broă tàm tơrbŏ bal ală phan lơh gơs bơh suơn sre bơh làng bol jơi bơtiàn dùl êt nă cau dê, Sở Kông thương neh tă pơgồp jơnau đơs Ủy ƀan càr in lơh 16 broă lơh nàng lam lơh jat, nàng tàm tơrbŏ bal jơh ală phan lơh gơs bơh suơn sre bơh làng bol dê tac tàm ală siêu thị, anih tờm kă bro tàm càr kung bè 2, 3 tiah ndai”.

Bơh dùl càr ờ geh mat tàm sră wac sềr ù tiah tam chi sa plai, tŭ do, Sơn La neh gơ gơs là tiah tam plai chi dờng ngan rlau jơh tiah đah tô dà lơgar mờ ơm dŏ 2 gùt lơgar. Phan geh tac tus uă drà kă bro dờng tàm dunia mờ bơta kuơ cèng wơl pah nam bơh 150 tus 170 tơlak dolar Mỹ, git nđờ rbô nă làng bol lơh broă sa là cau jơi bơtiàn dùl êt nă cau gơ gơs cau pas geh priă tơlak, geh priă tơmàn. Bal mờ broă sơlơ chồl pràn bơtaù tơnguh càr gơ gơs tiah tam plai chi uă ngan rlau jơh tiah đah tô dà lơgar dê là broă lơh sơlơ dong tơnguh tac phan lơh gơs bơh suơn sre bơh ală broă lơh hòi jà kă bro. Tŭ do, geh 16 bơta phan lơh gơs bơh suơn sre bơh càr Sơn La dê tus bal tac tàm drà kă bro 12 lơgar. Phan lơh gơs bơh suơn sre kung neh mut tàm ròt ală mpồl tac phan bơh ală siêu thị dờng dê, bè: Lotte, Hapro, Winmart. Phan lơh gơs bơh suơn sre tơl niam bơh Sơn La dê rơhời lơh gơs bơngă pin dờn, mat kă bro tàm drà kă bro tàm lơgar mờ lơgar ndai, geh cau ngui sa kờñ ngan mờ jờng rơ bè bơta niam. Ồng Quàng Văn Dương, cau geh jơngtàm Hợp ták xã lơh sa suơn sre Xuân Tiến, càr Sơn La kơp kờñ: “Bơta kơp kờñ bơh làng bol kung bè hợp ták xã dê là kờñ broă tac phan lơh gơs, kờñ phan pơ ò ngai sơlơ bơtàu tơnguh, nàng gơtùi tac uă rlau, geh uă cau git tus, kờñ tac tàm lơgar mờ tac tàm lơgar ndai tai”.

Bình Phước là tiah geh ù tiah gơ dờp ngan, geh bơta geh is ƀuơn nàng tam tờm điều mờ geh sền là tiah tam uă điều tŭ geh mờr 50% bă ù tam mờ rlau 54% khà điều lơh geh bơh gùt lơgar dê. Điều Bình Phước niam rlau mờ điều blơi bơh lơgar ndai, pơgồp bơnah ai tờm điều gơ gơs chi tam jŏ nam pràn cèng wơl priă jền lơh geh bơh tac hờ lơgar ndai uă, gơ gơs là phan tac hờ lơgar ndai tờm ngan bơh càr dê tàm ală nam rềp ndo. Mò Thân Thị Xiêm, Kwang atbồ Kông ty TNHH MTV An Thuận hơ pơrgon lòt bal mờ làng bol lơh broă sa càr Bình Phước tàm broă tac phan lơh gơs: “Bol hi neh lòt bal mờ làng bol càr Bình Phước, bơh làng bol jơi bơtiàn dùl êt nă cau tus kòn cau S’Tiêng, den bol hi neh geh tŭ đềt mềr uă nam là hơ pơrgon mờ làng bol tŭ kàl mìu tus, ală kal ke bơh làng bol dê den bol hi tam pà bal, mờ tŭ tơnhàu den bol hi bal mờ làng bol kong kơnòl, nàng ai điều rê hờ hìu măi prap phan, di mờ khà geh sồr bơh càr Bình Phước dê nàng ai geh broă lơh làng bol in tơnơ̆ ală ngai mìu mờ tơnơ̆ ală ngai tơnbhàu, tài làng bol bơh càr Bình Phước dê mìng geh điều là phan lơh geh priă jền tờm ngan”.

Tơngai lài, gah kông thương sùm tơrgùm sơlơ tơnguh ală broă lơh hòi jà kă bro nàng kờñ tàm tơrbŏ bal đah broă lơh gơlik mờ tac phan lơh gơs ai làng bol in, tàm hơ̆ geh làng bol jơi bơtiàn dùl êt nă cau tiah kơh bơnơm, tiah sar lơgar ngài. Ƀộ Kông thương neh bal mờ ală tiah sùm lơh ngan nàng phan lơh gơs geh yal tơnggit làm uă tàm ală drà kă bro mờ geh uă mpồl blơi phan jòi tus. Ală broă lơh dong kờl ngan ngồn do neh lơh gơlik bơta gơ rềng niam ngan mờ khac tac phan lơh gơs bơh suơn sre bơh làng bol dê gơguh uă jat pah nam mờ geh mat tàm jơh ală mpồl tac phan dờng kung bè tac tus drà kă bro dunia.