Hìu bơsram kòn cau kâp 2 mờ kâp 3 An Lão geh 2 kâp bơsram mờ uă ngan kơnòm bơsram là cau Bahnar, H’rê. Ngai 05/4/2024, Ƀan Jơi bơtiàn càr Bình Đình pơgồp bal mờ Hìu bơsram kòn cau kâp 2 mờ kâp 3 An Lão tơlik mat Mpồl “Ơruh pơnu đơs ờ mờ bơta bau gờñ mờ bau cau rềp jơi nòi” tàm hìu bơsram do.

Mpồl do sùm lam lơh pơrjum mìng dùl tơngume rơcang lài kơryan bơta bau gờñ mờ bau cau rềp jơi nòi ai kơnòm bơsram in. Ală kơnòm bơsram gam geh bơto pơlam ală jơnau cih lơhg lài gơ wèt mờ bơta bau gờñ mờ bau cau rềp jơi nòi, bơta aniai bơh bau gờñ dê lơh gơ rềng tus pràn kơldang să jan mờ rài kis; pơlam sền gàr pràn kơldang deh dùh tàm sơnam kơnòm pa tàu.

Oh Đinh Thị Bảo Thi, kơnòm bơsram ơdŭ 9A2, Hìu bơsram kòn cau kâp 2 mờ kâp 3 An Lão sền gŏ ală bơta mờ mpồl cèng tus ală bơyô in geh kuơ mờ ngan ngồn ngan: “Tàm hìu bơsram, pơgru neh mblàng yal bè bơta bau gờñ bol oh in, tơnơ̆ hơ̆ oh pơn jat tai mblàng yal wơl ală bơyô ndai in git bè bơta bau gờñ. Bơh broă mblàng yal do, bol oh bal mờ gơp rơp lơh jat mờ ờ lơh tìs”.

Uă xã tàm kơnhoàl tiah kơh bơnơm An Lão geh broă lơh niam nàng kờñ tơrmù ƀà mờ kơryan bơta bau gờñ mờ bau cau rềp jơi nòi. Tàm xã An Hưng, tơl thôn, ƀòn tàm jơnau pơrgon ƀòn dê ndrờm tơmut tơngume cih mùl màl lơh glài ală broă lơh tìs gơ rềng tus bơta bau gờñ mờ bau cau rềp jơi nòi. Ală cau kra ƀòn, cau atbồ ƀòn, cau geh bơngă pin dờn geh gơnoar broă kuơmàng ngan tàm broă mblàng yal, hòi jà làng bol at tê bal kơryan bơta bau gờñ. Ồng Đinh Văn Ranh ơm tàm thôn 4, xã An Hưng pà git: “Cau geh bơngă pin dờn bol hi sùm lơh jat bơta geh ngan mờ git tơl hìu bơnhă làng bol nàng bal mờ gah broă lơh, mpồl bal thôn dê lòt mblàng yal. Dilah git gŏ hìu bơnhă lơi geh cau kờñ bău gờñ den bol hi tus tơn nàng mblàng yal tàm hìu, ờ ai bau gờñ. Ală ngai pơrjum thôn, pơrjum ală mpồl, gah broă lơh, ală dơ̆ bè hơ̆ den bol hi ung pơgồp bal mblàng yal nàng làng bol in git”.

Mpồl lơh kơnòl broă sùm Huyện uỷ kơnhoàl An Lão sồr ală kâp ủy Đảng, gơnoar atbồ, mặt trận, mpồl cau lơh bal nàng mblàng yal, tơnguh jơnau git wă làng bol in bè bơta bau gờñ mờ deh dùh nàng pleh bơta bau gờñ mờ bau cau rềp jơi nòi. Broă mblàng yal pal lơh mờ broă lơh ngan ngồn, di mpồl cau mờ broă lơh mblàng yal pal ngac ngar. Ồng Phạm Minh Tâm, Kwang atbồ Cơldŭ lơh broă Jơi bơtiàn kơnhoàl An Lão pà git: “Gơ wèt mờ Cơldŭ lơh broă Jơi bơtiàn pal pơgồp bal mờ Huyện đoàn kơnhoàl An Lão, Ủy ƀan Ñân zân ală xã, thị trấn, sơlơ tơnguh tai broă lơh mblàng yal mờ uă broă lơh. Kuơmàng tàm 3 hìu bơsram ơm tơn mờ 2 hìu bơsram ơm sa ngai kơnhoàl dê. Tơrgùm tàm broă mblàng yal ai kơnòm bơsram tàm sơnam kup bau lơh gơbàn bơta sang bơsram nàng bau gờñ. Bè hơ̆ den tàng tàm nam lài ờ geh bơta cau lơi bau gờñ”.

