Ngai 6/09, tàm ƀòn dờng Huế, Họk viện cau ùr Việt Nam bơyai lơh dơ̆ Cribơyai Jak chài Dà lơgar tàm tiah tàm gùl lơgar mờ Tây Nguyên lơh jat broă ring bal ùr klau tàm tiah jơi bơtiàn dồ ết nă cau mờ tiah kơh bơnơm; geh jơnau sồr, đơs tơngume, broă lơh hòi jà, dong kờl cau ùr jơi bơtiàn dồ ết nă cau tàm tơngai pơn jat tai. Dơ̆ Cribơyai neh dờp geh rlau 70 jơnau cih bơh ală cau ala mat mờ rơ wah geh 39 jơnau cih neh sền sơwì, pơndàng tàm sră lời kir sơnrai dơ̆ cribơyai dê.

Drờm bal mờ broă sền gĭt ală broă jal mhar gơwèt mờ cau ùr mờ kơnòm dềt jơi bơtiàn dồ ết nă cau, tiah kơh bơnơm, cribơyai tơrgùm cih dờp ală jơnau dan kơnòl broă, broă lơh dong kờl geh cồng nha bơh Rơndăp broă lơh sồ 8 dê tàm tơngai tus. Rơndăp broă lơh sồ 8 là dùl tàm 10 rơndăp broă lơh ală bơta gơwèt broă lơh jơnau kờñ dà lơgar mpồl tam klăc cau ùr Việt Nam dê đơng lam, atbồ mờ đơng lam lơh jat. Ală broă lơh bơh rơndăp broă lơh tơrgùm tàm broă mblàng yal, hòi jà tam gơl jơnau ờ niam bè ùr klau, bơt bơtàu mờ lơh gơrề uă ală broă lơh tơnguh uă gơnoar pràn lơh sa ai cau ùr in... Bơh hơ̆, pơgồp bơnah sơlơ tơnguh rlau tai broă ring bal ùr klau tàm ală tiah do dê.