Kơnhoàl tiah kơh bơnơm Vân Canh là tiah geh gal làng bol kòn cau Bahnar, H’rê ơm kis kung là tiah geh khà cau bau gờñ uă ngan rlau jơh càr Bình Đình. Jơnau bau gờñ là ală oh git wă ờ hềt tơl làm bè jơnau git wă bơto bơtê ùr klau, pràn kơldang deh sùh sơnam pa tàu, bơta ờ git wă bè adat boh lam; ờ geh kơnòl bơh hìu bơnhă dê. Ồng Nguyễn Xuân Việt, Phó Củ tịc Duh broă sùm Ủy ƀan Ñân zân kơnhoàl Vân Canh pà git, kơnhoàl neh sồr kwang bàng Cơldŭ lơh broă Jơi bơtiàn mờ ală xã sùm lơh broă tàm tơl thôn, ƀòn hòi jà ală hìu bơnhă kĭ jơnau pơrgon ờ lời gơlik geh. Broă pơgồp bal đah hìu bơsram mờ hìu bơnhă geh sền gròi uă ngan: “Bulah mblàng yal uă ngan, ală mpồl, gah broă lơh neh lơh broă kràñ cê mơya bơta bau gờñ kung gam gơlik geh. Tŭ do, bơdìh mờ broă lơh mblàng yal den bơta tờm ngan là jơnau git wă bơh làng bol dê, mờ ngan là ală oh pa tàu ờ hềt git tơl làm bè bơta aniai bơh broă bau gờñ dê, den tàng tŭ neh gơlik geh den tơnơ̆ do gơ rềng uă ngan tus broă sền gàr pràn kơldang oh kòn in, lơh gơ rềng tus broă lơh sa hìu bơnhă mờ gơ lời wơl jơnau ờ niam tàm mpồl bơtiàn. Kơnhoàl kung neh sồr ală gah broă lơh mờ ală tiah, hìu bơsram mblàng yal bè lơi nàng tơnguh jơnau git wă làng bol in, ngan là cau kờñ geh mblàng yal là mpồl cau kơnòm să”.

Càr Bình Định lơh ngan tơrmù kờp bal bơh 2 tus 3% pah nam khà cau bau gờñ mờ gàr sùm ờ gơlik geh bơta bau cau rềp jơi nòi gơ wèt mờ ală tiah, jơi bơtiàn dồ êt nă cau geh khà bau gờñ uă. Ồng Đinh Văn Lung, Kwang atbồ Ƀan Jơi bơtiàn càr Bình Định pà git, Ƀan Jơi bơtiàn càr neh sồr ală kơnhoàl pơgồp bal mờ ală hìu bơsram tàm càr sơlơ tơnguh tai mblàng yal, yal tơnggit mờ bơto bơtê kơnòm bơsram in git rlau tai bè pràn kơldang deh dùh, git wă di bè gùng tam bau hìu bơnhă, bơto bơtê bơta chài tàm rài kis, ală broă lơh rơcang lài kơryan bơta bau gờñ ală oh in: “Broă mblàng yal bè bơta bau gờñ mờ bau cau rềp jơi nòi kung gơ ơm tàm rơndap broă lơh dềt sồ 2 bơh rơndap broă sồ 9, broă lơh 1719 dê. Ƀan Jơi bơtiàn càr kung neh geh broă rơndap lơh bồ nam mờ tam pà priă jền ai ală kơnhoàl in nàng bal mờ gơp mblàng yal. Bơdìh mờ mblàng yal den Ƀan Jơi bơtiàn càr kung lơh mpồl đơs ờ mờ bau gờñ mờ bau cau rềp jơi nòi, lơh pano, áp phích mblàng yal tàm 2, 3 ƀòn, 2, 3 xã geh khà bau gờñ uă”.